ޝަޢްބާން މަހުގެ ފަހު 15 ފެށިގެން ކުރިއަސްދަނީއެވެ. ކޮންމެ ދުވަހަކީ ބަރަކާތްތެރި ރަމަޟާން މަހާއި ގާތްވަމުން އަންނަ ދުވަހެކެވެ. މުސްލިމުން ގަދައަޅައި މަސައްކަތްކުރަމުން ގެންދަނީ ރަމަޟާން މަހުން ވީހައި ގިނަ ފައިދާތަކެއް ޙާޞިލުކުރުމަށެވެ. ވީހައި ގިނަ އަޅުކަންކޮށް ނަރަކައިން ސަލާމަތްވެ ސުވަރުގެ ލިބިގަތުމަށެވެ. ރަމަޟާން މަސް ނިމިގެންދާއިރު ތިމާއަކީ އިސްވެ ދިއަ ހުރިހާ ފާފަތަކެއް ފުއްސަވައި ދެއްވަވާފައިވާ މީހަކު ކަމުގައިވުމަށެވެ.
ކަން މިހެން ހުރިއިރު މަދު ބައަކު ނަމަވެސް އިހްމާލްވާ ކަމެއް އޮވެއެވެ. އެއީ ތިމާއަކީ ﷲ ތަޢާލާ ރަޙްމަތް ކަނޑުއްވަވާފައިވާ މީހަކު ކަމުގައި ނުވުމަށް ކުރަންޖެހޭ ކަންތަކެވެ.
ޤުދުސިއްޔަ ޙަދީޘްފުޅެއްގައި އައިސްފައިވެއެވެ.
أَنَا الرَّحْمَنُ، أَنَا َخَلَقْتُ الرَّحِمَ وشَقَقْتُ لَهَا اِسْمًا مِنْ اسْمِى فَمَنْ وَصَلَهَ وَصَلْتُها وَمَن قَطعَهَا قَطَعْتُهُ وَمَنْ بتَّها بَتَتُّه –
މާނައީ: "ތިމަން ރަސްކަލާނގެއީ ރަޙްމާނުވަންތަ ރަސްކަލާނގެއެވެ. ތިމަން ރަސްކަލާނގެ ރަޙިމު ހެއްދެވީމެވެ. އަދި ތިމަން ރަސްކަލާނގެ ނަންފުޅުތަކުން ނަމެއް އެއަށް ދެއްވީމެވެ. އެއަށް ހެޔޮކޮށް ހިތި މީހަކަށް ތިމަން ރަސްކަލާނގެ ހެޔޮކަން ވާޞިލު ކޮށްދެއްވަމުއެވެ. އެއާ ގުޅުން ކެނޑިމީހާކަށް ތިމަން ރަސްކަލާނގެ ރަޙްމަތް ކަނޑުއްވަމުއެވެ."
މީސްތަކުންނޭވެ! މިދެއްކެނީ އެންމެ ބޮޑުކަންތަކުގެ ވާހަކައެވެ. ރަޙިމުގެ ގުޅުން ކަނޑައިގެން ހުރެއްޖެނަމަ އެމީހަކީ ﷲ ތަޢާލާގެ ރަޙްމަތް ކަނޑުއްވަވާފައިވާ މީހަކަށް ވެދާނެ ކަމުގެ ވާހަކައެވެ. އެހެން އެކަން މެދުވެރިކުރައްވަވައިފިނަމަ ތިބާ ކުރާ ހެޔޮ ޢަމަލުތަކުން ކުރާނީ ކޮން ފައިދާއެއް ހެއްޔެވެ؟
މައްސަލަތައް ކުރިމަތިވާނެއެވެ. ކަންތައްތައް ކުރިމަތިވާނެއެވެ. މުދަލާއި އެނޫން މައްސަލަތައްވެސް ކުރިމަތިވާނެއެވެ. ކޮންމެ ކަމެއް ކުރިމަތިވެފައި އޮތްކަމުގައިވީނަމަވެސް ރަޙިމުގެ ގުޅުން ނުކަނޑާށެވެ. އެގުޅުން ދަމަހައްޓާށެވެ.
ތިމާގެ މައިން ބަފައިން އިޚްތިޔާރުކުރުމަކީ އެއްވެސް މީހަކަށް ކުރެވޭނެ ކަމެއް ނޫނެވެ. އަހަރެމެން ދުނިޔެއަށް އުފަންވާނީ ކޮން މައެއްގެ ބަނޑުންކަން ކަނޑައަޅުއްވަވަނީ ﷲ ތަޢާލާއެވެ. ވީމާ އަހަރެމެންނަށް އޮތީ ކޮންމެ ގޮތަކުން ނަމަވެސް ރަޙިމުގެ ގުޅުން ދެމެހެއްޓުމެވެ. އެކަކު އަނެކަކަށް އެހީތެރިވެ އަޚްވަންތަކަން މަތީގައި ދުނިޔޭގައި އުޅުމެވެ.
އަޚާ ވަނީ ތިބާއަށް ގެއްލުންތަކެއްދީ ތިބާގެ ޙައްޤުތަކަށް އަރައިގެންފައިކަމަށްވެސް ވެދާނެއެވެ. އެކަން އަޚާއަށް ދޫކޮށްލާށެވެ! އަޚާ ނަމަވެސް އުޚުތަކު ނަމަވެސް ތިބާގެ ޙައްޤަކަށް އަރައިގެންފައިވާނަމަ އެކަމަށް ބަދަލު ދެއްވަވާނެ ދުވަސް އަހަރެމެން އެންމެންނާއި އަރައިހަމަކުރާނެއެވެ. އެދުވަހަކުން އެއްވެސް މީހަކަށް ބޭއިންޞާފުން އެއްވެސް ކަމެއް ނުނިންމަވާނެތެވެ. އެމީހަކަށް ލިބެންޖެހޭ ޙައްޤުތައް ފުރިހަމައަށް ދެއްވަވާނެތެވެ! ވީމާ ދުނިޔޭގައި ހޭދަކުރާ މަދު ދުވަސްކޮޅު ﷲ ތަޢާލާގެ ރަޙްމަތުން މަޙްރޫމް ކުރައްވަވައިފާނެ އެއްވެސް ކަމެއް ނުކުރާށެވެ! ދީލަތިކަމާއިއެކު މާފުކޮށް ﷲ ތަޢާލާގެ ރުހިވޮޑިގަތުން ލިބިގަންނަން ގަދައަޅައި މަސައްކަތްކުރާށެވެ!
- އިސްލާމީ ތިލަފަތުގެ ދަރުސަކުން
