އަހުރެން މިވާހަކަ ވަރަށް ގިނައިން ކިޔައިދެމެވެ. އެއީ މިވަރަށް ކިޔައިދޭއިރުވެސް ގިނަ ބައަކަށް ނުވިސްނޭތީއެވެ. މިރޭވެސް އަޑުއަހާށެވެ!
މުސާގެފާނަށް އާލާސްކަންފުޅެއް ޖެހިވަޑައިގަތުމުން ﷲ ތަޢާލާގެ ޙަޟްރަތުގައި އެވާހަކަ ދެންނެވިއެވެ. ވަޙީކުރެއްވެވީ މިވެނި ބާވަތެއްގެ ފަތް ފަރިއްކުޅުއްވެވުމަށެވެ. އެފަތް ފަރިއްކޮޅުއްވެވުމުން ޝިފާ ލިބިވަޑައިގެންނެވިއެވެ.
ދެވަނަ ފަހަރު އާލާސްކަންފުޅު ޖެހުމުން ވަޑައިގެން ހަމައެފަތް ފަރިއްކުޅުއްވެވިއެވެ. ނަމަވެސް ޝިފާ ލިބިވަޑައެއް ނުގަތެވެ.
މިވީ ކިހިނަކުން ހެއްޔެވެ؟ އާލާސްކަންފުޅު ޖެހިވަޑައިގަތުމުން ﷲ ތަޢާލާގެ ޙަޟްރަތުގައި ނުދަންނަވައި އަމިއްލަފުޅަށް ވަޑައިގެން ފަތް ފަރިއްކުޅުއްވެވީއެވެ. އެހެން ނުވާނީ ކީއްވެގެން ހެއްޔެވެ؟ އެފަތަކީ އެއްވެސް ބާރެއް ހުރި އެއްޗެއް ނޫނެވެ. ޝިފާ ލިބިވަޑައިގަތީ ފަތުގެ ސަބަބަކުން ނޫނެވެ. ޝިގާ ލިބިވަޑައިގަތީ އެފަތް މެދުވެރިކުރައްވަވައި ﷲ ތަޢާލާ ޝިފާ ދެއްވެވުމުންނެވެ.
މީސްތަކުންނޭވެ! ބަލިވެއްޖެނަމަ ސަބަބުތަކުގައި ހިފައިގެން ޝިފާ ލިބިގަންނަން މަސައްކަތްކުރާށެވެ! ނަމަވެސް ފުރަތަމަ ކުރަންއޮތް ކަންތައް ފުރަތަމަ ކުރާށެވެ. އެއީ ޝިފާދެއްވެވުން އެދި ﷲ ތަޢާލާގެ ޙަޟްރަތުގައި ދެންނެވުމެވެ.
- ދުޝާމާ އަލްޝުރަފާގެ ދަރުސަކުން
