މީސްތަކުންނޭވެ! ތައުބާވުމަށް ﷲ ތަޢާލާ ލޯބިފުޅުވެވޮޑިގަންނަވާ ވަރާއިމެދުގައި ނިކަން ވިސްނައިލަބަލާށެވެ!
އެންމެހައި އިންސާނުންގެ ބައްޕަ ކަމުގައިވި އާދަމްގެފާނަށް އެބޮޑު ފާފަކުރެއްވެވުމުން މިކުރެއްވެވުނީ ބޮޑުވެގެންވާ ފާފައެއްކަމާއި ﷲ ތަޢާލާ ފާފަ ފުއްސަވައިދެއްވެވުމުން ނޫނީ އެއްވެސް ސަލާމަތްކަމެއް ނެތްކަން އާދަމްގެފާނަށް ޤަބޫލުފުޅު ކުރެއްވެވުނު ހިނދު ﷲ ތަޢާލާ މިންވަރުކުރެއްވެވިގޮތް ނިކަން ދެކިބަލާށެވެ!
އިޚްލާޞްތެރިކަމާއިއެކު ޢާދަމްގެފާނު ތައުބާވެވަޑައިގަންނަވަން ބޭނުންފުޅުވެވަޑައިގަތުމުން ތައުބާވެވަޑައިގަތުމަށް ވިދާޅުވީ ކަލިމަތައް ނުވަތަ ޢިބާރާތްވެސް އާދަމްގެފާނަށް އުނގަންނަވައި ދެއްވެވީ ﷲ ތަޢާލާއެވެ. އެކަމުންވެސް އެނގެންދަނީ ކޮންމެ މީހަކަށްވެސް ފާފަކުރެވޭނެ ކަމާއި ފާފަކުރެވުމުން އިޚްލާޞްތެރިކަމާއިއެކު ތައުބާވާން އެދޭމީހާއަށް ﷲ ތަޢާލާގެ ރުހިވޮޑިގަތުން ލިބޭނެ މިންވަރެވެ.
މީސްތަކުންނޭވ! ތައުބާވުމަކީ ބޮޑުކަމެއްކަމަސް އެއްގޮތަކަށްވެސް ހީނުކުރާށެވެ! ކޮށްލަންޖެހޭ ހަމައެކަނި ކަމަކީ މީހާ އިޚްލާޞްތެރިކަމާއިއެކު ތައުބާވާން ބޭނުންވުމެވެ. އެއިރުން ﷲ ތަޢާލާ އެމީހަކަށް އެކަމަށް މަގުފަހިކުރައްވަވައިދެއްވަވާނެތެވެ. އެފަދައިން މީހާ ތައުބާވެއްޖެނަމަ ވަގުތުން ތައުބާ ޤަބޫލުފުޅުކުރައްވަވާނެތެވެ. އިން ޝާ ﷲ
ގިނަގިނައިން ތައުބާވާ މީހާދެކެ ﷲ ތަޢާލާ ލޯބިފުޅުވެ ވޮޑިގެންވެއެވެ. ވީމާ ރަމަޟާންމަހަށްފަހުގައިވެސް ގިނަގިނައިން ތައުބާވާ މީހަކަށްވާށެވެ! ކޮންމެ ދުވަހަކީވެސް އެނގިގެންނާއި ނުއެނގި އެތައް ފާފަތަކެއް ކުރެވޭނެ ދުވަހަކަށްވާތީއެވެ.
- ޝައިޚް އަބޫބަކުރު ޒައުދުގެ ދަރުސަކުން
