ތިބާއަށް ބޮޑު ބައްޔެއް ޖެހުނީއެވެ. އަތްމަތިދަތިވީއެވެ. ކައިވެނިރޫޅި އެކަނިވެރިވީއެވެ. އަދި މީނޫނަސް ތިމާއަށް ހިތްދަތިކަން ލިބޭ ކޮންމެ ޙާލަތެއްގައިވެސް ތިމާއަށްވުރެ ނިކަމެތި ނުވަތަ ދަތިޙާލުގައި ތިބި ބައިވަރު މީހުން ދުނިޔޭގައި އެބަތިބިކަން ޤަބޫލްކޮށް ﷲ ތަޢާލާއަށް ޙަމްދުކޮށް ޝުކުރުކޮށްފި މީހަކަށް ޙައްޤު މިންވަރު އެނގޭހެއްޔެވެ؟
އެމިންވަރަކީ އެނިޢުމަތެއް ނުލިބިދާނެކަމަށް މުސްލިމުން ތެޅިފޮޅެމުން އަންނަ ސުވަރުގެއެވެ. އެއީ ކީއްވެގެން ހެއްޔެވެ؟ ﷲ ތަޢާލާ ދެއްވެވި މިންވަރަށް ޝުކުރުކުރީތީއެވެ. ހެޔޮމިންވަރާއި ނުބައި މިންވަރަށް އީމާންވީތީއެވެ. ނަމަވެސް ޝަރުޠަކާއިއެކުގައެވެ. އެޝަރުޠަކީ ﷲ ތަޢާލާއަށް ކިޔަމަންތެރި އަލަކު ކަމުގައިވުމެވެ.
މިގޮތަށް މިބަސް ބޭނުންކުރިނަމަވެސް އެއްވެސް ކަމެއްގައި ނުބައި މިންވަރެއް ނުވެއެވެ. ކޮންމެ މިންވަރަކީވެސް ﷲ ތަޢާލާ މިންވަރުކުރައްވަވާ މިންވަރެވެ. ވީމާ ވިސްނައި ޤަބޫލުކުރަން އެންމެ ފަސޭހަވާނީ އުފާވެރިކަންވެސް އަދި ހިތްދަތިކަންވެސް މިންވަރަކުރައްވަވަނީ ﷲ ތަޢާލާކަމަށް އީމާންވުވެ ބުނިއްޔާއެވެ.
ޔަޤީންކުރާށެވެ! ކޮންމެ ތަކްލީފަކާއިއެކުގައިވެސް އަދި ކޮންމެ ހިތްދަތިކަމަކާއިއެކުގައިވެސް ﷲ ތަޢާލާގެ ރަޙްމަތެއްވެއެވެ. އިތުރަށް ޔަޤީންކުރަންވީ ﷲ ތަޢާލާ ދެއްވަވާ ރަޙްމަތް ދުނިޔޭގައި ލިބުމުން އުފާވާނެވަރަށްވުރެ މާބޮޑަށް ޤިޔާމަތް ދުވަހު ދެއްވަވައިފިނަމަ އުފާވާނެ ކަމެވެ.
- މަޢުލޫމާތު: މުފްތީ މެންކުގެ ދަރުސަކުން
