މީސްތަކުންނަށް މިއަދު ކުރިމަތިވެފައިވާ އެންމެ ބޮޑު ވަބާއަކީ ކޮރޯނާ ވައިރަސްގެ ވަބާކަމަށް ބުނި ނަމަވެސް އެއަށްވުރެ މާ ނުބައިކަން ބޮޑު ބަލިމަޑުކަމެއްގެ ތެރެއަށް ގިނަ ބައަކު މިއަދު ވެއްޓިފައެވެ. އެކަމުގެ ޝިކާރައަކަށްވެފައެވެ.
އެއީ އެހެން މީހުންނަށް ﷲ ތަޢާލާ ދެއްވަވާ ނިޢްމަތްތައް ދެކެން އުނދަގޫވުމުގެ ބައްޔެވެ! މިބަލި ޖެހެނީ މީހާގެ ހިތަށެވެ. ކޮރޯނާ ވައިރަސް ޖެހުނު ނަމަވެސް ގިނަ ބައަކު އެކަމުން ސަލާމަތްވެއެވެ. ނަމަވެސް މިބުނި ހަސަދައިގެ ބަލި ހިތަށް ޖެހުމުން ސަލާމަތްވެވެނީ ވަރަށް މަދު މީހަކަށެވެ.
ކޮރޯނާ ވައިރަސްޖެހިގެން މަރުވިނަމަވެސް މުސްލިމުން ދާނީ ސުވަރުގެއެވެ. އިން ޝާ ﷲ ނަމަވެސް ހަސަދަވެރިކަމުގެ ބަލީގައި ހުރެ މީހަކު މަރުވެއްޖެ ނަމަ އެމީހަކަށް ގާތީ ސުވަރުގެ ނުލިބުންކަން ދީނުގައި އެނގެން އެބައޮތެވެ! ޤިޔާމަތް ދުވަހު ސަލާމަތްކަން ލިބުންވަނީ ސަލާމަތް ހިތަކާއިގެން ދެވުނު މީހަކަށްކަން ވަޙީ ބަސްފުޅުން އެނގެން އޮތުމުންނެވެ!
މީސްތަކުންނޭވެ! އަހަރެމެން މިކުރިމަތިލީ ބަރަކާތްތެރި ރަމަޟާން މަހަށެވެ. ވީމާ ފުރަތަމަ ކަމަކަށް ކޮންމެ ގޮތަކުން ނަމަވެސް މިނުބައި ބަލިން ސަލާމަތްވާން މަސައްކަތްކުރާށެވެ! ހިފާ ރޯދައިގެ ފުރިހަމަ ޘަވާބުވެސް ލިބުން އޮތީ އެއިރުން ކަމުގައިވާތީއެވެ.
- އިސްލާމީ ތިލަފަތުގެ ދަރުސަކުން
