"އެކަލޭގެފާނު ރަސުލާ (ޞޢވ) ޙައްޖުމަހުގެ ފުރަތަމަ 9 ދުވަހާއި އާޝޫރާ ދުވަހާއި ކޮންމެ މަހަކު 3 ދުވަހު ރޯދަފުޅު ހިއްޕެވިއެވެ."
"ޢަރަފާތު ދުވަހު (ޙައްޖު މަހުގެ 9 ވަނަ ދުވަހު) ރޯދަ ހިފުމަކީ ފާއިތުވި އަހަރާއި ކުރިއަށް އޮތް އަހަރުގަ ( އެމީހަކަށް ކުރެވިފައިވާ) ފާފަތައް ފުއްސަވައިދެއްވަވާނެ ކަމެކެވެ. އަދި އާޝޫރާ ދުވަހު ރޯދަ ހިފުމަކީ ފާއިތުވި އަހަރުގެ (އެމީހަކަށް ކުރެވިފައިވާ) ފާފަތައް ފުއްސަވައި ދެއްވަވާނެ ކަމެކެވެ."
މިކަންކަމަކީ ޞަހީޙް ޙަދީޘްފުޅުތަކުން އެނގެން ހުރި ކަންކަމެވެ.
- މިއަދުގެ ޚުޠުބާއިން -
ޙައްޖު މަހާއި ބައްދަލުވުމުން ފުރަތަމަ ކަމެއްގެ ގޮތުން ވެސް ކުރަން އޮތް އެންމެ މުހިންމު ކަމަކީ ފުރަތަމަ 9 ދުވަހު، ޚާއްޞަކޮށް ޢަރަފާތު ދުވަހު ރޯދަހިފުންކަން މި ޙަދީޘްތަކުން އެނގިގެންދެއެވެ. އެހެނީ އަޅުކަމުގެ ތެރެއިން ﷲ ތަޢާލާގެ ޙަޟްރަތުގައި އެންމެ މާތްކަން ބޮޑުވެގެންވާ އަޅުކަމަކީ ރޯދަ ހިފުން ކަމަށް އޮންނާތީއެވެ. ރޯދައެއް ﷲ ތަޢާލާ ޤަބޫލުފުޅު ކުރައްވަވާ ގޮތަށް ހިފިއްޖެނަމަ އެމީހަކަށް ދެއްވަވާނެ ސަވާބުގެ މަތިވެރިކަން ވަރަށް ސާފުކޮށް އެނގެން އޮތުމުންނެވެ. ސުވަރުގޭގެ ދޮރުކޮޅުތަކުގެ ތެރެއިން ދޮރުކޮޅެއް ރޯދަވެރިންނަށް ޚާއްޞަ ޚުރައްވަވާފައިވާތީއެވެ.
ބަލަންވީ 9 ދުވަހުވެސް ރޯދަ ހިފޭތޯއެވެ! އެކަމަށް ކެރިކުޅަދާނަ ނުވާނަމަ ވީހައި ގިނަ ދުވަހު ރޯދަ ހިފޭތޯއެވެ! ކޮންމެ ގޮތަކުން ނަމަވެސް ޢަރަފާތު ދުވަހު ރޯދައެއް ހިފޭތޯއެވެ!