ދުޢާ ކުރުމުގައި އެންމެ މުހިންމީ ކީރިތި ޤުރްއާނާއި ސުންނަތުގައި ވާރިދުވެގެންވާ ދުޢާތައް ކުރުމެވެ. އެއަށްވުރެ ފުރިހަމަކަންބޮޑު ދުޢާތަކެއް ނުފެންނާނެއެވެ. އެންމެ މުހިންމު ކަމަކީ އެދުޢާތައްވެސް ކުރުމުގެ ކުރިން އެއިގެ މާނަ ދަސްކުރުމެވެ. މާނަ ނުއެނގި ﷲ ތައާލާއަށް ކަންކަމުގައި އެދިދަންނަވަން ލަދުވެތިވެސް ވާންޖެހޭނެއެވެ.
މީގެ އިތުރުން ޢަރަބަި ބަހުން ދުޢާ ކުރުމުގެ ބޭނުމުގައި ބައެއް މީޙުން އިތުރު ދުޢާތައް ހޯދައިގެން ކިޔައެވެ. އެމީހަކު ހިތްހަމަޖެހޭ ބަހަކުން ދުޢާކުރުމުގައި އެއްވެސް މައްސަލައެއް ނެތެވެ. އެންމެ މުހިންމު ކަމަކީ ކުރިން ބުނިފަދައިން މިދެންނެވެނީ ކީކޭކަން އެނގުމެވެ.
ކަމަކަށް އެދި ﷲ ތަޢާލާއަށް ދުޢާ ކުރުމަށް ވަކި ބަހެއް ނެތެވެ. އެހެނީ ހުރިހާ ބަސްތަކެއްވެސް ﷲ ތަޢާލާ އެންމެ މޮޅަށް ދެނެވޮޑިގެންވާތީއެވެ. ނަމަވެސް ކަންކަމަށް އެދި ދުޢާ ކުރުމުގައި ކީރިތި ޤްރުއާނުގައި ބަޔާންވެގެންވާ އަދި ރަސޫލް (ﷺ) ގެ ޙަދީޘްފުޅުތަކުން ފެންނަންހުރި ދުޢާ ކުރުން މޮޅު އިތުރުވެގެންވެއެވެ. އެފަދަ ދުޢާއެއް ނުއެނގޭނަމަ، ހަމަ ކޮންމެ ބަހަކުން ނަމަވެސް ދުޢާކުރަންވީއެވެ. ދިވެހި، އިނގިރޭސި، ޢަރަބި ފަދަ އެމީހަކަށް ފަސޭހަ ބަހަކުން ހަމަ ދުޢާކުރަންވީއެވެ.
ކޮންމެބަހަކުން ދުޢާކުރި ނަމަވެސް ދުޢާކުރަން ފަށަންވާނީ ﷲ ތަޢާލާއަށް ހަމްދުކޮށް ރަސޫލާ (ﷺ)އަށް ޞަލަވާތާއި ސަލާމް ލެއްވެވުން އެދި ދުޢާކުރުމުނނެވެ. "ﷲ އަށް ޙަމްދު ކުރަމެވެ. ނަބިއްޔާއަށް ޞަލަވާތާއި ސަލާމް ލެއްވެވުން އެދި ދުޢާކުރަމެވެ.---- ދެން ބޭނުންވާ ދުޢާއެއް ކުރިއަށް ގެންދަންވީ (ކުރަންވީ) އެވެ."
ކަންކަމަށް ބޭނުންވުމުން ނުވަތަ ކަންކަމަށް އެދިގެން ދުޢާކުރާއިރު ކީރިތި ޤްރްއާނުގައި ބަޔާންވެގެންވާ ދުޢާތައް އަދި ކައު އިތުރު ރަސޫލާ (ﷺ) ކުރެއްވެވި ދުޢާތައް ކުރުމުގެ ބޭނުމަކީ އެ ދުޢާތަކަށްވުރެ ފުރިހަމައަށް ދުޢާ ނުކުރެވޭނެތީ ކަމަށެވެ. އެހެންކަމުން އެންމެ މަތިވެރި ގޮތަކީ އެއީ ކަމަށެވެ. ނަމަވެސް އެފަދަ ދުޢާއެއް ނުއެނގޭނަމަ އެމީހަކު ވާހަކަ ދައްކާ ބަހަކުން ދުޢާކުރަންވީ ކަމަށެވެ.
ރަމަޟާން މަހަކީ ވީހައި ގިނައިން ދުޢާކުރުމުގެ މައްސަރެވެ. ވީމާ ވީހައި ގިނަ މުހިންމު ދުޢާތައް ހިތުދަސްކުރާށެވެ!
--އިސްލާމީ ތިލަފަތުގެ ދަރުސަކުން
