ޢާއިޝަތު ރަފާޙް ޢަލީ
ޝެއިޚް! ދޮރުތަކާއި ކުޑަދޮރުތައް ބަންދުކުރުމުގެ މުހިންމުކަމާއި، ނުވަތަ އެތަންތަނުގައި ފަރުދާ އެޅުމުގެ މުހިންމުކަން ބަޔާންކޮށްދެއްވާށެވެ. އަދި މި ސުންނަތް ދޫކޮށްލުމުގެ ގެއްލުންތަކަކީ ކޮބައިތޯ؟
ޖަވާބު:
ނަބިއްޔާ ޞައްލަﷲ ޢަލައިހިވަސައްލަމަގެ ޙަދީޘްފުޅެއް، ބުޚާރީއާއި މުސްލިމް އަދި އެހެން ބޭކަލުން ރިވާކުރައްވާފައިވެއެވެ. އެކަލޭގެފާނު ޙަދީޘްކުރެއްވިއެވެ: "ތަށިތަކުގައި ނިވައިކުރާށެވެ. ހަމުގެ ފެންތާނގިތައް ބަންދުކުރާށެވެ. ދޮރުތައް ލައްޕާށެވެ. ބައްތިތައް ނިއްވާލާށެވެ. އެހެނީ ޝައިޠާނާ ފެންތާނގި ނުހުޅުވައެވެ. ބަންދުކޮށްފައިވާ ދޮރެއް ނުހުޅުވައެވެ. އަދި ނިވައިކޮށްފައިވާ ތަށްޓެއް ނުހުޅުވައެވެ."
މިފަދަ ގިނަ ޙަދީޘްތަކެއް ވެއެވެ. މި ހުރިހާ ޙަދީޘްތަކުންވެސް ބަޔާންކުރަނީ އިރުއޮއްސި، ރޭގަނޑުވުމުން އަޅުގަނޑުމެން ކުރަންޖެހޭ ކަންތައްތަކެކެވެ. މި ހުރިހާ ކަމެއްވެސް ދައުރުވަނީ ޝައިޠާނުންނާއި ޖިންނީންގެ ކިބައިން އަޅުގަނޑުމެން ރައްކާތެރިކުރުމުގެ މައްޗަށެވެ.
މިކަން ނަބިއްޔާގެ ޙަދީޘްފުޅުން ވިސްނައިގަނެވެއެވެ. މީހަކު ގެއަށް ވަދެ، ގޭގެ ދޮރު ލައްޕައި، ބިސްމިކިޔާ ހިނދު، ޝައިޠާނާ އޭނާގެ އެކުވެރިންނަށް ބުނެއެވެ: "މިތާ އަޅުގަނޑުމެންނަށް ނުހޭދަކުރެވޭނެއެވެ." އަދި އޭނާ ރޭގަނޑުގެ ކެއުން ކައި، ބިސްމިކިޔާ ހިނދު، ޝައިޠާނާ އޭނާގެ އެކުވެރިންނަށް ބުނެއެވެ: "އަހުރެމެންނަށް ކެއުމާއި ނިދުމުގެ ޖާގަ ގެއްލިއްޖެއެވެ."
ހަމައެފަދައިން ދޮރުތައް ލެއްޕުމާއި، ފެންތާނގިތައް ބަންދުކުރުން ފަދަ ކަންކަމުންވެސްމެއެވެ.
ނަމަވެސް، ޢިލްމުވެރިން ވިދާޅުވަނީ މި ހުރިހާ ކަމަކީވެސް އިސްތިޙްބާބު (ބާރުއަޅުއްވާފައިވާ) ކަންކަން ކަމަށެވެ. ވާޖިބު ކަންކަމެއް ނޫނެވެ. އެހެންކަމުން ތަށި ނިވައިނުކުރިޔަސް މައްސަލައެއް ނެތެވެ. އެއީ ޙަރާމް ކަމެއް ނޫނެވެ. ދޮރުތައް ނުލައްޕައި، ކުޑަކޮށް ހުޅުވާފައި ބެހެއްޓިޔަސް މައްސަލައެއް ނެތެވެ. އެއީ ޙަރާމް ކަމެއް ނޫނެވެ. އެހެނަސް ތިބާ ސުންނަތާ ޚިލާފުވަނީއެވެ.
ކުޑަދޮރުތަކާ ބެހޭގޮތުން، އެއްވެސް ޙަދީޘެއްގައި އޭގެ ޒިކުރު އަހުރެންނަކަށް ނުފެނުނެވެ. ނަމަވެސް ގިނަފަހަރަށް ޢިލްމުވެރިން އެއީ ދޮރުތަކާ އެއްފަދަ ތަންތަން ކަމަށް ދެކެވަޑައިގަންނަވައެވެ. އެހެނީ އެއީވެސް މީހުން ގެއަށް ވަދެނިކުމެވާ ތަންތަނެވެ. އެހެނަސް ފަރުދާ އެޅުމާ ނުވަތަ ކުޑަދޮރުތައް ލެއްޕުމާ ބެހޭގޮތުން އެއްވެސް ޒިކުރެއް ނެތެވެ. އެވަނީ ހަމައެކަނި ދޮރުތަކާ ބެހޭގޮތުންނެވެ. އެހެންކަމުން ގިނަފަހަރަށް ރަށްފުށުގެ މީހުންނާއި، ނުވަތަ ސިޓީތަކުގައި މޫސުން ރަނގަޅުވާ ދުވަސްވަރު އެއަރކޮންޑިޝަން ނުޖަހައި، ތާޒާ ވައި ވަނުމަށް ކުޑަދޮރުތައް ހުޅުވާފައި ބަހައްޓައެވެ. އެކަމުގައި އެއްވެސް މައްސަލައެއް ނެތެވެ.
