މުޞީބާތެއް މެދުވެރިވުމުން ނުވަތަ ހިތް ހަމަނުޖެހޭ ކަމެއް މެދުވެރިވުމުން މިހާރު މިއުޅޭ ގިނަ ބައަކަށް ﷲ ތައާލާއަށް ވަކީލުކުރުން ވެފައި އޮންނަނީ ވަރަށް ބޮޑު ކަމަކަށެވެ. ކެތްތެރިވެލުން ވެފައި އޮންނަނީ ވަރަށް ދަތި އުނދަގޫ ކަމަކަށެވެ.
އެފަދަ މީހުން އަމިއްލައަށް އެނަގައިލަނީ އެމީހުންނަށް ﷲ ތަޢާލާ ދެއްވަވާފައިވާ އެންމެ މުހިންމު އެއް ފުރުޞަތެވެ. ﷲ ތައާލާގެ ލޯބިވެވޮޑިގަތުން ލިބިގަތުމަށް އޮތް ތަނަވަސް ފުރުޞަތެވެ. އެކަން އެނގިގެން ދަނީ ކީރިތި ޤުރްއާނުގެ މިއާޔަތުންނެވެ.
"...ފަހެ، (ކަމަކާމެދު) ކަލޭގެފާނު ޢަޒުމް ކަނޑައަޅުއްވައިފިނަމަ، ފަހެ، ކަލޭގެފާނު ﷲ އަށް ވަކީލްކުރައްވާށެވެ! ހަމަކަށަވަރުން، ވަކީލްކުރާ މީހުންދެކެ ﷲ ލޯބިވެވޮޑިގެންވެތެވެ." (އާލްޢިމްރާން: 159)
މިހެން ބުނުމުން އެއްވެސް ހާލެއްގައި ވަކީލުކުރުމުގެ މާނަ އޮޅުވައިނުލާށެވެ! ކުރިމަތިވެފައިވާ މަސައްލައަކުން ސަލާމަތްވާން އެމީހަކަށް ކުރެވެން ހުރި ހުރިހާ މަސައްކަތްތަކެއް ކުރަން ޖެހޭނެއެވެ. އިސްލާމް ދީނުގައި ﷲ ތަޢާލާއަށް ވަކީލު ކުރުން އޮތީ އެ މަސައްކަތްތައް ކުރުމާއިއެކުގައެވެ.
ވަކީލުކުރުމުގެ މާނައަކީ ސަބަބުތަކުގައި ހިފަހައްޓައިގެން މަސައްކަތްކުރަމުންދާއިއރުވެސް އެކަން ތިމާ ހިތް އެދޭ ގޮތަށް ޙާޞިލު ނުވާނަމަވެސް އެއީ ﷲ މިންވަރުފުޅު ކުރެއްވެވި ހެޔޮ ރަޙްމަތް ކަމަށް ޤަބޫލުކުރުމެވެ. ހިތުގައި ޝަކުވާތައް ނުގެންގުޅުމެވެ. ހިތުގައި ޝަކުވާތައް ގެންގުޅެވޭނަމަ އެކަމުން އަންގައިދެނީ ވަކީލް ނުކުރެވޭ ކަމެވެ.
ވީމާ ﷲ ތަޢާލާގެ ލޯބިވެވޮޑިގަތުން އެދޭ މީހާ ﷲ ތަޢާލާއަށް ވަކީލްކުރުން ގިނަކުރާށެވެ! އެއިރުން އެމީހާއަށް އެކަމުގެ ފައިދާ ދެދުނިޔޭގައިވެސް ލިބިގެންދާނެއެވެ! އިންޝާ ﷲ!
- -އިސްލާމީ ތިލަފަތުގެ ދަރުސަކުން
