ﷲ ގެ އެންގެވުން ބާއްވާފައި ނުވަތަ ދުރަށް ދަމުންގޮސް ގިނަ ބައަކު އިންސާނުންނަށް ބަރޯސާވެ ﷲ ތައާލާ މަތިން ހަނދުމަވެސް ނެތިކޮށްލައިފިއެވެ. ތިމާ އަޅުވެތިވާން ޖެހޭނީ ހަމައެކަނި ﷲ ތަޢާލާއަށްކަންވެސް ހަނދާން ނައްތާލައިފިއެވެ. ވާގިއެދެން އޮތް ފަރާތަކީ ﷲ ތަޢާލާ ކަމާއި ކޮންމެ ކަމެއްވެސް ހިންމަވައި ދެއްވަވާ ފަރާތަކީ ﷲ ތަޢާލާ ކަމަށް ޤަބޫލުވެސް ނުކުރެވޭ ހިސާބަށް މީހުންނަށް މި ޙަޤީޤަތްތައް އޮޅިއްޖެއެވެ.
ވަކި ހިސާބަކުން މިފެންނަނީ އަޅުވެތިވެ ބަރޯސާވެގެން އުޅުނު މީހާ ތިމާ އާއި ވަކިވާތަނެވެ. ރުޅިވެ ދުރުވާތަނެވެ. ބައެއް ފަހަރު މަރުވެސް ވެއެވެ. އެ ހިސާބުން އެފަދަ މީހުންނަށް 4 އުދަރެސް ފެނުޖެހެއެވެ. ދެން ހަދާނެ ގޮތް ހުސްވެއެވެ. އެހިސާބުން ﷲ ތަޢާލާގެ މަތިން ހަނދާންވެ ދުޢާކުރަންވެސް ފަށައެވެ.
ހުރިހާ ކަންކަމުގައިވެސް އަބަދުވެސް ﷲ ތަޢާލާއަށް ބަރޯސާވެ ވާގިއެދެމުންދާ މީހާއަށް މިފަދަ އެއްވެސް ޙާލަތަކާއި ކުރިމަތިލާކަށް ނުޖެހޭނެއެވެ! ﷲ ތަޢާލާ އީ ދިރިދެމިވޮޑިގެންވާ ރަސްކަލާނގެއެވެ.
އިތުރަށް ވިސްނައިލާށެވެ! ކޮންމެ މީހަކީ ތިބާ ދެކެ ލޯބިވާ އަދި ހެޔޮއެދޭ މީހެއް ނޫނެވެ! އެމީހާ އެހެން މީހުންގެ ބޭނުން ހިފާނީ އޭނާއަށް ފައިދާވާ ކަންކަމުގައެވެ. އޭނާއަށް ފައިދާ އިތުރުކުރުމަށެވެ. ނަމަވެސް ﷲ ތަޢާލާ މީސްތަކުން ދެކެ ލޯބިވެވޮޑޮގަންނަވަނީ އެމީހާގެ ތަޤްވާވެރިކަމަށެވެ. އެއްވެސް މީހެއްގެ ކިބައިން އެއްވެސް ކަމަކަށް ﷲ ތަޢާލާ ބޭނުންފުޅުވެވޮޑިގެންނެއް ނުވެއެވެ.
ﷲ ތަޢާލާ އަނގަވާފައިވާ ކަންކަން އަހަރެމެން ކުރަންވީ ވެސް ހަމަ އަހަރެމެންނަށްޓަކައެވެ. އެކަމުގެ ހުރިހާ ފައިދާތަކެއް ލިބޭނީ ވެސް ހަމަ އަހަރެމެންނަށެވެ. ވީމާ އެއްވެސް މީހަކަށް އަޅުވެތިވެ ބަރޯސާ ނުވާށެވެ! ﷲ ތަޢާލާއަށް ވަކީލުކޮށް ކިޔަމަންތެރިކަން އަދާކުރާށެވެ! އެއޮރުން އެއްވެސް ކަމެއްގައި މާޔޫސްވާކަށް ނުޖެހޭނެއެވެ.
- އިސްލާމީ ތިލަފަތުގެ ދަރުސަކުން
