ބަރަކާތްތެރި ރަޟާމާން މަސް ފެށުމުން ކުރަން އޮތް ކަމަކީ ކަންކަންމަތީގައި ރާޒުވާ ކުޅުމާއި މައިދާންތަކުގައި ކުޅިވަރުކުޅުމެއް ނޫނެވެ. ފުޓްސެލް މުބާރާތްތަކާއި އެނޫންވެސް އެފަދަ މުބާރާތްތައް ބޭއްވުމަކީ ދީނީ ގޮތުން ގަޓްހުރި ކަމެއް ނޫނެވެ.
މިފަދަ ކުޅިވަރު މުބާރާތްތައް އިންތިޒާމް ކުރަންވީ ރޯދަމަހަކު ނޫނެވެ. ޢީދުތަކާއި ގުޅުވައިގެންނެވެ. މުބާރާތަކަށް ތައްޔާރުވާން ނަމަވެސް ރަމަޟާން މަހުގެ އަގުހުރި ވަގުތުތައް ކުޅިވަރާއި މުނިފޫހިފިލުވުމުގައި ހޭފަކުރަން ހެޔޮ ނުވާނެއެވެ!
ރަމަޟާން މަހާއި ދިމާކޮށް ލަޢްނަތްލެއްވިގެންވާ މިޔުޒިކް ޝޯތައް ބާއްވައި ޕްރަމޯޓްކުރުމާއި ކުޅިވަރު މުބާރާތްތައް ރޭގަނޑު ބޭއްވުމާއި ބައިވެރިވުމުން ބޮޑެތި އިނާމުތައް ދީ ރައްޔިތުން ޝައުޤުވެރިކުރުވައިގެން ޓީވީތައް ގާތު މެންދަމުން ފަސްވަންދެން މީސްތަކުން ބޭތިއްބުމުގެ ޘަޤާފަތް ރާއްޖޭގައި އުފައްދައި ތަޢާރަފްކުރީ އެކި ޒަމާނުގައި އެކިނަމުގައި ހިންގި މިހާރުގެ ޕީއެސްއެމުންނެނެވެ.
ކޮންމެ ބިދުޢައެއްގެ ސަބަބުން އެކަންކަން އުފެއްދި މީހުންނަށް ޤިޔާމަތް ދުވަހާއި ހަމައަށް ވެސް ޢަޛާބް ދެއްވަވާނެކަން އެނގެން އޮތުމުން އެނގިގެންދަނީ އެއިރު ރާއްޖެއާއި ޓީވީއެމްގެ ވެރިކަމުގައި ތިބި ބައަކަށް އެމީހުން އުފައްދައި ތަޢާރަފްކުރި ބިދުޢަތައް ރާއްޖޭގައި ދެމިއޮތްހައި ދުވަހަކު، ޤިޔާމަތްދުވަހާއި ހަމައަށް ސަލާމަތްނުވެވޭނެއެވެ.
ވިސްނައިލަންވީ ގެއިން ބޭރުގައި ވަގުތުތައް ބޭކާރުނުކުރުމަށެވެ. ކުޅިވަރާއި މުނިފޫހި ފިލުވުމުގައި ވަގުތައް ހޭދަކޮށްނުލުމަށެވެ. އަދި ގޭގައި ތިބެގެންވެސް ތިމާ ހިފާ ރޯދައަށް ފައިދާކުރާނެ ކަންކަން ކުރުމަށެވެ. ހެޔޮ ޢަމަލުކުރުމަށެވެ!
އެއްވެސް ޙާލެއްގައި މިބުނަނީ ހަވީރުވުމުން ކުޑަކުދިން ގޮވައިގެން ނުވަތަ ދެމަފިރިން ގެއިން އެކުގައި ގެއިން ބޭރަށް ނުކުމެނުލާކަށް ނޫނެވެ. އެކަމަށް ހޭދަކުރާ ވަގުތު މަދުކޮށް އަޅުކަމުގައި ވަގުތުހޭދަކުރުން ގިނަކުރުމަށެވެ.
އުފާވެރި ވާހަކައެއްވެސް ބުނެލާނަމެވެ! އެއީ ރޯދަވެރިޔާ އަމަލުތައް ބަހައްޓަން ޖެހޭ ގޮތަށް ބަހައްޓަމުން އަނބިދަރިންގެ ހިތްހަމަޖައްސައިދޭން އެކުގައި ބޭރަށް ނުކުމެލުމަކީ ހަމަ ޘަވާބު ދެއްވަވާނެ ކަންކަމެވެ.
--މަޢުލޫމާތު: މިއަދުނޫހުގެ ކިޔުންތެރިއެއް
