ޢާއިޝަތު ރަފާޙް ޢަލީ
ލިބިޔާގެ އުންމު އިޞާމް އެވެ! ﷲ ތިޔަބާފުޅަށް ބަރަކާތް ލައްވައި، ހިތްޕުޅަށް ތަނަވަސްކަން ދެއްވައި، ކަންކަން ފަސޭހަކޮށްދެއްވުމާ އެކު، ޝައިތާނާގެ ވަސްވާސްތަކުން ސަލާމަތްކޮށްދެއްވުން އެދި ދުޢާކުރަމެވެ. ނަމާދުތަކަށް ރައްކާތެރިވެ، ޛިކުރުތައް ކުރާއިރުވެސް ތަކުރާރުކޮށް ހިތްނުތަނަވަސްވެ، މާޔޫސްވެގެން ރޮވޭ ސަބަބާ ބެހޭގޮތުން ތިޔަ ކުރެއްވި ސުވާލުގެ ޖަވާބުގައި ދަންނަވަމެވެ.
ލޮބުވެތި އުޚުތާއެވެ! އެންމެ ފުރަތަމަ އަޅުގަނޑުމެން ދަންނަންޖެހޭ ޙަޤީޤަތަކީ، ދުނިޔަވީ ދިރިއުޅުމަކީ ވަގުތީ ދަތުރެއް ކަމެވެ. މިއީ ދާއިމީ މަންޒިލެއް ނޫނެވެ. ﷲ ސުބުޙާނަހޫ ވަތަޢާލާ ކޮންމެ އިންސާނަކަށްވެސް ވަނީ ވަކި މުއްދަތެއް ކަނޑައަޅުއްވާފައެވެ. ދުނިޔެއާއި ދުނިޔޭގައިވާހާ ތަކެއްޗެއް ނެތިގޮސް، އެންމެންވެސް ދާނީ އާޚިރަތަށެވެ. އަޅުކަންތަކުގައި ދެމިތިބޭ މީހުންގެ ތެރޭގައިވެސް، މި ޙަޤީޤަތް ފުރިހަމައަށް ވިސްނައިގަތުމުގައި ދަތިތަކާ ކުރިމަތިވުމަކީ ހިތްނުތަނަވަސްވާ ސަބަބެކެވެ. މިކަމާމެދު ފުންކޮށް ވިސްނުމަކީ ނަފްސާނީ ހަމަޖެހުން ހޯދުމަށް ކޮންމެހެން މުހިންމު ކަމެކެވެ. މިއީ އިހުމާލުވެގެންވާނެ ކަމެއް ނޫނެވެ.
ދުނިޔޭގެ ވަގުތީކަން ހިތުގެ އަޑިން ގަބޫލުކުރާ މީހަކަށް ނޫނީ ފުރިހަމަ އަމާންކަމެއް ނުލިބޭނެއެވެ. މިއަދު ފެންނަ ގިނަ ކޯޅުންތަކާއި ޚިލާފުތަކަކީ ހަމައެކަނި ދުނިޔެއަށްޓަކައި ކުރެވޭ ކަންކަމެވެ. ނަމަވެސް މާދަމާ ކޮންމެ މީހަކުވެސް މި ފަނާވަނިވި ދުނިޔެ ދޫކޮށްދާނެކަން ކަށަވަރެވެ.
އަޅުގަނޑުމެން އުފެއްދެވީ ދުނިޔެއަށްޓަކައެއް ނޫނެވެ. އޭގެ ބަދަލުގައި ދުނިޔެއަކީ ﷲ އަށް އަޅުކަންކުރުމަށްޓަކައި ދެއްވި ވަސީލަތެކެވެ. މަރު ހުއްޓުވޭނެ އެއްވެސް ބާރެއް ނުވަތަ މުއްސަނދިކަމެއް ނުވެއެވެ. އެއީ ކޮންމެ ވަގުތަކުވެސް އަތުވެދާނެ ޙަޤީޤަތެކެވެ. އިސްވެދިޔަ އުންމަތްތަކަށް ބެލިޔަސް ފެންނަން އޮތީ މި ޙަޤީޤަތެވެ. އެހެންކަމުން، މިކަން ގަބޫލުކޮށްގެން ދިރިއުޅުން ކުރިއަށް ގެންދިއުމަކީ ނަފްސާނީ ދުޅަހެޔޮކަމަށް އޮތް މަގަކަށް ވާނެއެވެ.
ދެވަނަ ކަމަކަށް، މުއުމިނުންނަކީ އާންމުކޮށް ނަފްސާނީ ގޮތުން ވަރުގަދަ ބައެކެވެ. ނަމަވެސް، ޖިސްމާނީ ބަލިތަކާއި ސިކުނޑީގެ ބަލިތައް ކުރިމަތިވުމަކީ އިންސާނަކަށް ވީތީ ވެދާނެ ކަމެކެވެ. އަޅުކަމުގެ ފޮނިކަން ލިބުމަކީ މި ދުނިޔޭގައިވާ ސުވަރުގެއެއް ފަދަ ކަމެކެވެ. އުޚުތާއެވެ! ތިޔަ އިހުސާސް ކުރެއްވޭ މާޔޫސްކަމަކީ ހަށިގަނޑުގެ ގުނަވަނަކަށް ޖެހިފައިވާ ބައްޔެއްގެ ސަބަބުން (މިސާލަކަށް: ހޯރމޯންތަކަށް އަންނަ ބަދަލެއް ނުވަތަ އެހެން ގުނަވަނެއްގެ މައްސަލައެއް) ދިމާވާ ކަމަކަށް ވެދާނެއެވެ. އެހެންކަމުން، ޑޮކްޓަރަކަށް ދައްކައި މެޑިކަލް ޗެކަޕެއް ހެއްދުމާއި، ބޭނުންވާ ނަފްސާނީ ފަރުވާ ހޯދުމަކީ ދީނީ ގޮތުން އެއްވެސް މައްސަލައެއް އޮތް ކަމެއް ނޫނެވެ.
ސިއްޙީ ގޮތުން މައްސަލައެއް ނެތްނަމަ، ދެން ވިސްނާލަންޖެހެނީ ޢާއިލީ ނުވަތަ އިޖުތިމާޢީ ކަންކަމާ މެދުގައެވެ. ދިރިއުޅުމުގައި ދަތިތަކާ ކުރިމަތިވާނެއެވެ. ނަމަވެސް ހިތާމައިގެ ތެރޭގައި ޣަރަޤުވެފައި ހުރުމަކީ އިސްލާމީ އުޞޫލެއް ނޫނެވެ. އިސްލާމްދީން ބާރުއަޅަނީ ހިތާމަތަކުން އަވަހަށް އަރައިގަނެ، އުފާވެރިކަމާއި ކުރިއެރުމަށް މަސައްކަތް ކުރުމަށެވެ. މާޒީގެ ތަދުތަކުގައި ބަނދެވިފައި ހުރުމުގެ ބަދަލުގައި، މުޖުތަމަޢަށް ފައިދާހުރި، ޙަރަކާތްތެރި މީހަކަށް ވާށެވެ.
ކީރިތި ރަސޫލާ ﷺ ގެ ދިރިއުޅުއްވުމުން އަޅުގަނޑުމެންނަށް ފެންނަނީ މި މިސާލެވެ. އެކަލޭގެފާނުގެ އެންމެ ބޮޑު އެހީތެރިޔާ ޚަދީޖަތުގެފާނު އަވަހާރަވުމުންނާއި، ގާތް ބޭފުޅުން ގެއްލިވަޑައިގަތުމުން ހިތާމަފުޅުކުރެއްވި ނަމަވެސް، ދިރިއުޅުމާއި ދީނީ ޒިންމާތައް ހުއްޓައެއް ނުލައްވައެވެ. އެކަލޭގެފާނަކީ އަބަދުވެސް އުންމަތަށް ހިތްވަރު ދެއްވި މުދައްރިސެވެ. އެހެންކަމުން، މާޔޫސްކަމުގެ ތެރޭގައި ހުއްޓިފައި ނުހުންނަވައި، ﷲ އަށް ވަކީލުކޮށް ކުރިއަށް ވަޑައިގަންނަވާށެވެ. ﷲ ތިޔަބާފުޅަށް ބަރަކާތް ލައްވާށިއެވެ.
- މިއަދުނޫސް
