ބައެއް މީހުންނަށް ވިސްނެނީ ތިމާ ކޮންމެ ގޮތަކަށް އުޅުނަސް ތިމާއަށް ބޭނުންވާ ކަންކަން ﷲ ތަޢާލާ ހިންމަވައި ދެއްވަވަނީ ތިމާއަށް އުޅެވޭ ގޮތާއިމެދު ﷲ ތަޢާލާ ރުހިވޮޑިގަންނަވާތީ ކަމަށެވެ. ނަމަވެސް އެއީ އެއްވެސް ޙާލެއްގައި ރަނގަޅު ވިސްނުމެއް ނޫނެވެ.
ދުނިޔެ ނިމި ޤިޔާމަތްވުމުގެ ތާޅަފިލި އިސްރާފީލްގެފާނު ފުމެލައްވަވާނީ ދުނިޔޭގައި އެއިރު ތިބޭ އެންމެންގެމައްޗަށް ﷲ ތަޢާލާ ކޯފާވެވޮޑިގަތުމުންނެވެ. އެއެންމެންނަށް ޢަޛާބް ޙައްޤުވުމުންނެވެ. ވީމާ މިއަދު އަހަރެމެންނަށް ދުނިޔޭގައި މިތިބެވެނީ ﷲ ތަޢާލާ އަހަރެމެންނަށް ރަޙުމްކުރައްވަވާތީއެވެ.
ކިތަންމެ ދަތިޙާލުގައި އުޅެންޖެހިފައިވީނަމަވެސް ﷲ ތަޢާލާއަށް ޝުކުރުވެރިވާންޖެހެނީ އެ ސަބަބަށްޓަކައެވެ. ﷲ ތަޢާލާގެ ރަޙްމަތް އަހަރެމެންގެމައްޗަށްވާތީއެވެ. ވީމާ މީހަކު ސުވާލުކޮށްފިނަމަ އަލްޙަމްދުލިﷲ، ނުވަތަ ޝުކުރު އަލްޙަމްދުލިﷲ ނޫން ބަހެއް ނުބުނާށެވެ!
ﷲ ތަޢާލާގެ ރަޙްމަތަށް އުންމީދުކުރާ މީހާ ދެކަމެއްގައި ސާބިތުވާންޖެހޭނެއެވެ. އެއީ ތަޤްވާވެރިކަމާއި ވެވުނުވަރަކުން ޞަދަޤާތް ކުރުމުގެ އިތުރަށް ޒަކާތް ދިނުމުގައެވެ. އެއިރުން އެމީހަކީ ﷲ ތަޢާލާގެ ރަޙްމަތް ޙައްޤުވާ އަޅެއްކަމުގައި ލިޔުއްވަވާނެތެވެ. އިން ޝާ ﷲ
މީސްތަކުންނޭވެ! ތިމާއަށް ރަހްމަތް ލެއްވެވުން އެދޭމީހާ ތަޤްވާވެރިވާށެވެ! ތަޤްވާވެރިވުމަކީ ﷲ ތަޢާލާ ރުހިވޮޑިނުގަންނަވާނެ އެއްވެސް ކަމެއް ނުކުރުމެވެ. އަދި ﷲ ތަޢަލާ ދެކެ ލޯބިވުމަކީވެސް ހަމައެއީއެވެ. ﷲ ތަޢާލާގެ ކޯފާއަށް ބިރުވެތި ނުވެވޭނަމަ އެމީހެއްގެ ހިތުގައި ﷲ ތަޢާލާއަށް ލޯބިވާކަމަކަށް ނުބުނެވޭނެއެވެ. އެހެނީ އެމީހަކު ޙަޤީޤީ ލޯބިވާ އެއްވެސް މީހަކު ރުޅިއަންނާނެ އެއްވެސް ކަމެއް ހަމައެކަކުވެސް ނުކުރާނެތީއެވެ! ވީމާ ފާފަކުރުން ހުއްޓާލަން ނުވަތަ ފާފަތަކާއި ދުރުހެލިވެ ހުރުމަށް ކުރަން އޮތް އެންމެ ފައިދާހުރި ކަމަކީ ﷲ ތަޢާލާގެ ޙަޟްރަތަށް ލޯބިވުން އިތުރުކުރުމެވެ. ލޯބިވާން އޮތް ގޮތަށް ލޯބިވުމެވެ.
--މުފްތީ މެންކުގެ ދަރުސަކުން
