ގިނަ ޢަދަދެއްގެ ޒުވާނުންނަށް ޖެހިފައިވާ ނުބައި ބައްޔަކީ ނުވަ ހިފިފައިވާ ނުބައި އާދައަކީ އުމުރުން ދުވަސްވުމުން ތަޤްވާވެރިވެ ހެޔޮ ޢަމަލުކުރަން މަޑުކުރުމުގެ ވިސްނުން ގެންގުޅެވުމެވެ. މި ވިސްނުމަކީ އެންމެ ނުބައި އެއްވިސްނުމެވެ.
ދުންފަތުގެ އިސްތިޢްމާލްކުރުން ހުއްޓައިލަންވީ ކެންސަރު ފަދަ ބައްޔެއް ޖެހުމަކުން ނޫނެވެ. ބަނގުރާ ބުއިން ހުއްޓާލަންވީ ފުރަމޭ ހަލާލުވެ ފޭލްވާންފެށުމަކުން ނޫނެވެ. މަސްތުވާތަކެތި ބޭނުންކުރުން ހުއްޓާލަންވީ މީހާގެ ސިފަގެއްލި، ނާރުތަކުގެ ބާރުދެރަވެ މީހާއަށް ދުނިޔޭގައި ނުއުޅެވޭވަރުވުމަކުން ނޫނެވެ.
ވިސްނައިލާށެވެ! ޤިޔާމަތް ދުވަހު ކޮންމެ މީހަކާއިވެސް ކުރިމަތި ކުރައްވަވާނެ އެއް ސުވާލަކީ ޒުވާން އުމުރު ހޭދަގޮތުގެ ސުވާލެވެ. އެ ސުވާލަށް ޖަވާބުނުދީ ހުރި ފިޔަވަޅުމަތިން ގުޑައިވެސް ނުލެވޭނެއެވެ. ވީމާ ޒުވާން ޢުމުރުގެ ދުވަސްތައް ހޭދަކުރެވޭ ގޮތަކީ ވަރަށް މުހިންމު އެއްޗަކަށްވެގެންދާނެއެވެ.
ޒުވާން އުމުރު ހެޔޮ ގޮތުގައި ހޭދަކުރާ ޒުވާނުން ވަރަށް ގިނައެވެ. އެއިގެ ތެރެއިން ޕާކިސްތާނުގެ ޖުނައިދު ޖަމްޝީދަކީ ފާހަގަކޮށްލެވޭ އެކެކެވެ. މިޔުޒިކާއި ލަވަކިޔުމުގެ ދުނިޔޭގައި މުޅި ދުނިޔެއަށް އޭނާ މަޝްހޫރުވިއެވެ. އޭނާއަށް އެކަމުން ލިބުނު މަޝްހޫރުކަމާއި ލިބެމުން އައި ތަނަވަސްކަން ދޫކޮށްލީ މުސްކުޅިވެ ބަލިކަށިވެގެނެއް ނޫނެވެ. ޒުވާން އުމުރުގައެވެ. ގައިގަ ބާރު ހުއްޓައެވެ.
އޭނާ ބަދަލުވީ އިސްލާމް ދީނަށް ނަޞްރުދޭ މީހަކަށެވެ. ދީނަށް ގޮވާލައި ދީން ފަތުރާ މީހަކަށެވެ. އެކަމުގައި ކުރިއަރައިގޮސް ދުނިޔޭގެ އެންމެ ނުފޫޒުގަދަ 500 މުސްލިމުންގެ ލިސްޓުގައި އޭނާ ހިމެނުނެވެ. އޭނާގެ ދަރުސްތައް އަޑުއަހައި އެތައް ބައަކު އިސްލާމްވިއެވެ. އެތައް ބައެއްގެ އިސްލާމްކަން ވަރުގަދަވެގެން ދިއައެވެ.
އޭނާގެ ފުރާނަ ﷲ ތަޢާލާގެ ޙަޟްރަތަށް ގެންދެވި ގޮތް ނިކަން ދެކިބަލާށެވެ! އިމާމްވެ ހުކުރު ކުރުމަށް ވަޑައިގަތުމަށް ދަތުރުކުރެއްވި ފްލައިޓް ވެއްޓިގެންނެވެ. ޖުނައިދު ޖަމްޝީދު ދުނިޔެ ދޫކުރެއްވުމުން އެތައް މިލިއަން މީހުން ހިތާމަކުރިއެވެ. އެތައް މިލިއަން މީހުން އޭނާއަށް ހެޔޮދުޢާކުރިއެވެ.
އެކަމުގެ ހިތާމައިގައި އަހަރެންވެސް ބައިވެރިވީމެވެ. ސުވާލަކީ ﷲ ތަޢާލާގެ ޙަޟްރަތަށް އޭނާ އެގެންދެވީ ކޮންފަދަ މަތިވެރި ގޮތަކަށް ހެއްޔެވެ؟ ﷲ ތަޢާލާގެ މަގުގައި ޚުޠުބާ ދެއްވަން ވަޑައިގަންނަވަނިކޮށް އެފިޔަވަޅުމަތީގައި ނޫން ހެއްޔެވެ؟ ކޮންފަދަ އުފާވެރި ނިމުމެއް ހެއްޔެވެ؟ މިއަށްވުރެ އުފާވެރި ނިމުމަކީ ކޮބައިހެއްޔެވެ؟
ލޮބުވެތި ޒުވާނުންނޭވެ! ﷲ ތަޢާލާ އާއި ކުއްތަންވެ ހެޔޮ ޢަމަލުކުރުން ގިނަކުރަންވީ ޒުވާން ޢުމުރުގައެވެ. އެކަމުގެ ފައިދާ އެމީހަކަށް ދެދުނިޔޭގައިވެސް ފެންނާނެތެވެ! އިން ޝާ ﷲ --އިސްލާމީ ތިލަފަތުގެ ދަރުސަކުން
