ދުޢާ ކުރުމަށްފަހު ދުޢާ ޢިޖާބަ ނުކުރައްވަވާނެ ކަމަށް ޤަބޫލުކުރުމަކީ ކުރެވޭ އެންމެ ބޮޑު އެއް ފާފަކަމަށް ދީނީ ޢިލްމުވެރިން ބަޔާން ކުރައްވަވާ އެންމެ ބޮޑު އެއް ސަބަބަކީ "ދުޢާކުރާށެވެ! ޢިޖާބަކުރައްވަވާ ހުށީމެވެ!" މިފަދައިން ވަޙީކުރައްވަވާފައި އޮތުމުންނެވެ.
ޢިލްމުވެރިން ބަޔާންކުރައްވާ ގޮތުގައި ދުޢާ ޢިޖާބަ ނުކުރެއްވެވި ކަމަށް ނުވަތަ ޤަބޫލުފުޅު ނުކުރައްވަވާނެކަމަށް ޤަބޫލުކުރުމަކީ މި ވަޙީ ބަސްފުޅު ޤަބޫލު ނުކުރުމެވެ! ﷲ ތަޢާލާގެ އެންމެ ވަޙީ ބަސްފުޅަކަށްވެސް އިންކާރުކުރުމަކީ އެންމެ ބޮޑު އެއްފާފަ ކަމުގައިވެސްވާތީއެވެ.
ކޮންމެއަކަސް އަހުރެންގެ ވިސްނުމުގައި ދުޢާ ޢިޖާބަ ނުކުރައްވަވާނެ ނަމަ ދުޢާކުރުމުގެ ވިސްނުން އެމީހަކަށް ނުދެއްވަވާނެތެވެ! ދުއާ ކުރުމުގެ ވިސްނުން އެމީހަކަށް ދެއްވަވަނީ ދުޢާ ޢިޖާބަ ކުރައްވަވާނެތީއެވެ.
ވީމާ ދުޢާކުރަން ފަސްނުޖެހެންވީ، އަދި ދުޢާ ޢިޖާބަކުރައްވަވާނެކަމަށް ޝައްކުނުކުރަންވީ އެންމެ ބޮޑު ސަބަބަކީ މި ދެކަންތަކެވެ! ﷲ ތަޢާލާގެ އެންމެ ވަޢުދު ބަސްފުޅެއްވެސް ނުފުއްދަވަވައި ދޫނުކުރައްވަވާނެކަން ޔަޤީންކުރާށެވެ! އީމާންކަން ފުރިހަމަވާނީވެސް އެއިރުންނެވެ!
- އިސްލާމީ ތިލަފަތުގެ ދަރުސަކުން
