ބައެއް ޤަުމުތަކުގައި އަދިވެސް ދަނީ ކޮރޯނާ ވައިރަސް ނުވަތަ ކޮވިޑް 19 އިތުރަށް ފެތުރެމުންނެވެ. އަނެއްބައި ޤައުމުތަކުގެ ހާލަތު އަންނަނީ ރަނގަޅުވަމުންނެވެ. ޙާލަތު މިހިސާބަށް އައުމުން ކުރާ ދުޢާ ވެސް ތަފާތުކުރަންވާނެއެވެ! ދުޢާގައި ތިމާމެންނަށް ސަލާމަތްކަން ދެއްވެވިކަމަށްޓަކައި ﷲ ތަޢާލާއަށް ޝުކުރުވެރިވާންވާނެއެވެ! އަދި ކުރިއަށް އޮތް ދުވަސްތަކަކީ ރަހްމަތުން ފުރިގެންވާ ދުވަސްތަކެއްކަމުގައި ލައްވަވައި ދެއްވެވުމަށްވެސް އެދެންވާނެއެވެ!
މިއީ މިކަންކަން ބަޔާންކޮށް ކުރެވިދާނެ ދުޢާއެކެވެ!
"ޔާ ﷲ! ކުރިމަތިލާންޖެހުނު އެންމެ ބޮޑެތި ދަތިތަކުން އިނބަ ﷲ ގެ ވާގިފުޅާއިއެކު މިހާރު މިދަނީ އަރައިގަނެވެމުންނެވެ! މިޖީލު ފިޔަވައި ދުނިޔޭގައި ތިބެ އާ ޙަޔާތެއް ފަށަން ޖެހުނު ބައެއްގެ ވާހަކަ އަޑުއިވިފައިވެސް ނެތެވެ! އަޅަމެންނާއިމެދު މިގޮތަށް ކަންކަން މެދުކުރެވެވި ސަބަބު މޮޅަށް ދެނެވޮޑިގެންވަނީ ހަމައެކަނި އިނބަ ﷲ އެވެ!
ކުރިމަތިވެފައިވާ ދަތިތަކާއިއެކުވެސް މުސްތަޤްބަލުގެ ދުވަސްތަކާއި ކުރިމަތިލުމުގެ ހިތްވަރު އަޅަމެންނަށް މިންވަރުކުރައްވަވައިދެއްވަވާނދޭވެ! މި ދަތިޙާލަތުގައިވެސް އަޅަމެންގެ ހިތްތަކުގައިވާ އީމާންކަމާއި އަޅަމެންގެ ހިތްތަކުގައި އިނބަ ﷲ ގެ ޙަޟްރަތަށް އޮތް ލޯބި އިތުރުކޮށްދެއްވަވާނދޭވެ!
ޔާ ﷲ! އަޅަމެން ދޫކޮށް ނުލައްވަވާނދޭވެ! އަޅަމެންނަށް ރަޙުމްކުރައްވަވާނދޭވެ! މިފަދަ ހިތްދަތި، އަދި ނިކަމެތި ޙާލަތުގައިވެސް އިނބަ ﷲ އަޅަމެންނަށް ދެއްވެވި ރައްކާތެރިކަމަށްޓަކައި ހާސްފަށުން ޝުކުރު ދަންނަވަމެވެ. ޞިއްޙީ ރައްކައުތެރިކަމަށާއި ދުޅަހެޔޮކަމަށާއި ދެއްވެވި ރިޒްޤަށްވެސް މެއެވެ!
ޔާ ﷲ! ކުރިއަށް އޮތް ދުވަސްތަކަކީ އިނބަ ﷲ ގެ ރަޙްމަތުން ފުރިގެންވާ އުފާ ފާގަތި ދުވަސްތަކެއް ކަމުގައި މިންވަރުކޮށްދެއްވަވާނދޭވެ!" އާމީން
- އިސްލާމީ ތިލަފަތުގެ ދަރުސަކުން
