ދަރަޖަ އުފުލިގެން ދިއުމަށް އެދޭމީހާ ކުރެވޭ ފާފަތަކަށް ކޮންމެ ނަމާދެއްގެ ކުރިން ތައުބާވާށެވެ!

ފަރުޟު 5 ނަމާދުކުރާ މީހާއަށް ދެ ނަމާދު ދޭތެރޭގައި ކުރެވޭ ކުދި ފާފަތައް ﷲ ތަޢާލާ ފުއްސަވައި ދެއްވަވަތެވެ! ނަމަވެސް ބޮޑެތި ފާފަތަކަށް ޖެހޭނީ ތައުބާވާށެވެ! މިކަން ބައެއް މީހުން އޮޅުވައިލައެވެ. އެމީހުން ހީކުރަނީ ކިތަންމެ ބޮޑެތި ފާފަތަކެއް ކުރަމުން އައި ނަމަވެސް ނަމާދުކުރާނަމަ ކުރާ ހުރިހާ ފާފަތަކެއް ދާނީ ފުހެވެމުން ކަމަށެވެ. އެއީ އެކަން އޮތް ގޮތެއް ނޫނެވެ.

މިކަމުގައި އެންމެ ރައްކައުތެރި ގޮތަކީ ކޮންމެ ނަމާދެއް ކުރުމުގެ ކުރިންވެސް ތައުބާވަމުން ގެންދިއުމެވެ. ދެނަމާދުދޭތެރޭގައި ތައުބާވާންޖެހޭނެ އެއްވެސް ކަމެއް ކުރެވިފައިވާނަމަ އެކަމަކަށް ތައުބާވުމެވެ. ގިނަގިނައިން ތައުބާވުމަކީ އެމީހާގެ ދަރަޖަ ﷲ ތަޢާލާގެ ޙަޟްރަތުގައި އުފުއްލަވައި މަތިވެރިކުރައްވަވައި ދެއްވަވާ ކަމެކެވެ. އިން ޝާ ﷲ

މިހެން ބުނުމުން މިބަހުގެ މާނައަކީ ތައުބާވުމަކީ ކޮންމެ ނަމާދެއްގެ ކުރިން ކުރަން އޮތްކަމެއް ކަމަށް ދެކެގެން ނުވާނެއެވެ. އެހެނީ ތައުބާވުމަށް އޮތީ އަވަސްވެގަތުމެވެ. ފާފަކުރެވެމުން ދަނިކޮށް މިކުރެވެނީ ފާފައެއްކަން އިޙްޞާޞް ކުރެވުނު ނަމަވެސް އޮތީ އަވަހަށް ތައުބާވެ ފާފަ ފުއްސަވައި ދެއްވެވުން އެދި ދުޢާކުރުމެވެ.

އަހަރެމެންނަށް އޮތީ ވީހައި ގިނައިން ތައުބާވަމުން ގެންދިއުމެވެ. ކޮންމެ ނަމާދެއްގެ ކުރިންވެސް ތައުބާވުމަށް މިބުނި ސަބަބަކީ އެއިރުން ނަމާދަށްފަށާއިރު އެމީހަކީ ފާފަތައް ފުހެވިގެންވާ މީހަކު ކަމުގައިވާނެތީއެވެ!

އަބޫ ހުރައިރަތުގެފާނު ރިވާ ކުރތައްވާފައިވާ ޙަދީޘްފުޅެއްގައި ވެއެވެ. އެއް ދުވަހަކު ރަސޫލް (ﷺ) ސުވާލުކުރެއްވެވިއެވެ.

"ގޭދޮރުމަތީގައި ކޯރެއް އޮވެ އެކޯރުން ކޮންމެ ދުވަހަކު 5 ފަހަރު ފެންވަރާ މީހެއްގެ ގައިގާ އެއްވެސް ކިލައެއް ހުންނާނެ ހެއްޔެވެ؟"

ޖަވާބުގައި ޞަހާބީން އެފަދަ މީހެއްގެ ގައިގައި އެއްވެސް ކިލައެއް ނުހުންނާނެ ކަމަށް ދެންނެވުމުން ރަސޫލް (ﷺ) ޙަދީޘްފުޅު ކުރެއްވެވިއެވެ. "ފަރުޟު 5 ނަމާދު ކުރާމީހާގެ މިސާލަކީ އެއީއެވެ. އޭނާގެ ހުރިހާ ފާފަތަކެއް ﷲ ތައާލާ ފުއްސަވައިދެއްވަވާނެތެވެ."

މިޙަދީޘްފުޅުން އެނގެނީ އެމީހެއްގެ ގޭގެ ދޮރުމަތީގައި ކޯރެއް އޮވެ އެކޯރުން ދުވާލަކު 5 ފަހަރު ފެންވަރާ މީހެއްގެ ގައިގައި އެއްވެސް ކިލައެއް ނުހުންނާނެ ފަދައިން ފަރުޟު 5 ނަމާދުކުރާ މީހާގެ މިސާލަކީ އެއީކަމެވެ. ފަރުޟު 5 ނަމާދުކުރާ މީހާގެ ފާފަތައް ދާނީ ފުހެވެމުން ކަމެވެ.

ފަށަމުން ބުނިފަދައިން މިޙަދީޘްފުޅުގައި ބަޔާންކުރައްވަވާފައި އެވަނީ ދެނަމާދު ދެމެދުގައި ކުރެވޭ ކުދިފާފަތަކެވެ. ބޮޑެތި ފާފަތައް ފުއްސަވައި ދެއްވަވާނީ ތައުބާވުމުންނެވެ.

ނަމާދުތަކަށް ރައްކައުތެރިވާށެވެ! ހަމަ އެއާއިއެކު ފާފަކުރުމުން ދުރުހެލިވާށެވެ! އޮޅުމަކުން ފާފައެއް ކުރެވުނު ނަމަވެސް އަވަހަށް ތައުބާވާށެވެ! ނަމާދުކުރުމުން ލިބޭ ފުރިހަމަ ފައިދާ ޙާޞިލުކުރެވޭނީ އެއިރުންނެވެ!

--އިސްލާމީ ތިލަފަތުގެ ދަރުސަކުން