ޙަސަދަވެރިން ލާ ހަސަދައިގެ ސަބަބުން ދުނިޔޭގައި ތިމާއަށް ކަންތައްތަކެއް ގެއްްލިގެން ހިނގައިދާނެއެވެ. ނަމަވެސް އެއީ އެއްވެސް ވަރަކަށް ދެރަވެ މާޔޫސްވާންވީ ކަމެއް ނޫނެވެ.
ގިނަ ބައަކު ރުޅިއަންނާތީ ނުވަތަ ހަސަދަވެރިވެގެން އުޅޭތީ ބައެއް މީހުން ކަންބޮޑުވެގެން އުޅުނު ނަމަވެސް އެއީ އެއްވެސް މީހަކު އެއްވެސް ވަރަކަށް ކަންބޮޑުވާންޖެހެންވީ ކަމެއް ނޫނެވެ. އެހެނީ ކިތަންމެ ގިނަ ބައަކު ރުޅި އައި ނަމަވެސް އަދި ހަސަދަވެރިވީ ނަމަވެސް ތިބާއަށް ﷲ ތަޢާލާ ދެއްވަވާ ނިޢްމަތެއް އެއްވެސް ވަރަކަށް މަދެއް ނުވާނެއެވެ. ވާނީ އިތުރެވެ. ކުރާނީ ފައިދާއެވެ.
ފައިދާ ކުރާނެ ކަމަށް މިބުނަނީ ހަސަދަވެރިވެ ހިތް ނުބައިކުރިވަރަކަށް އެކަމުން ތިބާއަށް ލިބޭނެ ސަވާބު އިތުރުވާނެތީއެވެ. ޤިޔާމަތް ދުވަހުން އެމީހާގެ ހެޔޮ އަމަލުތަކުން ތިބާއަށް ފައިދާކުރާނެތީއެވެ. ވީމާ މީހަކު ނުވަތަ ބައަކު ހަސަދަވެރިވެ ނުބައި ބަސް ބުނާތީ ނުވަތަ ގެއްލުންދޭން މަސައްކަތްކުރާތީ ކަންބޮޑުވުމެއް ނެތެވެ.
ނަމަވެސް އެކަން އެގޮތަށް މެދުވެރިވާނީ ތިބާ ހުރީ ޙައްޤު ގޮތުގައި ކަމަށްވާނަމައެވެ. ވީމާ އެންމެ މުހިންމު ކަމަކީ ތިމާ ޙައްޤު ގޮތުގައި ހުރުމެވެ. ތިމާ ޙައްޤު ގޮތުގައި ހުރިނަމަ އެކަން އެމީހަކަށް އެނގޭނެއެވެ. ﷲ ތަޢާލާ ދެކެދެނެވޮޑިގެންވެއެވެ.
ބުއްދި އާއި ޢިލްމާއި ﷲ ތައާލާ ދެއްވެވީ އެއިގެ ބޭނުން އެންމެ ރަނގަޅު ގޮތުގައި ހިފުމަށެވެ. ވީމާ ބޭކާރު ކަންކަމަށް ވިސްނައި ފިކުރުކުރަން ވަގުތުތައް ނަގައިނުލާށެވެ! ﷲ ތަޢާލާ އާއިމެދު ވިސްނައި ފިކުރުކުރާށެވެ! ﷲ ތައާލާ އެންގެވި އެންގެވުންތަކާއިމެދު ވިސްނައިފިކުރުކުރާށެވެ! ﷲ ތައާލާގެ ލޯބި ހޯދަން މަސައްކަތްކުރާށެވެ. ﷲ ތައާލާ އާއި ކުއްތަންވުމަށް ގަދައަޅައި މަސައްކަތްކުރާށެވެ. އެއިރުން ދުނިޔޭގައި ވެސް ދާނީ ކުރިއެރުން ލިބެމުންނެވެ. އާޚިރަތުގައިވެސް ކާމިޔާބު މިންވަރުފުލު ކުރައްވަވާނެތެވެ! އިން ޝާ ﷲ!
ހަސަދަވެރިންގެ ހަސަދައިގެ ސަބަބުން ދުނިޔޭގައި މީހަކަށް ބައެއް ގެއްލުންތައް ލިބިދާނެއެވެ. ޞިއްޙީ، މާލީ، އަދި ދިރިއުޅުން ބަރުބާދުވުން ފަދަ ކަންކަންވެސް މެދުވެރިވެދާނެއެވެ. ނަމަވެސް އެކަންކަމުގެ ސަބަބުން އާޚިރަތް ދުވަހު ދެއްވަވާނެ ބަދަލަށް ވިސްނައިލުމުން ހިތް އުފަލުން އުތުރި އަރާނެއެވެ. އަދި ކީއްހެއްޔެވެ؟ ލިބޭނެ އެންމެ ބޮޑު އުފަލަކީ ބައަކު ކިތަންމެ ވަރަކަށް ހަސަދަލައި ސިހުރު ހެދުން ފަދަ ކަންކަން ކުރި ނަމަވެސް އެއިން ކަމެއް މެދުވެރިވާނީ ﷲ ތަޢާލާ މިންވަރުކުރައްވަވައިފި ނަމަ ކަމުގައިވާތީ ލިބޭ ހިތްހަަމަޖެހުމެވެ.
- މުފްތި މެންކުގެ ދަރުސަކުން
