ބީއެމްއެލްގެ އަމާޒަކީ ފައިސާ ދެއްކުމުގެ މުޢާމަލާތްތަކަކީ ފާހަގަވެސް ނުވާނެހާ ފަސޭހަ ކަމަކަށް ހެދުން: ސީއީއޯ
ކުރިއަށް އޮތް ފަސް އަހަރުގެ ތެރޭގައި ރާއްޖޭގެ ބޭންކިންގ ދާއިރާއަށް އަންނާނެ އެންމެ ބޮޑު ބަދަލަކީ ފައިސާ ދެއްކުމުގެ މުޢާމަލާތްތަކަކީ ފާހަގަވެސް ނުވާނެހާ ފަސޭހަ، ނިޒާމުގެ ތެރެއިން އަމިއްލައަށް ހިނގާ ކަމަކަށް ބަދަލުވުން ކަމަށް ބޭންކް އޮފް މޯލްޑިވްސް (ބީއެމްއެލް) ގެ ސީއީއޯ އަދި މެނޭޖިންގ ޑިރެކްޓަރ މުޙައްމަދު ޝަރީފް ވިދާޅުވެއްޖެއެވެ.
ޝަރީފް މިހެން ވިދާޅުވީ ދަރުބާރުގޭގައި މިހާރު ކުރިއަށްދާ "މޯލްޑިވްސް ފައިނޭންޝަލް އެކްސްޕޯ" ގެ ތެރެއިން ބޭއްވި ޕެނަލް ޑިސްކަޝަނެއްގައި ވާހަކަދައްކަވަމުންނެވެ. ބޭންކުގެ ކުރިމަގުގެ ތަޞައްވުރު ހިއްސާކުރައްވަމުން އޭނާ ވިދާޅުވީ، އީޖާދީ ވަސީލަތްތަކާއެކު މާލީ މުޢާމަލާތްތައް މިހާރަށްވުރެ ބޮޑަށް ހަލުވިވެގެންދާނެ ކަމަށެވެ.
މިކަމުގެ މިސާލެއް ދައްކަވަމުން ސީއީއޯ ވިދާޅުވީ، ފަތުރުވެރިއަކު ރާއްޖެއަށް އައުމަށް ޗުއްޓީއެއް ބުކްކުރާއިރު، އޭނާ ބޭނުންކުރަނީ ކޮން ބޭންކެއްގެ ޚިދުމަތެއްތޯ ބެލުމެއް ނެތްގޮތަށް، ރިސޯޓަށާއި، ސީޕްލޭނަށާއި، ލޯންޗު ފަހަރަށާއި، އަދި އެހެނިހެން ޚިދުމަތްތައް ފޯރުކޮށްދޭ ފަރާތްތަކަށް ވަގުތުންނާއި އޮޓޮމެޓިކުން ފައިސާ ޖަމާވެގެންދާ މަންޒަރު ފެނިގެންދާނެ ކަމަށެވެ.
"މިއީ އޭޕީއައި (API) މެދުވެރިކޮށް ގުޅާލެވިފައިވާ، އެއް ނިޒާމުން އަނެއް ނިޒާމަށް މުޢާމަލާތްކުރެވޭ ފަސޭހަ ފައިސާ ދެއްކުމުގެ ނިޒާމުގެ ބާރެއް. މީގެ އިތުރުން، ޑިޖިޓަލް އައިޑެންޓިޓީއާއި ބަޔޮމެޓްރިކްސް ބޭނުންކޮށްގެން ފައިސާ ދެއްކުން އާންމުވެ، މުޢާމަލާތްތައް މިހާރަށްވުރެ ސަލާމަތްތެރި، ފަސޭހަ އަދި އެންމެނަށް ބައިވެރިވެވޭފަދަ ނިޒާމަކަށް ވެގެންދާނެ،" ޝަރީފް ވިދާޅުވިއެވެ.
މީގެ އިތުރުން އާޓިފިޝަލް އިންޓެލިޖެންސް (AI) ގެ ސަބަބުން ފައިސާ ދެއްކުމުގެ މުޢާމަލާތްތައް ވިސްނުންތެރި މާލީ ޚިދުމަތްތަކަކަށް ބަދަލުވެގެންދާނެކަން އޭނާ ފާހަގަކުރެއްވިއެވެ. މިގޮތުން، ކުދި އަދި މެދު ފަންތީގެ ވިޔަފާރިތަކަށް ބޭނުންވާ ވޯކިންގ ކެޕިޓަލް ވަގުތުން ހޯދައިދިނުމާއި، މާލީ ކަންކަމުގައި ލަފާދިނުމުގެ އިތުރުން، މަކަރާއި ހީލަތުން ކުރާ މުޢާމަލާތްތައް ދެނެގަތުމަށްވެސް މި އީޖާދީ މަޢުލޫމާތުތަކުގެ ބޭނުން ހިފޭނެ ކަމަށް ބީއެމްއެލްގެ ސީއީއޯ ވިދާޅުވިއެވެ.
މި އެކްސްޕޯއަކީ ރާއްޖޭގެ މާލީ ދާއިރާގައި ހުރި ފުރުޞަތުތަކާއި ކުރިމަގުގެ އުންމީދުތައް އާންމުންނާއި ވިޔަފާރިތަކަށް ހިއްސާކުރުމަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން އިންތިޒާމުކޮށްގެން ކުރިއަށްގެންދާ ހަރަކާތެކެވެ.
