އެއްވެސް ބާވަތެއްގެ ތަކްލީފެއް އުފުލަން ޖެހިގެން ދެރަވެ މާޔޫސްނުވާށެވެ. އަދި އުފާކުރާށެވެ! ސަބަބު މިބުނަނީއެވެ.
ދުނިޔޭގައި ތަކްލީފު އުފުލަންނުޖެހި ހިތްހަމަޖެހިގެން އުޅެވޭނަމަ ﷲ ތަޢާލާގެ މަތިން ހަނދުމަކުރެވޭނީވެސް ވަރަށް މަދު މީހަކަށެވެ. ނަމާދުކުރިނަމަވެސް ގިނަ މީހުން ސަލާމްދިނުމާއިއެކު ތެދުވެގެންދާނީއެވެ. ޛިކުރުކޮށް ދުޢާކުރަން ބޭނުމެއް ނުވާނެއެވެ.
ނަމަވެސް ތަކްލީފްތައް އުފުލަންޖެހޭނަމަ ޛިކުރުކުރުން ގިނަކުރާނެއެވެ. ދުޢާކުރުންވެސް ގިނަކުރާނެއެވެ. އަދި ފާފައެއް ނުކޮށް ހުންނަންވެސް ގަދައަޅައި މަސައްކަތްކުރާނެއެވެ. އަދި ﷲ ތަޢާލާ ހަނދުމަކުރުންވެސް ގިނަކުރާނެއެވެ.
ވީމާ ދިރިއުޅުމުގައި ތަކްލީފްތައް ކުރިމަތިވިޔަސް އަދި ބަލިމަޑުކަމެއްގައި އުޅެންޖެހުނަސް ދެރަވެ މާޔޫސްނުވާށެވެ. ތަކްލީފްތައް އުފުލަންޖެހުން ވާނީ އެމީހަކަށް ﷲ ތަޢާލާ އާއި ކުއްތަންވެވި ސުވަރުގެ ވައްދަވާ ސަބަބަށެވެ. ﷲ ތަޢާލާ ލޯބިވެވޮޑިގަންނަވާ އަޅުންނަށް ކުރިމަތުކުރައްވަވާ އިމްތިހާންތައް ބޮޑުކުރައްވަވާ ސަބަބަކީވެސް ސުވަރުގެ ވަނުމަށް ފުރުޞަތު ބޮޑުކޮށްދެއްވެވުމެވެ.
ދެން ނިކަން ބުނެބަލާށެވެ! ތަކްލީފް އުފުލަން ޖެހުމަށްވުރެ ބޮޑު އުފަލަކީ ކޮބައިހެއްޔެވެ؟
- އިސްލާމީ ތިލަފަތުގެ ދަރުސަކުން
