ޢާއިޝަތު ރަފާޙް ޢަލީ
ތިޔަބޭފުޅުންނަކީ މާތްﷲގެ ރައްކާތެރިކަމާއި ހިމާޔަތުގެ ދަށުގައިވާ ބައެއް ކަމުގައި ވެއްޖެނަމަ، ދުނިޔޭގައި ހުންނަވާއިރު އެކަލާނގެ ދަރުމައާއި ސަވާބު ލިބިވަޑައިގަންނަވާނެއެވެ. އަދި އަވަހާރަވެއްޖެނަމަ ސުވަރުގެއަށް ވެދެވަޑައިގަންނަވާނެއެވެ. ސުބްޙާނަﷲ!
މާތްﷲގެ ހިމާޔަތުގެ ދަށުގައިވާނެކަމުގެ ޔަގީންކަން ލިބިގެންވާ ތިން ބައެއްގެ ވާހަކަ މިތަނުގައި ފާހަގަކޮށްލަމެވެ.
"މާތްﷲގެ ރައްކާތެރިކަމުގެ ދަށުގައި" ވުމަކީ ކިހާވަރެއްގެ ކަމެއްކަމާމެދު ފުންކޮށް ވިސްނާލުން ހުއްޓެވެ. މި ތިން އަމަލު ފުރިހަމަކޮށްފި މީހަކަށް، ރަސޫލާ ﷺ ވައުދުވެވަޑައިގެންފައިވާ ހުރިހާ ހެޔޮ ދަރުމައެއް ލިބިގެންދާނެއެވެ.
މިރޭ އަޅުގަނޑު ހިއްސާކޮށްލަން ބޭނުންވަނީ އަބޫ ދާއޫދު، އިބްނު ޙިއްބާން އަދި ބުޚާރީގެ އަދަބުލް މުފްރަދުގައި ރިވާވެގެންވާ ވަރަށް ރީތި ޞަޙީޙް ޙަދީޘެކެވެ.
ރަސޫލާ ﷺ ޙަދީޘްކުރެއްވިއެވެ: "ثلاثة كلهم ضامن على الله" (ތިން ބައެއްގެ ޒިންމާ މާތްﷲ އުފުއްލަވައި، އެކަލާނގެ ހިމާޔަތުގެ ދަށުގައިވެއެވެ). އެބައިމީހުން ދުނިޔޭގައި ތިބި ނަމަ މާތްﷲ ރިޒުގު ދެއްވާނެއެވެ. އަދި މަރުވެއްޖެނަމަ ސުވަރުގެއަށް ވައްދަވާނެތެވެ. އަޅުގަނޑާއި ތިޔަބޭފުޅުންނަކީވެސް މިފަދަ މީހުންގެ ތެރެއިން ވުމަށް އެދެމެވެ.
މި ތިން ބަޔަކީ ކޮބައިތޯ ބަލާލަމާ ހިނގާށެވެ:
ފުރަތަމަ މީހަކީ، ގެއަށް ވަންނައިރު ސަލާމް ގޮވާ މީހާއެވެ. މިއީ ވަރަށް ފަސޭހަ ކަމެކެވެ. މިކަމުގެ ދެ މާނައެއް އިލްމުވެރިން ބަޔާންކުރައްވައެވެ. އެއީ ގެއަށް ވަންނަ ވަގުތު ސަލާމްކުރުން، ނުވަތަ ބޭރުތެރޭގައި ފިތުނަވެރިކަން ބޮޑުވެ އެކަންކަމުން ސަލާމަތްވުމަށްޓަކައި ގޭގައި މަޑުކޮށްގެން ހުންނަ މީހާއެވެ. ރަސޫލާ ﷺ އަނަސްގެފާނަށް އިރުޝާދު ދެއްވާފައިވަނީ ގެއަށް ވަންނަ ހިނދު ގޭގެ އަހުލުވެރިންނަށް ސަލާމްކުރުމަށެވެ. ގޭގައި މީހަކު ނެތް ނަމަވެސް ސަލާމްކުރުމަކީ ގޭގައި ބަރަކާތް އިތުރުވާނެ ކަމެކެވެ. "ބިސްމިﷲ، އައްސަލާމު ޢަލައިކުމް ވަރަޙްމަތުﷲ" ބުނެލުމުން ލިބޭ ބަރަކާތާއި، އެމީހަކު މަރުވެއްޖެނަމަ ލިބޭނެ ސުވަރުގޭގެ ނިޢުމަތަކީ ކިހާ މަތިވެރި ކަމެއްތޯއެވެ!
ދެވަނަ މީހަކީ، ފަރުޟު ނަމާދު ކުރުމުގެ ނިޔަތުގައި މިސްކިތަށް ދާ މީހާއެވެ. އެމީހަކީ މާތްﷲގެ ހިމާޔަތުގެ ދަށުގައިވާ މީހެކެވެ. މިސްކިތަށް ގޮސް ނަމާދުކޮށްގެން ހެޔޮހާލުގައި ގެއަށް އަތުވެއްޖެނަމަ، ޖަމާއަތުގައި ނަމާދުކުރުމުން ލިބޭ 27 ގުނަ އިތުރު ދަރުމައާއި، ފާފަ ފުހެވި ދަރަޖަ އުފުލިގެންދާނެކަމުގެ ވައުދު އެމީހަކަށް ލިބޭނެއެވެ. އަދި މިސްކިތުގައި ހުއްޓާ ނުވަތަ އެ މަގުމަތީގައި މަރުވެއްޖެނަމަ، އެމީހަކު ސުވަރުގެ ވަންނާނެކަމުގެ އުފާވެރި ޚަބަރު ޙަދީޘްގައިވެއެވެ.
ތިންވަނަ މީހަކީ، މާތްﷲގެ މަގުގައި (ފީ ސަބީލިﷲ) ނިކުންނަ މީހާއެވެ. އާންމު ގޮތެއްގައި މި ލަފުޒުގެ މާނައަކީ ޖިހާދަށް ނިކުތުމެވެ. ނަމަވެސް އެހެން ޙަދީޘަކުން މި ލަފުޒުގެ ފުޅާ މާނަ އެނގިގެންދެއެވެ. ރަސޫލާ ﷺ ގެ އަރިހުން ހަށިގަނޑު ވަރުގަދަ މީހަކު ހިނގާފައި ދިޔަ ވަގުތު، އެމީހާގެ ހަކަތަ ޖިހާދުގައި ބޭނުންކުރެވޭނެ ނަމައޭ ޞަޙާބީން ވިދާޅުވުމުން ރަސޫލާ ﷺ ޙަދީޘްކުރެއްވިއެވެ:
އެމީހަކީ އޭނާގެ ކުޑަކުދިންނަށް ރިޒުގު ހޯދައިދިނުމަށް ނިކުންނަ މީހެއްނަމަ، އެއީ ފީ ސަބީލިﷲ އެވެ.
އެމީހަކީ އޭނާގެ ދުވަސްވީ މައިންބަފައިންނަށް ޚިދުމަތްކޮށް، އެމީހުން ބެލެހެއްޓުމަށް ނިކުންނަ މީހެއްނަމަ، އެއީވެސް ފީ ސަބީލިﷲ އެވެ.
އެމީހަކީ މީސްތަކުންގެ ގާތުގައި ސަލާމްޖެހުމުން ދުރުހެލިވެ، އަމިއްލަ ނަފްސު ފުދުންތެރިކުރުމަށް މަސައްކަތަށް ނިކުންނަ މީހެއްނަމަ، އެއީވެސް ފީ ސަބީލިﷲ އެވެ.
ނަމަވެސް، މީސްތަކުންނަށް ދެއްކުމަށާއި ބޮޑާކަން ދެއްކުމަށް ނިކުންނަ މީހާ ވަނީ ޝައިޠާނާގެ މަގުގައެވެ. އެހެންކަމުން، އާއިލާއަށްޓަކައި ނުވަތަ އަމިއްލަ ފުދުންތެރިކަމަށްޓަކައި ވަޒީފާއަށް ދާ ދިއުމަކީވެސް މާތްﷲގެ ހިމާޔަތް ލިބި، މަރުވެއްޖެނަމަ ސުވަރުގެ ލިބޭނެ ހެޔޮ އަމަލެކެވެ.
ވިސްނަވާލައްވާށެވެ! މާތްﷲގެ ރައްކާތެރިކަމުގެ ދަށުގައި ވުމަކީ ދުނިޔަވީ އެއްވެސް ބާރަކަށް ފޯރުކޮށްދެވޭނެ ކަމެއް ނޫނެވެ. ދުނިޔޭގެ އެންމެ ވަރުގަދަ ސަލާމަތީ ބާރުތަކުގެ ހިމާޔަތަށްވުރެ، މިއުއްމަތުގެ ވެރި ރަސްކަލާނގެ ރައްކާތެރިކަން މާ މަތިވެރިއެވެ.
މާތްﷲ އަޅަމެންނަކީ އަޑުއަހާ ކަންކަމަށް އަމަލުކުރާ ބައެއްގެ ގޮތުގައި ލައްވާށިއެވެ.
- ޝައިޚް މުޙައްމަދު ބާޖޫރުގެ ދަރުސަކުން
