މިއަދު މީސްތަކުންގެ ގިނަ ބައަކު ހަލާކުގެ ތެރެއަށް ވެއްޓި އާޚިރަތް ނަގާލަމުން އެދަނީ އެކުގައި އުޅެވޭ މީހުންގެ ސަބަބުންނެވެ. ވީމާ އެކަމަށް ސަމާލުކަން ނުދީ އާޚިރަތް ލިބޭނެ ކަމަށް ވިސްނައިގެންވެސް ނުވާނެއެވެ.
ﷲ ތަޢާލާ ވަޙީކުރައްވަވާފައިވަނީ އެކަލާނގެއަށްޓަކައި ދުރުވާންޖެހުނު ކޮންމެ މީހަކާއި ދުރުހެލިވެ އެމީހަކާއި ވަކިވެގަތުމަށެވެ. އެކަމުގެ ތިމާ އެންމެ ލޯބިވާ މީހަށްވެސް ބެލުމެއް ނެތެވެ. އަނބިދަރިންނަށް ނުވަތަ މައިންބަފައިންނަށްވެސް ބެލުމެއް ނެތެވެ. އޮތީ އަވަހަށް އެމީހަކާއި ދުރުހެލުވުމެވެ.
ﷲ ތައާލާގެ ވަޙީބަސްފުޅު މިއޮތީއެވެ.
"އެއުރެން ބުނެތެވެ. ތިމަންމެން ކިޔަމަންވަމުއެވެ. ފަހެ، އެއުރެން ކަލޭގެފާނުގެ އަރިހުން ނުކުމެއްޖެނަމަ، އޭގެތެރެއިން ބަޔަކު ކަލޭގެފާނު ވިދާޅުވާގޮތް ނޫންގޮތަކަށް ރާވައެވެ. އެއުރެން ރާވާގޮތް ﷲ ލިޔުއްވަތެވެ. ފަހެ، ކަލޭގެފާނު އެއުރެންނާ ދުރުހެލިވެ ވަޑައިގަންނަވާށެވެ! އަދި، ﷲ އަށް ވަކީލް ކުރައްވާށެވެ! ވަކީލަކު ކަމުގައި ﷲ ފުދެއެވެ." (އައްނިސާ: 81)
ފުރަތަމަ މިއޮތީ އެމީހުން ކަންކަން ކުރާނެ ގޮތުގެ ވާހަކައެވެ. ""އެއުރެން ބުނެތެވެ. ތިމަންމެން ކިޔަމަންވަމުއެވެ. ފަހެ، އެއުރެން ކަލޭގެފާނުގެ އަރިހުން ނުކުމެއްޖެނަމަ، އޭގެތެރެއިން ބަޔަކު ކަލޭގެފާނު ވިދާޅުވާގޮތް ނޫންގޮތަކަށް ރާވައެވެ. އެއުރެން ރާވާގޮތް ﷲ ލިޔުއްވަތެވެ."
މިއުޅޭ ޙީލަތްތެރިން ބުނާނީ އެމީހުން ﷲ ތަޢާލާއަށް ކިޔަމަންތެރިވާކަމަށެވެ. މަސައްކަތްމިކުރަނީ ﷲ ތަޢާލާގެ ދީން ފަތުރަން ކަމަށެވެ. މީސްތަކުންނަށް މިގޮވައިލަނީ ﷲ ތަޢާލާގެ މަގަށް ކަމަށެވެ. އެމީހުން މިއުޅެނީ އެހެން މީހުންގެ އަތުގައި ހިފައި ދަމައިގެންވެސް ނަރަކައިން ސަލާމަތްކުރުވޭތޯ އާއި ކޮއްޕައިގެން ނަމަވެސް ސުވަރުގެ ވެއްދުވޭތޯ ކަމަށެވެ.
އެކަމަކު އެނބުރިލާފައި އެމީހުން ޤުރްއާނަށް ގޮންޖަހާނެއެވެ. ﷲ ތަޢަލާގެ ޙުކުމްފުޅުތައް ދެކެ ބިރެއް ނުގަންނާނެއެވެ. ﷲ ތަޢާލާގެ ޙުކުމްފުޅުތަކަށް ޢަމަލެއްވެސް ނުކުރާނެއެވެ. ދައްކާނީ ކޮންމެވެސް ބަހަނާއެކެވެ. އެމީހުން ކަންކަން ރާވާނީ އެމީހުންނަށް ވިސްނޭ، އެމީހުންނަށް އެންމެ ފައިދާބޮޑުވާނެ ގޮތްތަކަށެވެ.
ދެން މިއޮތީ މުސްލިމުން ޢަމަލުކުރަން ﷲ ތަޢާލާ އެންގެވި ގޮތެވެ. "ފަހެ، ކަލޭގެފާނު އެއުރެންނާ ދުރުހެލިވެ ވަޑައިގަންނަވާށެވެ! އަދި، ﷲ އަށް ވަކީލް ކުރައްވާށެވެ! ވަކީލަކު ކަމުގައި ﷲ ފުދެއެވެ."
ﷲ ތަޢާލާއަށް ބިރުވެތިވާ މީހާ މިއާޔަތަށް ޢަމަލުކުރާށެވެ! ﷲ ތަޢާލާގެ މަގުގައި ފައިތިލަތައް ޘާބިތުކުރަން ހުރަސް އަޅައި، ﷲ ތަޢާލާގެ ޙުކުމްފުޅުތަކަށް ޢަމަލު ނުކުރާ، އިސްލާމް ދީން ނޫން އެހެން ދީންތައް ތިއަބައިމީހުންގެ ތެރެއަށް ގެންނަން މަސައްކަތްކުރާ އެންމެންނާއި ދުރުހެލިވާށެވެ! އެކަމުގައި އެއްވެސް މުސްލިމަކަށް އެއްވެސް "ޗޮއިސް"އެއް ނެތެވެ. އެހެން ގޮތަކަށް ޢަމަލުކުރަން އިޚްތިޔާރުކުރެވޭނެ އެއްވެސް ގޮތެއްވެސް ނެތެވެ.
- ޝައިޚް ޢަލީ ޙައްމުދާގެ ދަރުސަކުން
