އަހަރެމެން މިހާރުމިކުރާ ކަމަކީ ނަމާދު ނިމުމާއިއެކު އަވަސްއަވަހަށް ފައިބައިގެން ދިއުމެވެ. ގިނަ ބައަކު އެންމެ މަދުމިނުން ޛިކުރުކޮށްލައިގެން ދަނީއެވެ. އަނެއް ބައަކު ސަލާމް ދިނުމާއިއެކު އެއްވެސް މިންވަރަކަށް ޛިކުރުނުކޮށްވެސް ފައިބައިގެންދަނީއެވެ.
އެހެން ނުހަދާށެވެ! ނަމާދަށްފަހު ޛިކުރުކޮށް، ރަވާތިބު ސުންނަތްކޮށް ނިމިގެން ހަމައެކަނި ﷲ ތަޢާލާގެ މަތިން ހަނދުމަކޮށްލުމުގެ ބޭނުމުގައި މަޑުކޮށްލާށެވެ! އަދި އެކަން ކޮންމެ ދުވަހަކުވެސް ކުރަން މަސައްކަތްކުރާށެވެ!
މިސްކިތްތަކުގައި ތިބެ ﷲ ތަޢާލާގެ މަތިން ހަނދުމަކުރުމަކީ ހާދަމަތިވެރި އަޅުކަމެކެވެ. މީސްތަކުން އެއްވެ ތިބެ ﷲ ތައާލާގެ މަތިން ހަނދުމަކޮށް ޛިކުރުކުރާ ނަމަ އެކަމަށް ﷲ ތަޢާލާ ފަޚުރުވެރިވެވޮޑިގެން އެކަން ޖިބްރީލްގެފާނަށް އަންގަވަތެވެ. އަދި ހަމަ އެހިނދު ޖިބްރީލްގެފާނު އުޑުތަކުގައި އިޢުލާނު ކުރައްވަވައި އެތައް ޓްރިލިއަން ޓްރިލިއަން މަލާއިކަތުންނަށް އެކަން އަންގަވަތެވެ. އެހިނދު ތިބާގެ ނަން އެދަނީ އުޑުތަކުގައި އިއުލާނުކުރެވިގެންނެވެ. ﷲ ތައާލާ ލޯބިވެވަޑައިގަންނަވާ އަޅެއްގެ ގޮތުގައެވެ.
އަހަރެމެން އުންމީދުކުރަންވީ އަހަރެމެން މިތިބަ މަޖިލީހުގައި ތިބި އެންމެންނަށްވެސް ﷲ ތަޢަލާގެ ލޯބިވެވޮޑިގަތުން ލިބި އުޑުތަކުގައި އަހަރެމެންގެ އެންމެންގެ ނަންނަތައްވެސް ﷲ ތަޢާލާ ލޯބިވެވޮޑިގަންނަވާ އަޅުންގެ ގޮތުގައި ޖިބްރީލްގެފާނު އިއުލާނުކޮށްދެއްވަވާނެ ކަމަށެވެ.
- އިމާމް ޢުމަރު ސުލައިމާންގެ ދަރުސަކުން
