އެހެން މީހެއްގެ ލޯބި ހޯދަން ތިމާގެ ބައިވެރިޔާގެ ނުބައި ވާހަކަ ދެއްކޭނަމަ އެކަން އެކުރެވެނީ ތިމާގެ ހިތަށް ޖެހިފައިވާ ވަރަށް ނުބައި ބައްޔެއްގެ ސަބަބުންނެވެ. އެބަލީގެ ޝިކާރައަކަށްވާ މީހުންގެ ޙަޔާތް ދާދި އަވަހަށް ބަރުބާދުވެގެންދާނެއެވެ. އެހެނީ ހެދޭ ދޮހުތައް އިސާގިތަކު އަރައި ތިމާއާއި ހަމަކުރާނެއެވެ!
ބައިވެރިޔާ ޢާއިމެދު ތެދުވާހަކަވެސް ދައްކަންޖެހޭނީ ވަރަށް ބޮޑަށް ވިސްނައިގެންނެވެ. ތަޢްރީފްކުރުމުގެ ގޮތުން އެކަންޏެވެ. އެހެނީ ދެމަފިރިންގެ މެދުގައި ހުންނަ ކަންކަން އެއީ ޙަޔާތުގެ ސިއްރެވެ. ކޮންމެ ކޮންމެ މީހަކަށް ކިޔައިދޭކަށް ނުޖެހޭނެއެވެ. ކިޔައިދީގެންވެސް ނުވާނެއެވެ. އެއީ ކުރެވޭ ބޮޑުފާފައެކެވެ.
ދެމަފިރިން ވެސް ވާންޖެހޭނީ އެކަކު އަނެކަކަށް ފޭރާމަކަށްކަން ކީރިތި ޤުރްއާނުން އެނގެން އެބައޮތެވެ. "---އެކަނބަލުންނީ ތިއަބައިމީހުންނަށް ފޭރާމެކެވެ. އަދި ތިއަބައިމީހުންނީ އެކަނބަލުންނަށް ފޭރާމެކެވެ.—" (އަލްބަޤަރާ: 187)
ދެމަފިރިންގެ މެދުގައި އޮންނަންޖެހޭ ގުޅުމަކީ މިފަދަ ބަދަހިގުޅުމެކެވެ. ވީމާ ދެމަފިރިންގެ ގުޅުމުގެ ކޮންމެ ކަމަކީވެސް ދެމަފިރިންގެ މެދުގައި ވަރަށް ބޮޑު ސިއްރަކަށް ހަދަންޖެހޭނެއެވެ. އުފާވެރިކަމުގައި ދިރިއުޅުނު ނަމަވެސް އަދި މައްސަލަޖެހިގެން އުޅޭއިރުވެސްމެއެވެ.
ބައިވެރިޔާގެ ވާހަކަތައް ދައްކާނަމަ، ޚާއްޞަކޮށް ބައިވެރިޔާ އާއިމެދު ދޮގުހެދޭނަމަ އެއީ ވަރަށް ފިނޑި އަމަލެކެވެ. އަދި ކީއްހެއްޔެވެ؟ އެމީހަކު އެވަނީ މުޅިން ފޭލްވެފައެވެ. ދިރިއުޅުމުގެ ހަނގުރާމައިގައި މުޅިން ބަލިވެފައެވެ. ހުރިހާ ހަތިޔާރުތަކެއް ހުސްވެ ހުސްއަތަށްވެފައެވެ.
މިވާހަކަކޮޅު ނިޞްބަތްމިކުރީ ވަކިމީހަކަށް ނޫނެވެ. ދެމަފިރިންނަށެވެ. ދެމަފިރންކުރެ ކޮންމެ މީހަކުވެސް ސަމާލުކަން ދިނުމަށެވެ. އެހެން މީހުންގެ ހަމްދަރުދީ ހޯދަންޖެހޭނީ އަދި ލޯބި ހޯދަންވެސް ޖެހޭނީ ބައިވެރިޔާ ކަތިލައިގެނެއް ނޫނެވެ. ބައިވެރިޔާ ދިރިހުއްޓައި އޭނާގެ މުޅަ މަސް ކައިގެނެއް ނޫނެވެ. އެމީހެއްގެ ކިބައިގަވާ ރަނގަޅު ސިފަތައް ދައްކައިދީގެންނެވެ.
- އިސްލާމީ ތިލަފަތުގެ ދަރުސަކުން
