އިސްލާމް ދީނުގައި އޮތީ އެކެއް އަނެކެއްގެ އަތުގައި ހިފައިގެން ކުރިއަށް ދާން މަސައްކަތް ކުރުމެވެ. އެކަކު އަނެކަކަށް ވާގިވެރިވެ އެހީތެރިވުމެވެ. ކިތަންމެ ބުރަ މަސައްކަތަކުން ނަމަވެސް މީހަކު ލައްވައި ނަމާދުކުރުވިއްޖެ ނަމަ އެކަމުގެ ހެޔޮކަން ހާދަހައިވާ މަތިވެރިއެވެ. އެކަމަށް މަސައްކަތް ކުރި މީހަކަށް ގިނަ ގުނަ ސަވާބާއި ދަރުމަ ﷲ ތަޢާލާ ދެއްވަވާނެތެވެ!
ނަމާދު ނުކުރާ މީހާއަށް ވިސްނައިދީ، ނަމާދުކުރުވަން ކުރެވެން ހުރި ހުރިހާ މަސައްކަތްތަކެއް ކުރުމުންވެސް އެމީހާ ނަމާދުކުރުމަށް އިންކާރުކޮށްފިނަމަ އޮތީ އެމީހަކާއި ދުރުހެލިވުމެވެ. ގުޅުން ނުބޭއްވުމެވެ. ގުޅުން ބާއްވާނަމަ އެމީހާގެ ކިބައިން ތިމާއަށްވެސް ނުރަނގަޅު އަސަރުތަކެއް ކޮށްފާނެ ކަމަށްޓަކައެވެ.
އަވަށްޓެރިޔާއަކީ ނަމާދު ނުކުރާ މީހެއް ކަމުގައި ވެއްޖެނަމަ ބައެއް ފަހަރު އެމީހަކާއި އެބަ ގުޅުން ކަނޑާލައި މުޅިން ދުރުކޮށްލައެވެ. އެމީހާ އެކަހެރިކޮށްލެވެއެވެ. އަވަށްޓެރިޔާއަށް ދޭންޖެހޭ ޙައްޤުތަކުންވެސް އެބަ މަހްރޫމްކުރެއެވެ!
އެއްގޮތަކަށްވެސް އެގޮތަށް ކަންތައް ނުކުރާށެވެ! އެ ޙާލަތުގައިވެސް އަވަށްޓެރިޔާ އާއި ގުޅުން ކަނޑާނުލާށެވެ! އޭނާ އާއި ގުޅުން ކަނޑާލައިފިނަމަ އޭނާއަށް ހެޔޮ ނަޞޭޙަތް ދޭނެ މީހަކުވެސް ނުހުރެދާނެ ކަމަށްޓަކައެވެ.
އަވަށްޓެރިޔާ ނަމާދު ނުކުރާކަން ފާހަގަ ކުރެވިއްޖެނަމަ އޭނާއާއި އިތުރަށް ގުޅުން ބަދަހިކޮށް އޭނާ ލައްވައި ނަމާދުކުރުވަން މަސައްކަތްކުރާށެވެ! އޭނާއަށް އިތުރަށް ވިސްނައިދީ ނަމާދަށް ދަމުން އޭނާވެސް ގޮވައިގެން ނަމާދަށް ދާން މަސައްކަތްކުރާށެވެ!
އަވަށްޓެރިންގެ ގޮތުގައި ޣައިރު މުސްލިމުން ތިބި ނަމަވެސް އެމީހެއްގެ ކިބައިން ތިބާއަށް ގެއްލުމެއް ނުލިބޭނަމަ އަވަށްޓެރިންގެ ހައިޞިއްޔަތުން ކުރަންޖެހޭ ކަންކަން އަދާކުރުމަކީ ތަފާތުކަމެކެވެ. އެކަން ކުރަންވާނެއެވެ.
އަދި ނަމާދުނުކުރާ އެކުވެރިންނާއިމެދުގައިވެސް ކަންތައްކުރުން އޮތީ ހަމަ މިގޮތަށެވެ. ފުރަތަމަ ކަމަކަށް މަސައްކަތްކުރަންވީ އޭނާއަށް ހެޔޮކޮށް ހިތައި ވިސްނައިދީގެން ނަމާދުކުރުވޭތޯއެވެ. އަތްދުކޮށްލަންވާނީ ދެން އެހެން ގޮތެއް ނެތުމުންނެވެ. އެޙާލަތުގައި އޮތީ ހަމަ ދުރުހެލިވުމެވެ.
- އިސްލާމީ ތިލަފަތުގެ ދަރުސަކުން
