ހަނދާންކޮށްލަންވީ ހަމަ އެންމެ ކަމަކަށެވެ. މީސްތަކުންނަސް އެހީތެރިވުންމަތީގައި މީހަކު ހުރިނަމަ އެމީހަކަށް އެހީތެރިވެވޮޑިގަތުންމަތީގައި މާތް ﷲ ވޮޑިގެންވާ ކަމެވެ. އިތުރު ކަމަކަށް ވިސްނާލަންވީ މުސްކުޅިންނަށާއި ހުވަފަތް އަންހެނަކަށް އެހީތެރިވުމުން އެމީހަކަށް ދެއްވަވާނެކަމަށް ޙަދީޘްފުޅުން އެނގެން އޮތް ބޮޑު ރަޙްމަތަށެވެ.
ކަމަކަށް ދަތިވެގެން ހުރިނަމަވެސް ދަތިޙާލުގައި ހުރި މީހަކަށް އެހީތެރިވާށެވެ! ޚާއްޞަކޮށް ހުވަފަތް އަންހެނުންނަށާއި ޔަތީމްކުދިންނަށް އެހީތެރިވާށެވެ. އިން ޝާ ﷲ އެމީޙެއްގެ ބޭނުން ﷲ ތަޢާލާ ފުއްދަވައި ދެއްވަވާނެތެވެ.
ތިރީގައިވާ ވާހަކައިން ޢިބްރަތް ޙާޞިލްކުރައްވާށެވެ!
އަޅުގަނޑު މިކިޔައިދޭ ވާހަކަ އެހައި ފަސޭހައިން ބައެއް މީހުންނަށް ޤަބޫލުނުކުރެވިދާނެއެވެ. ނަމަވެސް މިއީ މިކަން ހަމަ ހިނގި ގޮތެވެ.
އަޅުގަނޑުގެ މަންމަ އާއި ބައްޕައަށް ލިބުނީ އަޅުގަނޑު އެކަންޏެވެ. ވަރަށް ކުޑައިރު ބައްޕަ ނިޔާވެއްޖެއެވެ. މަންމަ ދެވަނަ ކައިވެންޏެއް ނުކުރެއެވެ. އަޅުގަނޑު ގެންގުޅެ ބޮޑުކުރީ މަންމައެވެ. އަޅުގަނޑުގެ އުމުރުން 22 އަހަރުގައި މަންމަ ނިޔާވެއްޖެއެވެ.
މަންމަ ނިޔާވުމުން ގޭގައި އުޅުނީ އެކަންޏެވެ. ކައިވެނިކުރާނެ މީހަކު ނުވިއެވެ. އެއީ މޫނުގައި ބޮޑު ދެލައް އިންނާތީ ސިފަހުތުރުކަމުންނެވެ. އެހެންވެ ބައްދަލުވާ އެކަކުވެސް އަޅުގަނޑާއި ކައިވެނިކުރަން އެއްބަސްނުވަނީއެވެ. ފޫހިވީވަރުން ފިރިއަކު ލިބޭތޯ މަސައްކަތްކުރުންވެސް ހުއްޓައިލީމެވެ.
އެއްރެއެއްގެ އިރާކޮޅެވެ. އެއީ ފިނިގަދަ ރެއެކެވެ. މަގުމަތީގައި އިށީނދެއިން މުސްކުޅި އަންހެނަކު ފެނުމުން ކުއްލިއަކަށް މަންމަ މަތިން ވަރަށް ބޮޑަށް ހަނދާންވިއެވެ. އެހެންވެ އޭނާ އާއި ވާހަކަދައްކައިލުމުން އެނގުނީ ދަރިން ބޮޑެތިވުމުން ރަނގަޅު ނޫން ގޮތްގޮތަށް ގޭގައި އުޅޭތީ އެކަންކަން އިޞްލާޙްކުރަން ބުނާތީ ގެއިން ނެރެލާފައި އިން އަންހެނެއް ކަމަށެވެ.
ވަގުތުން އަޅުގަނޑާއިއެކު ގެއަށްދާން ދައުވަތުދިނީމެވެ. އޭނާ އެކަން ޤަބޫލުކޮށް އަޅުގަނޑާއި ގެއަށް ދިއުމުން މަންމައަކަށް ފަދައިން ޚިދުމަތްކުރީމެވެ. ގޭގެ އެއްވެސް މަސައްކަތެއްވެސް ކުރާކަށް ނުޖައްސަމެވެ. ކައްކަންވެސް ނުޖައްސަމެވެ. ލާހެދުންވެސް ދޮވެދެމެވެ.
އެއްރޭ ކައިނިމިގެން ޥާހަކަދައްކަން ތިބެފައި އަޅުގަނޑު އެންމެ ބޮޑަށް އެދޭކަމަކީ ކޮބައިތޯ ސުވާލުކުރުމުން ބުނެވުނީ ހެޔޮލަފާ ތަޤްވާވެރި ފިރިއެއްގެ ވާހަކައެވެ. އެއީ އެކަނި ދިރިއުޅުމަކީ ފަސޭހަކަމަކަށްނުވެފައި ކޮންމެ މީހަކަށްވެސް އެހީތެރިއަކަށް ބޭނޭނުންވާނެތީއެވެ. އެހެން ބުނެފައިވެސް މޫނު ދައްކާފައި އަޅުގަނޑަށް އޮތް ހުރަހުގެ ވާހަކަ ކިޔައިދިނީމެވެ.
އޭނާ ބުނީ އުންމީދު ކަނޑާނުލައި ދުޢާކުރާށެވެ. އަދި އޭނާވެސް ދުޢާކޮށްދޭނެ ކަމަށެވެ. ބޭއިޚްތިޔާރުގައި ނަމަވެސް "އިރާދަކުރެއްވިއްޔާ ކުރިއަށް އޮތް 40 ދުވަސް ތެރޭގައި މިގޭގައި ކުލަބޮކި ދިއްލައިލެވޭނެ" ކަމަށްވެސް އޭނާއަށް ބުނެވުނެވެ. އަޅުގަނޑަށް ހެވުނެވެ. އަޅުގަނޑަށް ބުނެވުނެވެ. "ދިއްލާނީ ބޮޑެތި އުށްބައްތިދޯއެވެ!"
ކޮންމެއަކަސް އެއިގެ ދެހަފްތާއެއްހައި ދުވަސްފަހުން އެއާކޯން މައްސަލައެއް ޖެހިގެން މަރާމާތުކުރަން ކުންފުންޏަކަށް ގުޅީމެވެ. ކުންފުނިން 2 ޓެކްނީޝަނުން ފޮނުވިއެވެ. އެތަނުން އެކަކު އަޅުގަނޑުގެ ނަންބަރު ބޭނުންކަމަށް ބުނީމާ ނަންބަރުދިނީމެވެ. ދަމުން ވަރަށް ސިއްރުން ބުނީ ދެން މައްސަލައެއް ޖެހިއްޖެނަމަ އޭނާއަށް ގުޅުމަށެވެ. އެހެންވެ އެނަންބަރު ސޭވްކުރީމެވެ.
ދެދުވަހެއް ފަހުން އެއްރޭ އޅުގަނޑަށް ގުޅައި ވާހަކަދެއްކިއެވެ. ރައްޓެހިކަން ބާއްވަން ބޭނުން ކަމަށް ބުންޏެވެ. އަޅުގަނޑުވެސް އެކަން ޤަބޫލުކުރީމެވެ. ކޮންމެއަކަސް އެގުޅުން ކުރިއަށް ގޮސް މަސް ނިމުނުއިރު ދެމީހުންގެ ކައިވެނި ކުރެވިއްޖެއެވެ. ލަކުނާބެހޭ ގޮތުން އެއްވެސް ވާހަކައެއް އޭނާ ނުދައްކައެވެ.
އެކައިވެނީގައި މިހާރު 20 އަހަރުވީއެވެ. 4 ދަރިންވެސް ލިބިއްޖެއެވެ. އޭނާ ފަދަ އަނބިމީހާއަށް ހެޔޮ ފިރިއަކު މަދުވާނެއެވެ.
މިވާހަކަ މިކިޔައިދިނީ އެންމެ ބޭނުމަކުއެވެ. އެއީ ހުވަފަތްވެފައި ތިބޭ އަންހެނުންނަށް ހެޔޮކޮށް ހިތުމުގެ މުހިންމުކަން ފާހަގަކޮށްލާށެވެ. އަޅުގަނޑަށް ޤަބޫލުކުރެވެނީ އަޅުގަނޑަށް ކައިވެނި ނުކުރެވި ހުއްޓައި ކައިވެނިކުރެވޭނެ ގޮތް މެދުވެރިކޮށްދެއްވެވެވީ އެއަންހެން މީހާއަށް ހެޔޮކޮށް ހިތުމުން އޭނާ އަޅުގަނޑަށްކޮށްދިން ދުޢާއިން ކަމަށެވެ. މޮޅަށް ދެނެވޮޑިގެންވާނީ ﷲ އެވެ.
- ޝަމްސް / ލާހޯރު، ޕާކިސްތާން
- ޢިބްރަތްތެރި ވާހަކަ
