ބައެއް މީހުންނަށް ވިސްނިފައި އޮންނަނީ ﷲ ތަޢާލާއަށް ދެންނެވުމަކީ ކަމަކަށް ބޭނުންވުމުން އެކަނި ކުރަންޖެހޭ ކަމެއް ކަމަށެވެ. ނަމަވެސް އެއީ ރަނގަޅު ވިސްނުމެއް ނޫނެވެ.
ﷲ ތަޢާލާއަށް ޙަމްދުކޮށް ޛިކުރުކުރުމާއި ލިބިފައިވާ ނިޢުމަތަށް ޝުކުރުވެރިވުމަކީ އަބަދުވެސް ކުރަންޖެހޭނެ ކަމެކެވެ. ވީމާ ތަނަވަސކްނަ ލިބި ފުދި އިތުރުވެގެން ހުންނަ ލިބުނަސް ގިނަގިނައިން ﷲ ތަޢާލާއަށް ދަންނަވާށެވެ. އުފާޗވެރިކަން ލިބި އަބަދު ހިނިތުންވެގެން ހުންނަން ލިބުނަސް ﷲ ތަޢާލާއަށް ދަންނަވާށެވެ.
ދެރަ ނިކަމެތި ޙާލަތެއް ކުރިމަތިވުމުން އަހުރެމެން ﷲ ތަޢާލާއަށް ދުޢާކޮށް ޙާލަތުގެވާހަކަ ދަންނަވަމުއެވެ. އެކަމަކުން ސަލާމަތްކުރައްވަވައި ދެއްވެވުން އެދިގެން ދަންނަވަމުއެވެ. އެހެނަސް އެއީ އެމީހާގެ ޙާލަތު ﷲ ތަޢާލާ ދެނެވޮޑިގެން ނުވާތީއެއް ނޫނެވެ. އަހުރެމެން ކޮންމެ މީހެއްގެ ޙާލަތުވެސް އަހުރެމެންނަށްވުރެ މާމޮޅަށް ﷲ ތަޢާލާ ދެނެވޮޑިގެންވެއެވެ.
އުފާވެރިކަމުގައި ހުރިނަމަވެސް ހިތްދަތިކަމުގައިހުރިނަމަވެސް ﷲ ތަޢާލާގެ މަތިން ހަނދާންކުރުން ގިނަކުރާށެވެ. ތަޤްވާވެރިކަން އިތުރުކުރަން މަސައްކަތްކުރާށެވެ. ޛިކުރުތައް ކިޔައި ގިނަގިނައިން ﷲ ތަޢާލާގެ މަތިން ހަނދުމަކުރާށެވެ. އެހެނީ އެކަންކަމަށް ﷲ ތަޢާލާ ލޯބިވެވޮޑިގެންވެއެވެ.
މިކަންކަން މިބުނިމަގުން ކުރާނަމަ ދެ ޙާލަތުގައިވެސް ﷲ ތަޢާލާ ރަހްމަތް ލައްވަވާނެތެވެ. އިން ޝާ ﷲ. ނިކަމެތިޙާލުގައިވާނަމަ އެކަމަކުން އަރައިގަނެވޭނެ މަގެއް ދައްކަވާނެތެވެ. އުފަލުގައިވާނަމަ އެކަމުގައިވެސް ބަރަކާތް ލައްވަޥާނެތެވެ. އިން ޝާ ﷲ.
ވީމާ ވިސްނަން އޮތް ކަމަކީ ކޮންމެ ޙާލަތެއްގައި އުޅެންޖެހުނު ނަމަވެސް އަބަދުވެސް ހުންނަން ޖެހޭނީ ﷲ ތަޢާލާގެ މަތިން ހަނދުމަކުރުމުގައި ކަމެވެ. އުފާވެރިކަމުގައިވެސް އަދި ދަތިޙާލުގައިވެސް އޮތީ ޙަމްދުކޮށް ޝުކުރުވެރިވުންކަމެވެ.
- މުފްތީ މެންކުގެ ދަރުސަކުން
