ކުރާ މަސައްކަތުން އެކަށީގެންވާ ފައިދާއެއް ލިބުނަސް އެކަމުން ތިމާއަށް މަންފާ ނުކުރާތީއާއި އަބަދުވެސް އަތްމަތި ދަތިވެގެން އުޅެންޖެހޭތީ ގިނަ ބައަކު ކަންބޮޑުވެއެވެ. އެކަމުގެ ވާހަކަތައް ދައްކައެވެ. ވީމާ އެކަން މެދުވެރިވާ ސަބަބަށާއި ޙައްލާއިމެދު ވިސްނައިލަމާހިނގާށެވެ!

ގިނަ ބައަކު ކަންބޮޑުވަނީ ކުރިއެރުން ނުލިބޭތީއެވެ. ބުރަ މަސައްކަތްތަކަކަށްފަހުގައި ލިބޭ އެތިކޮޅުވެސް ދާދި އަވަހަށް އަތުން ބީވެގެންދާތީއެވެ. ވީމާ މިކަންކަން މެދުވެރިވަމުން މިދާގޮތަކާއިމެދު ކޮންމެ މީހަކުވެސް ވިސްނައި ފިކުރުކުރަންވާނެއެވެ.

މީސްތަކުން މިއަދު ދެރަވެ ނިކަމެތިވަމުން މިދަނީ ﷲ ތަޢާލާ ނޫން ފަރާތްތަކުން ވާގިއެދިގެން ކަންކަން ޙާޞިލުކުރަން މަސައްކަތް ކުރެވޭތީއެވެ! ﷲ ތަޢާލާ އެންގެވި ގޮތް ނޫން ގޮތްގޮތަށް ކުރިއެރުން ހޯދަން މަސައްކަތްކުރެވޭތީއެވެ.

ޔަޤީންކުރާށެވެ! ތަޤްވާވެރިވެ ނަމާދުން ވާގި އެދޭ މީހާ ދެރަކޮށް ނިކަމެތި ކުރެވޭނެ އެއްވެސް މީހަކު ނުހުންނާނެއެވެ! އެހެނީ އެފަދަ ކޮންމެ މީހެއްގެ ހިތްވެސް ފުރިފައިވާނީ ﷲ ތަޢާލާއިންނެވެ. އީމާންކަމުންނެވެ. ތަޤްވާވެރިކަމުންނެވެ. އެފަދަ ހިތެއްގެ ވެރިއަކު ދެރަކޮށް ނިކަމެތި ކުރެވޭނެ ހަމަ އެކަކުވެސް ނުހުންނާނެއެވެ! އެފަދަ މީހަކަށް އެއްވެސް ދެރައެއް ދިނުމުގެ ފުރުޞަތު ﷲ ތަޢާލާ ނުދެއްވަވާނެތެވެ!

އެކަން އެނގި ޔަޤީންވަނީ ވެސް ހަމަ ކީރިތި ޤުރްއާނުންނެވެ!

ތިމަން ﷲ ވޮޑިގެންވަނީ ކެތްތެރިވެ ނަމާދުން ވާގިއެދޭ މީހުންނާއިއެކުގައި ކަމަށް ﷲ ތަޢަލާ ވަޙީ ކުރައްވަވާ ބަސްފުޅަކީ އެފަދަ މީހުންނާއިއެކު ﷲ ތަޢާލާ ވޮޑިގެންވާނެ ކަމުގެ ވަޢުދު ބަސްފުޅެކެވެ. ވީމާ އިތުބާރުކުރަންވީ މީހުން ދައްކާ ވާހަކަތަކަކަށް ނޫނެވެ. ﷲ ތަޢާލާގެ ވަޢުދު ބަސްފުޅަށެވެ.

ﷲ ތައާލާގެ ވަޙީ ބަސްފުޅު ދޫކޮށްލައި މީސްތަކުންނަށް އަޅުވެތިވެ މީސްތަކުންގެ ކިބައިން ވާގިއެދިގެން ރަނގަޅު ގޮތްތައް ހޯދަން މަސައްކަތްކުރާ މީހާއަށް އެމީހާގެ ބޭނުން ހާޞިލުކުރެވޭނީ ވަރަށް ކުޑަކުޑަ މިންވަރަކަށެވެ. އެގޮތުން ލިބޭ މިންވަރުވެސް ދާދި މަދު ވަގުތުކޮޅެއްގެ ތެރޭގައި ގެއްލިގެން ހިނގައިދާނެއެވެ. އިސާހިތަކު ބާކީވެދާނެއެވެ!

ނަމަވެސް ﷲ ތަޢާލާ ރަހްމަތް ލައްވަވައި ނިޢްމަތްތައް މިންވަރުކުރައްވަވައި ބަރަކާތް ލައްވަވައިފި ނަމަ އެ ނިޢުމަތްތަކުން އެމީހަކު މަޙްރޫމް ކުރުވޭނެ ހަމައެކަކުވެސް ނުހުންނާނެއެވެ. ލިބޭ އާމްދަނީ މަދުނަމަވެސް އެމީހަކު ހުންނާނީ ފުދިގެން އުފަލުގައެވެ. އެމީހާ އަބަދުވެސް ހުންނާނީ އުފާވެރިކަމުގައެވެ! ފުދި އިތުރުވެގެންނެވެ!

--މުފްތީ މެންކުގެ ދަރުސަކުން