ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ މެމްބަރު އަހުމަދު މަހުލޫފާއި ކުރީގެ ނައިބު ރައީސް އަހުމަދު އަދީބުގެ ޤާނޫނީ ވަކީލު މޫސާ ސިރާޖުގެ ބަންދުގެ މުއްދަތު ރިވިއުކޮށްދިނުމަށް ކްރިމިނަލް ކޯޓުގައި އެދިއްޖެއެވެ.
އެދެބޭފުޅުންގެ ޤާނޫނީ ވަކީލު ނާޒިމް ސައްތާރު މިކަމާމެދު ވިދާޅުވީ މަހްލޫފާއި ސިރާޖުގެ ބަންދުގެ މުއްދަތު ރިވިއުކޮށްދިނުމަށް އެދި ކްރިމިނަލް ކޯޓަށް ސިޓީ ފޮނުވާފައިވާ ކަމަށެވެ.
މަހުލޫފްގެ މައްޗަށް ދައުވާ ކޮށްފައިވަނީ މާފުށީ ޖަލު ކައިރީގައި މުޒާހަރާ ކުރި މައްސަލައިގައި ޓެރަރިޒަމްގެ ދައުވާއަކާއި އޭނާ ކުރި ދެ ޓްވީޓެއްގެ މައްސަލައިގެ އިތުރުން މުޒާހަރާގެ ބައިވެރިންނަށް މާސްކު ބެހި މައްސަލައެއްގެ ދައުވާ އެކެވެ.
ސިރާޖުގެ މައްޗަށް ހަ ދުވަހުގެ ބަންދެއް ޖަހފައިވަނީ އަދީބު ނެރުއްވި ބަޔާންތަކާއި ގުޅިގެން އޭނާ ހައްޔަރު ކުރުމަށްފަހުއެވެ.