އަހުރެން ދައްކަން މިއުޅެނީ ތަނަވަސްކަން ލިބި ފުދިއިތުރުވެގެން ތިބި މައިންބަފައިންގެ ވާހަކައެއް ނޫނެވެ. ދަރިންގެ ކިބައިން އެއްވެސް އެހީތެރިކަމަކަށް ބޭނުންނުވެ އަދި ދަރިން ބޮޑެތިވުމުންވެސް ދަރިންނަށް އެހީތެރިވުމުގެ ކުޅަދާނަކަން ލިބިގެންވާ މައިންބަފައިންގެ ވާހަކައެއްވެސް ނޫނެވެ.  

އަހުރެން ދައްކަން މިއުޅެނީ މުސްކުޅި ޢުމުރުގައިވެސް ދަތިޙާލުގައި އުޅެމުންދާ މައިންބަފައިންގެ ވާހަކައެވެ. އެމީހުން ކުރާ މަސައްކަތުން އެމީހުންނަށް ލިބޭ ކުޑަކުޑަ އެތިކޮޅުން ފުއްދައިގެން އުޅެމުންދާ މީހުންގެ ވާހަކައެވެ.  

ބުނަން ހެއްޔެވެ؟ ހެޔޮލަފާ މައިންބަފައިންނަކީ އެމީހުންގެ އަސާސީ ބޭނުންތައް ކިރިޔާ ފުދޭނަމަވެސް ދަރިންގެ ގާތުގައި ކަންކަމުކިޔައި އުނދަގޫކުރަން ބޭނުންވާނެ ބައެއް ނޫނެވެ. ނަމަވެސް އެއިގެ މާނައަކީ އެމީހުންނަށް އުފަލުގައި ތިބެވުމެއްވެސް ނޫނެވެ.  

ދަރިން ވިސްނަންވީ މައިންބަފައިންނަށް އެހީތެރިވިކަމުގެ ޘަވާބު ލިބޭނީ އެމީހުންގެ ޙާލުބަލައި ވެވެން އޮތް މިންވަރަކުން އެހީތެރިވެދީގެން ކަމެވެ. ތިމާ އަދާކުރަންޖެހޭ މަސްއޫލިއްޔަތު އުފުލައިގެން ކަމެވެ. ނޫންނަމަ ޘަވާބު ނުލިބުމުގެ އިތުރުން މައިންބަފައިންނަށް އެހީތެރިނުވިކަމުގެ ފާފަވެސް ބޮލުގައި އެޅޭނެކަން ދަންނާށެވެ!  

ވީމާ ބަރަކާތްތެރި ރަމަޟާން މަހުގެ ފަހުދިހައިގެ ރޭތައް އަހުރެމެންނާއި ބައްދަލުކޮށް ކުރިއަށްދާއިރު އެކަމުގެ ފައިދާ ލިބިގަންނަން ކުރާ ކަންކަމުގެ ތެރޭގައި މައިންބަފައިންނަށް އެހީތެރިވުންވެސް ހިމަނާށެވެ. އިން ޝާ ﷲ އެއިރުން އެމީހަކަށް ﷲ ތަޢާލާ ހެޔޮގޮތްތައް މިންވަރުކޮސްދެއްވަވާނެތެވެ.

- އިސްލާމީ ތިލަފަތުގެ ދަރުސަކުން  

މިދަރުސްގެތެރެއިން އެނގިގެންދަނީ މައިންބަފައިންނަށް ސަރުކާރުންދޭ ޕެންޝަން ފައިސާއިން އެމީހުންގެ ބޭނުންތައް ފުއްދައިގެން އުޅެން ދޫކޮށްލުމުން މައިންބަފައިންނަށް އެހީތެރިވިކަމުގެ ޘަވާބު ދަރިންނަށް ނުލިބޭނެ ކަމެވެ. ވީމާ އެމީހުންނަށް އަޅާލައި ހެޔޮކޮށް ހިތަން ދަރިންނަށް ޖެހޭނެ ކަމެވެ.