ކިޔަވަމުން ނުވަތަ ތަޢްލީމް ޙާޞިލްކުރަމުންދާއިރު އަބަދުވެސް އިމްތިޙާންތައް ދާނީ ކުރިމަތިވަމުންނެވެ. އަބަދުވެސް އޮންނާނީ އިމްތިހާންގެ ދުވަސްވަރު އައިސް ބޯމަތިވެފައެވެ. ކްލާސްޓެސްޓްތަކާއި ޓަރމް ޓެސްޓްތަކެވެ. ސެމިސްޓަރތަކުގެ ޓެސްޓްތަކާއި އަހަރުގެ އިމްތިޙާނެވެ.
ލޮބުވެތި ދަރިވަރުންނަށް ބުނެލަން އޮތީ ދަރިވަރުން ކިޔަސް، ކުޑަކުދިން ކިޔަސް ބާލިޣްވުމަށްފަހު ކުރެވޭ ފާފަތަކުގެ ޒިންމާ އުފުލަން ޖެހޭނެއެވެ. ނަމާދުއެޅުމުގެ ޒިންމާ އުފުލަންޖެހޭނެއެވެ. ޢުމުރުން ހަގުނަމަވެސް ބާލިޣްވެފައިވާނަމަ ދަރިވަރަކަށް ވުމަކީ އިސްލާމް ދީނުގައިވާ މިފަދަ ޒިންމާތަކުން ބައރީޢަވެވޭ ސަބަބެއް ނޫނެވެ.
މިއީ ބުނަން މާރީތި ވާހަކައެއް ނޫން ނަމަވެސް ދަރިވަރުންގެ ތެރޭގައި ތިބި ބައެއް ކުދިންނަކީ ތަފާތު މައްސލަތައް ކުރިމަތިވެ އެކިޒާތުގެ ފާފަކުރެވޭ ކުދިންނެވެ. އަދިކީއްހެއްޔެވެ؟ ނަމާދު ވާޖިބުވުމަށްފަހު ނަމާދުނުކުރުމަކީވެސް ކުރެވޭ ފާފައެކެވެ. ވީމާ އިމްތިޙާނުން ރަނގަޅު ނަތީޖާއެއް ހޯދަން ބޭނުންވާނަމަ މިދައްކާ ވާހަކަ ރަނގަޅަށް އަޑުއަހާށެވެ.
ފާފަކުރުން ގިނަވެއްޖެ ނަމަ ފެންނާނެ ބައެއް އަލާމާތްތައް ހުރެއެވެ. އެގޮތުން ފާހަގަކުރެވޭ އެއްކަމަކީ ލިބިފައިވާ ޢިލްމް ހަނދާން ނެތުމެވެ. ސިއްޙީ ގޮތުން މައްސަލައެއް ނެތި، ޢިލްމު ލިބިފައިވާ ބައެއް މީހުން އަބަދުވެސް ކަންކަން ހަނދާން ނެތިގެން އުޅެން ޖެހޭނަމަ ތިމާގެ އަމަލުތަކާއިމެދު ފުންކޮށް ވިސްނަންވާނެއެވެ!
ޢިލްމް ޙާޞިލްކޮށްގެން ތިބި ބައެއް މީހުން ވަރަށް ގިނައިން ފޮތްބަލާނެއެވެ. ނަމަވެސް އަބަދުވެސް އުޅެން ޖެހޭނީ ހަނދާން ނެތިގެންނެވެ. ތިމާ ހުރިން ހިތުދަސްކޮށްފައި ހުންނަ ތަކެތިވެސް ޖެހޭނީ ފޮތުން ބަލާށެވެ!
މި ގޮތަށް ކަންތައްތައް މެދުވެރިވަނީ އެމީހަކަށް ކުރެވޭ ފާފަތައް ގިނަވުމުން ﷲ ތަޢާލާ އާއި ދުރަށް ދެވޭތީއެވެ. އެހެނީ ފާފަކުރާ ވަރަކަށް އެމީހަކާއި ﷲ ތަޢާލާ އާއި ދެމެދުގައި އޮންނަ ގުޅުން ދާނީ ދުރުވަމުންނެވެ. އެ ގުޅުން ދުރުވަމުންދާ ވަރަކަށް ހިތް ދާނީ ހަރުވެ ހިލަވަމުންނެވެ. ހިތް ހަރުވެ ހިލަވާން ފެށުމުން ހިތުގައި ހުންނަ ޢިލްމު ފިލައިގެންދާނެއެވެ. އަދި ހިތުދަސްކުރަން އުނދަގޫވާނެއެވެ.
ވީމާ މިއީ ކޮންމެ ދަރިވަރަކުވެސް ވިސްނައިލަން ޖެހޭނެ ކަމެކެވެ. ޢިލްމު އެޅުމަށްޓަކައި ހިތާ ސިކުނޑި ހުޅުވި ތާޒާކަންމަތީގައި އޮންނާނީ ހެޔޮ އަމަލުތައް ކުރުން ގިނަކުރި ވަރަކުންނެވެ. ފަސޭހައިން ފިލާވަޅުތައް ދަސްވާނީ ހިތާއި ސިކުނޑި ތާޒާކަން މަތީގައި ބޭއްވިގެންނެވެ. އަދި ދަސްކުރާ ފިލާވަޅުތައް ހިތުގައި ހަރުލައި ހުންނާނީ ވެސް އެއިރުންނެވެ. ހަމައެއާއިއެކު ތައުލީމް ޙާޞިލުކުރަމުން ގެންދާ އުމުރުގައި ދީނަށް ލޯބިކޮށް އަމަލުކުރުމަކީ އެކަމުގެ ފައިދާ މުޅި އުމުރުގައިވެސް ކުރާނެ ކަމެކެވެ.
--އިސްލާމީ ތިލަފަތުގެ ދަރުސަކުން
