މީހަކަށް ލިބޭނެ އެންމެ ބޮޑު ދެރައަކީ އެމީހަކީ ﷲ ތަޢާލާ އެމީހެއްގެ ފާފަތައް ފުއްސަވައި ނުދެއްވަވާނެ އަދި ސުވަރުގެ ނުވައްދަވާނެ މީހަކު ކަމުގައިވުމެވެ. ވީމާ އެފަދަ މީހަކު ކަމުގައި ނުވުމަށް ގަދައަޅައި މަސައްކަތްކުރަން ޖެހެއެވެ.
ﷲ ތަޢާލާ ފާފަ ފުއްސަވާނީ ކޮންބައަކަށް؟ ތިމާގެ ފާފަތައް ފުއްސަވާނެތަ؟ މިފަދަ ސުވާލުތައް އަބަދުވެސް ހިތަށް ވަންނާނެއެވެ. އެއީ ތިމާގެ ފާފަތައް ﷲ ތަޢާލާ ނުފުއްސަވާނެ ކަމަށް ޝައިޠޯނާ ވަސްވާސްދޭތީއެވެ.
މީސްތަކުންނޭވެ! ﷲ ތަޢާލާ ފާފަ ނުފުއްސަވާނެ މީހަކު ނުހުންނާނެއެވެ. އަދި ކިތަންމެ ގިނައިން ފާފަ ކުރެވުނު ނަމަވެސް، ތައުބާވުމަސްފަހު އަލުން ފާފަ ކުރެވުނު ނަމަވެސް އެފާފަ އަލުން ނުކުރަން ޢަޒުމް ކަނޑައަޅައި ފާފަ ފުއްސަވައި ދެއްވެވުމަށް އެދި ދެންނެވުމުން ވެސް ފާފަ ފުއްސަވައި ދެއްވަވާނެތެވެ.
ފާފަކުރުމަށް އަހުލުވެރިވެފައިވާ މީހަކު ތައުބާވިނަމަވެސް އަލުން ހަމަ އެފާފަކުރެވުމަކީ އިންސާނީ ޠަބީޢަތެވެ. މާޔޫސްނުވާށެވެ! މިސާލަކަށް ބަރަހަނާ މަންޒަރު ބަލަން ދެވިހިފާފައިވާ މީހަކަށް އެކަން އަލުން އެކަން ކުރެވިދާނެއެވެ. ނަމަވެސް އެމީހަކު އެކަމުން ދުރުހެލިވާން ޤަޞްދުކޮށް ތައުބާވަމުން ގެންދާނަމަ އެކަން ކުރެވޭ މިންވަރުގެ ދޭތެރެ ދުރުވާން ފަށާނެއެވެ. އެއިރުން އެ ފެންނަން ފަށަނީ އެމީހާ ތައުބާވުމަށް ކުރާ މަސައްކަތުގެ ނަތީޖާއެވެ. ތައުބާވަމުން ގެންދާނަމަ ދޭތެރެ ދުރުވަމުން ގޮސް ފާފަ އެއްގޮތަކަށްވެސް ކުރާ ހިތް ނުވެ ދުރުހެލިވެވޭނެއެވެ. އެއީ އެމީހަކަށް ﷲ ތަޢާލާ ލައްވަވާ ރަޙްމަތެކެވެ.
ﷲ ތަޢާލާ ފާފަ ނުފުއްސަވާނީ އެންމެ ކަމަކަށެވެ. އެއީ ޝިރުކުކުރުމުގެމަތީގައި މަރުވާ މީހާއެވެ.
ހަމައެއާއިއެކު ސަމާލުކަންދޭންޖެހޭ ކަމެއް އެބައޮތެވެ. އެއީ މީސްތަކުންނާއިމެދު ޙަސަދަވެރިކަން ހިތުގައި ލައިގެން ހުރުމެވެ. އެފަދަ މީހުންގެ ފާފަތައް ފުއްސަވައި ނުދެއްވަވާނެ ކަމަށް އެބައޮތެވެ. ވީމާ އެއްވެސް މީހަކާއިމެދު ހަސަދަވެރިކަން ހިތުގައި ނުބާއްވާށެވެ. އެއީ ތިމާއަށް ކަނޑައެޅިގެން ގެއްލުންދޭން މަސައްކަތްކުރާ މީހަކު ނަމަވެސްމެއެވެ. އެފަދަ މީހަކު ހުރިނަމަ އެމީހަކާއި ދުރުހެލިވާށެވެ. އަދި ހިތުގައި ހަސަދަވެރިކަން ނުބާއްވާށެވެ!
މުއުމިނުންގެ ސިފައަކަށްވާންވީ އަނެކާ ތިމާއާއިމެދު ނުބައި ވާހަކަތައް ދައްކައި އެފަދަ ކަންކަން ކުރިނަމަވެސް އެމީހަކާއިމެދު ހަސަދަވެރިކަން ނުބާއްވާށެވެ! ބައްދަލުވުމުން ހިނިތުންވެލާށެވެ. އަދި ކޮންމެވެސް ދުވަހަކުން އޭނާ ތިމާއަށް ހިޮތްހެޔޮކުރާނެ ކަމަށް އުންމީދުކުރާށެވެ!
ދެން ސުވަރުގެ ނުދެއްވަވާނެ ބައަކީ ބޮޑާ، ކިބުރުވެރި މީހުންނެވެ. އެއީ އަގުބޮޑު ހެދުންލައި ރީތިގެއަޅާ މީހުންނެއް ނޫނެވެ. އެއީ ތިމާއަކީ މާމޮޅު މީހެއްކަމަސް ދެކޭ މީހުންނެވެ. އެހެން މީހުންނަކީ ނިކަމެތިންކަމުގައި ހީކޮށް އެހެން މީހުންނަށް ދެރ ގޮތަގޮތްގޮތަށް ކަންކަން ކުރާ މީހުންނެވެ.
ދެން ސުވަރުގެ ނުވައްދަވާނެ މީހުންނަކީ ދުނިޔަވީ ސަބަބުތަކަށްޓަކައި ރަޙިމުގެ ގުޅުން ކަނޑާ މީހުންނެވެ. ޙަރާމްކަމެއް ކުރަން ބުނުމުން އެކަމަށް ދެކޮޅު ހެދުމުން މައިންބަފައިން ނަމަވެސް ރުޅި އައުމަކީ އެމީހާގެ ކުށެއް ނޫނެވެ. ނަމަވެސް އެކަމެއް ނުކުރާނެ ކަމަށް ބުނަންވާނީ ރިވެތިބަހުންނެވެ. އެހާލަތުގައިވެސް އިޙްތިރާމް ކުރަންވާނީއެވެ.
ހަމައެއާއިއެކު އެއްވެސް ބިރެއް ނެތި އަބަދު މަސްތުވެގެން ހުރުމަކީ ވެސް ސުވަރުގެ ނުވައްދަވާ ކަމެކެވެ. ބައެއް މީޙުން ތައުބާވާން ޢަމަލީ ގޮތުން އެއްވެސް މަސައްކަތެއް ނުކޮށް އަބަދު މަސްތުގެ ޙާލުގައި ތިބެއެވެ. މިއީ ވަރަށް ނުރައްކައުތެރިޙާލަތެކެވެ.
މިކަންކަމަށް ފަރުވާތެރިވާށެވެ! ތިމާއަކީ ސުވަރުގެ ނުވައްދަވައިފާނެ މީހަކު ކަމުގައި ނުވުމަށް ގަދައަޅައި މަސައްކަތްކުރާށެވެ! ﷲ ތަޢާލާއަށް ބިރުވެތިވާށެވެ! އިންސާނުން ކަމުގައިވީތީ ފާފައެއް ކުރެވުނު ނަމަވެސް ތައުބާވވުމަސް އަވަސްވެގަންނާށެވެ!
- މުފްތީ މެންކުގެ ދަރުސަކުން
