ބަނގުރަލުގެ ވިޔަފާރިކުރާ ކަމަށް ލިބުނު މައުލޫމާތަކާއި ގުޅިގެން ކޯޓު އަމުރެއްގެ ދަށުން އއ. މަތިވެރި ގެސްޓް ހައުސް އެއް ބަލައި ފާސްކުރުމުން ގިނަ އަދަދެއްގެ ބަނގުރަލާއި ހުސްފުޅި ފެނިފައިވާ ކަމަށް ފުލުހުން ބުނެފިއެވެ. ފުލުހުން ބުނީ އެ ގެސްޓް ހައުސް އިން 70 އަށްވުރެ ގިނަ ބަނގުރާ ފުޅި އާއި ގިނަ އަދަދެއްގެ ހުސްފުޅިވެސް ފެނިފައިވާ ކަމަށެވެ.
ފުލުހުން ބުނީ މި މައްސަލައިގައި 18 އަހަރުގެ ޒުވާނަކާއި 38 އަހަރުގެ މީހަކު ފުލުހުންގެ ބެލުމުގެދަށަށް ގެންގޮސްފައިވާ ކަމަށެވެ.
ރާއްޖޭގައި ގެސްޓް ހައުސްތައް ހިންގަން ހުއްދަ ދެނީ ދިވެހިންގެ ޘަޤާފަތާއި އެއްގޮތަށް ފަތުރުވެރިން ގެންގުޅުމަށެވެ. ބަނގުރަލާއި އޫރު މަހުގެ ވިޔަފާރި ކުރުމުގެ ހުއްދަ ގެސްޓް ހައުސްތަކަށް ދީފައެއް ނުވެއެވެ.
(( "މިއަދުނޫހުން" މިޚަބަރު ކުރިން ލިޔުނުއިރު، "ފެރިދޫ ގެސްޓް ހައުސް" ކަމަށް ލިޔެވުނީ މައުލޫމާތު ލިބުމުގައި އެރި އޮޅުމަކުންނެވެ. ސައްޙަ މައުލޫމާތު ލިބުމާއެކު މިއަދުނޫހުގެ ފަރާތުން ވާނީ ޚަބަރު ރަނގަޅު ކޮށްފައެވެ. ވީމާ އެކަމަށްޓަކައި އެންމެހާ ކިޔުންތެރިންގެ ކިބައިން މާފަށް އެދެމެވެ. ))
