މީހަކަށް މުޞީބާތެއް ކުރިމަތިވުމުން ތިމާއަށް ކުރިމަތިމިވީ ﷲ ތަޢާލާގެ ކޯފާކަން އެނގޭނެ ގޮތަކާއިމެދު ބައެއް މީހުން ސުވާލުކުރެއެވެ. އެއީ 100 އިންސައްތަ ޖަވާބު ދިމާކުރެވޭނެ ސުވާލެއް ނޫނެވެ. ނަމަވެސް ވިސްނައިލުން މުހިންމު ބައެއް ކަންކަން އެބަހުއްޓެވެ.
ފުރަތަމަ ކަމަކީ ﷲ ތަޢާލާ އިމްތިޙާންތައް ކުރިމަތިކުރައްވަވާނީ އީމާންވާ އަޅުންނަށެވެ. އީމާން ނުވާ އަޅުންނަށް އިމްތިޙާންތައް ކުރިމަތިނުކުރައްވަވާނެތެވެ. އެމީޙުންނަށް ދެއްވަވާ ނިޢްމަތްތަކަކީ ވަގުޓީ ނިޢްމަތްތަކެކެވެ. އެއަސްފަހު އެމީހުންނަށް އޮތީ ގަދަފަ ޢަޛާބެވެ. ވީމާ އިމްތިޙާންތައް ކުރިމަތިކުރައްވަވާނީ ﷲ ތަޢާލާއަށް އީމާންވެ ސުވަރުގެ ހޯދަން މަސައްކަތްކުރާ އަޅުންނަށެވެ.
ދެވަނައީ ﷲ ތަޢާލާގެ ކޯފާ ނުވަތަ ޢަޛާބު ފޮނުއްވަވާ ސަބަބެވެ. އެއީ ދެގޮތެކެވެ. ފުރަތަމަ ކަމަކީ ﷲ ތަޢާލާ ނަހީކުރެއްވެވި ކަންކަން ކުރަމުން ގެންދިއުމެވެ. ތައުބާ ނުވުމެވެ. ދެވަނަ ގޮތަކީ އެކަމެއް ކުރުމަށް ﷲ ތަޢާލާ އަމުރުކުރައްވަވާފައި ކަންކަން ނުކުރުމެވެ. މި ދެ ގޮތުގައިވެސް އެމީހަކަށް އެކުރެވެނީ ފާފައެވެ.
ދެން އޮތީ ތިމާއަށް ކުރިމަތިކުރެއްވެވި މުޞީބާތަކީ ކޯފާއެއްކަން ނުވަތަ ނޫންކަން ދެނެގަތުމެވެ.
އިމްތިޙާނެއްގެ ގޮތުގައި ކަމެއް ކުރިމަތިކުރެއްވެވުމުން ﷲ ތަޢާލާއަށް ފުރިހަމަ ގޮތުގައި ވަކީލްކޮށް އެހައި ބޮޑަށް ކަންބޮޑުނުވެ ކެތްތެރިވެވިއްޖެނަމަ އެއީ އިމްތިޙާނެކެވެ. ލެއްވެވި ރަޙްމަތެކެވެ. ކެތްތެރި ނުވެވި އެކަމަށް ކަންބޮޑުވެ ތެޅިފޮޅި، އެމީހާގެ ނަފްސް ހަލާކާއި މަޑިކަމުގެ ތެރެއަށް ވައްޓައިލެވޭނަމަ އެކަންވުން ގާތީ ޢަޛާބަކަށެވެ. އެހެނީ ﷲ ތަޢާލާގެ ކޯފާއަށް ކެތްކުރެވޭނެ ހަމައެކަކުވެސް ނުހުންނާނެތީއެވެ.
"ތިމަން ﷲ އެމީހަކު ހިއްޕަވައިފިނަމަ ދޫނުކުރައްވަވާނެ" ކަމަށް އޮތް ވަޙީބަސްފުޅަށް ބިރުވެތިވާށެވެ! މިޙާލަތު މެދުވެރިކުރައްވަވާނީ ކުރިން ބުނި ބުނި ދެގޮތުން ކުރެ ގޮތެއް މެދުވެރިވުމުންނެވެ. އެއީ ﷲ ތަޢާލާގެ އަމުރުފުޅުތަކަށް ނުކިޔަމަންތެރިވުމުގައި ހައްދުފަހަނައަލައި ދިއުމުންނެވެ. ފާފަކުރުން ގިނަވުމެވެ. ކުރުމަށް އަމުރުފުޅު ކުރެއްވެވި ކަންކަން ނުކުރުމެވެ.
މީސްތަކުންނޭވެ! ކޮންމެ މީހަކަށްވެސް އމީހަކު ބޭނުން ގޮތަކަށް އުޅުމަށް ވަގުތު ދެއްވަވާނެތެވެ. އެވަގުތު ހަމަވުމުން ހިއްޕަވާނެތެވެ. ﷲ ތަޢާލާގެ ކޯފާ އައިސް އެމީހަކާއި އަރައި ހަމަކުރާނެތެވެ. އެހިސާބުން ދެން އެމީހަކަށް ސަލާމަތެއް ނުވެވޭނެތެވެ. ވީމާ މުޞީބާތްތައް ކުރިމަތިނުވުމަށް އެދޭ މީހާ ތައުބާވުމަށް އަވަސްވެގަންނާށެވެ!
--މުފްތީ މެންކުގެ ދަރުސަކުން
