މުޅި ދުނިޔެވެސް މިހާރު މިވަނީ ވިޔަފާރީގެ ތަނަކަށް ބަދަލުވެފައެވެ. ކޮންމެ މީހަކުހެން އެންމެ ކުރަންބޭނުންވާ ކަމަކީ ވިޔަފާރިކަމަށް މިހާރު މިވަނީ ވެފައެވެ. ވިޔަފާރި ފެށުމުން އެއްބައަކު ކުރިއަރައިދެއެވެ. އަނެއް ބައަކު ބަނގުރޫޓުވެސް ވެއެވެ.
ބަނގުރޫޓުވުމެއް ނެތި ފައިދާކުރާނެ 3 ވިޔަފާރިއެއް ނުވަތަ ފައިދާ ނޫން އެއްޗެއް ނުލިބޭނެ 3 ކަމެއް ﷲ ތަޢާލާ ވަނީ ކީރިތި ޤުރްއާނުގައި ބަޔާންކުރައްވަވައިފައެވެ.
"ހަމަކަށަވަރުން، ﷲ ގެ ފޮތް ކިޔަވައި، އަދި ނަމާދު ޤާއިމުކޮށް، ތިމަންރަސްކަލާނގެ އެއުރެންނަށް ދެއްވެވި ތަކެތިން ސިއްރާއި ފައުޅުގައި ހޭދަކޮށް އުޅޭ މީހުންނީ، ގެއްލުން ނުވާނެ ވިޔަފާރިއަކަށް އެދޭ ބައެކެވެ." (ފާޠިރު: 29)
މިއާތުގައި ފުރަތަމަ ކަމަކަށް މިއޮތީ ކީރިތި ޤުރްއާން ކިޔެވުމެވެ. ދެވަނަ ކަމަކަށް މިއޮތީ ބަރާބަރަށް ނަމާދުކުރުމެވެ. 3 ވަނަ ކަމަކަށް މިއޮތީ އެކަލާނގެ ދެއްވެވި ތަކެތިން އެކަލާނގެ މަގުގައި ހޭދަކުރުމެވެ.
މި ވަޙީބަސްފުޅުން އެނގިގެން މިދަނީ ހޭދަކުރަންވީ އެކަލާނގެ ދެއްވެވި ތަކެތިން ކަމެވެ. އަތުގައި އެއްޗެއް ނެތިގެން ހޭދަ ނުކުރެވުމަކުން އެމީހާގެ އެއްވެސް މައްސަލައެއް ނެތްކަމެވެ. ވީމާ ހޭދަކުރެވެން ނެތުމުން ހޭދަ ނުކުރި ނަމަވެސް ކީރިތި ޤުރްއާން ކިޔެވުމާއި ނަމާދު ޤާއިމުކުރުމަކީ ހަމަ ކޮންމެ މީހަކަށްވެސް ކުރެވިދާނެ ކަންކަމެވެ.
- އިސްލާމީ ތިލަފަތުގެ ދަރުސަކުން
