"މީސްތަކުންނަށް އިންޒާރު ކުރެއްވުމަށާއި، އީމާން ވެއްޖެ މީސްތަކުންނަށް އެއުރެންގެ ވެރިރަސްކަލާނގެ ޙަޟްރަތުގައި އިސްކަމާއި، މަތިވެރި މަޤާމް ހުރިކަމުގެ އުފާވެރި ޚަބަރުދެއްވުމަށް، ތިމަންރަސްކަލާނގެ އެއުރެންގެ ތެރެއިން ފިރިހެނަކަށް، ވަޙީއިއްވެވިކަން މީސްތަކުންނަށް ޢަޖައިބް އަކަށްވީހެއްޔެވެ؟ ކާފިރުވި މީހުން ބުނެފޫއެވެ. ހަމަކަށަވަރުން، މިއީ (އެބަހީ: މުޙައްމަދުގެފާނީ) ފާޅުވެ ބަޔާންވެގެންވާ ޖާދޫގަރެކެވެ." (ޔޫނުސް: 2)
ޢަޒާބުގެ ވާހަކަ ބާރަށް ދައްކަން ޖެހެއެވެ. ޢުމުރާއި ގުޅޭ ގޮތުން ދަރިންނަށްވެސް ކިޔައިދޭން ޖެއެވެ. އެހެނީ މީސްތަކުން އެންމެ ބޮޑަށް ސަމާލުކަން ދޭނީ އެމީހަކަށް ގެއްލުންވާ ކަންކަމަށެވެ. ކުށްވެރިވެ ބޮޑެތި އަދަބުތައް ލިބޭނެ ކަންކަން ކުރުމަށެވެ. ދިގު މުއްދަތަކަށް ޖަލަށް ދާން ޖެހިދާނެ ކަންކަން ކުރުމަށެވެ.
ވީމާ ނަރަކައިގައި ހުރި ގަދަފަދަ ޢަޒާބުގެ ވާހަކަ ނުދައްކައި ޤިޔާމަތް ދުވަހާއިމެދު ބިރުވެތިކުރުވުމަކީ ހަމަ އެއްގޮތަކަށްވެސް ކުރެވޭނެ ކަމެއް ނޫނެވެ. އެނޫން ގޮތަކަށް އެކަން ކުރެވޭނެ ނަމަ ރަސޫލް (ޞޢވ) އަކީ އިންޒާރު ދެއްވަވާ ބޭކަލަކު ކަމުގައި ﷲ ތަޢާލާ ނުލެއްވެވީހެވެ.
ހަމަ ބޮޑު ތެދެކެވެ. ދައްކަން ޖެހޭނީ ހަމައެކަނި ނަރަކައިގެ ބިރުވެރިކަމުގެ ވާހަކަތަކެއް ނޫނެވެ. ސުވަރުގޭގައި ލިބެންހުރި މަތިވެރި ނިޢްމަތްތަކުގެ ވާހަކަތައްވެސް ދައްކަން ޖެހޭނެއެވެ. ރަސޫލް (ޞޢވ) ފޮނުއްވެވުނީ "އީމާން ވެއްޖެ މީސްތަކުންނަށް އެއުރެންގެ ވެރިރަސްކަލާނގެ ޙަޟްރަތުގައި އިސްކަމާއި، މަތިވެރި މަޤާމް ހުރިކަމުގެ އުފާވެރި ޚަބަރުދެއްވުމަށެވެ."
މިއާޔަތަށް ބަލައިފިނަމަ ފުރަތަމަ އެވަނީ އިންޒާރު ދިނުމުގެ ވާހަކައެވެ. ވީމާ ނަރަކައިގެ ބިރުވެރިކަމުގެ ވާހަކަ ނުދައްކައި މިކަން ކުރެވޭނީ ކިހިނަކުން ހެއްޔެވެ؟
- އިސްލާމީ ތިލަފަތުގެ ދަރުސަކުން
