ވިތުރި ކުރުމުގެ ވަގުތާއިބެހޭ ގޮތުން ގިނަބައަކު ސުވާލުކުރެއެވެ. ވިތުރީގެ ވަގުތަކީ ޢިޝާ ނަމާދުން ފެށިގެންގޮސް ފަތިސްނަމާދުގެ ވަގުތާއި ހަމައަށެވެ. ނަމަވެސް ވިސްނައިލަންވީ ކަމަކީ ވިތުރިކުރަންޖެހޭ ކަމެވެ. އެއީ ސުންނަތްކަންގަދަވެގެންވާ ނަމާދެކެވެ. އަދި ވިތުރި ނުކޮށް ނުނިދުމަށް ރަސޫލް ﷺ ވަނީ ވަޞިއްޔަތްކުރައްވަވައިފައެވެ.
ވިތުރި ކުރުމުގެ ވަގުތު ދެމިގެންގޮސްފައިވީނަމަވެސް ނިދާފައި ހޭލެވިދާނެކަމުގެ ޔަޤީންކަން ނެތް މީހާއަށް އޮތީ ވިތުރިކޮށްގެން ނިދުމެވެ.
ދަމުނަމާދާއި ވިތުރި ފަތިސް ނަމާދާއި ކައިރިކޮށް ކުރެވޭނެއެވެ. އެއީ އެއްވެސް މައްސލައެއް އޮތް ކަމެއް ނޫނެވެ. ފަތިސް ނަމާދަށް ބަންގި ގޮވަން ކައިރިކޮށް ތެދުވެ ދަމުނަމާދާއި ވިތުރު ކުރުމން ފުދޭނެއެވެ.
ދަމު ނަމާދަށްފަހު ކީރިތި ޤްރްއާން ކިޔަވައި ދުޢާކޮށް ހެދުމުގެ މުހިންމުކަން ޢިލްމުވެރިން ފާހަގަކުރައްވައެވެ. ވީމާ އެމީހަކަށް ވެވުނު އެންމެ އަވަހަކަށް ތެދުވެ ދަމުނަމާދު ކުރުމަކީ ވަރަށް ރަނގަޅު، ފައިދާހުރި ކަމެކެވެ.
ފަތިސް ނަމާދަށް ބަންގި ގޮވުމުގެ ކުރިން ދަމުނަމާދާއި ވިތުރުކުރާ މީހަކަށްވުމަށް ގަދައަޅައި މަސައްކަތްކުރާށެވެ!
- އިސްލާމީ ތިލަފަތުގެ ދަރުސަކުން
