އަހަރެންނަކީ ހަކުރުބައްޔާއި ލޭމައްޗަށް ދިއުން އަދި ކޮލޮސްޓްރޯލް ަތިވެގެން ބޭސްކުރަމުން އަންނަ މީހަކީމެވެ. އަހަރެންގެ ޑޮކްޓަރަކީ މުސްލިމެއް ނޫނެވެ. ރޯދަ އާއި ގާތްވެފައިވަނިކޮށް ކަމަކު އޭނާއަށް ގުޅައިލުމުން ފުރަތަމަވެސް ސުވާލުކުރީ ރޯދަ ހިފާނަންތޯއެވެ؟ ޖަވާބުގައި ރޯދަ ހިފާނެކަމަށް ބުނުމުން ބުނީ ރޯދަ މަސް ނިމޭއިރު އަހަރެންގެ ބަލިތަކަށް ވަރަށް ބޮޑުތަނުން ލުއި ލިބޭނެކަމަށެވެ.
ސުވާލަކީ އޭނާ އެހެން އެބުނީ ކީއްވެގެން ހެއްޔެވެ؟ ޖަވާބަކީ އޭނާއަކީ މުސްލިމެއް ނޫން ނަމަވެސް ރޯދަ ހިފުމަކީ ބަލިތަކަށް އޮތް ޝިފާއެއްކަން އޭނާ ޤަބޫލުކުރާތީ ނޫން ހެއްޔެވެ؟ ނޫންނަމަ އެހެން ދީނެއްގެ މީހަކު ރޯދަހިފަން ހިތްވަރުދޭންވީ ކީއްވެގެން ހެއްޔެވެ؟
ރޯދަ ހިފުމުގެ ޞިއްހީ ފައިދާ ބޮޑަށް އިޙްޞާޞް ކުރެވެނީ އަލަށް އިސްލާމްވެ ރޯދަ ހިފަން ފަށާ މީހުންނަށެވެ. އެއީ އެމީހުންގެ ހަށިގަނޑަށް އަންނަ ބަދަލުތައް އެނގިގެންދާތީއެވެ. މިކަމުގެ ސަބަބުން މުސްލިމުން ނޫން ބައެއް މީހުންވެސް މިހާރު ގެންދަނީ މުސްލިމުންނާއި އެއްފަދައިން ރޯދަ ހިފަމުނެވެ. އެފަދަ ގިނަ ބައަކު ރޯދަ ހިފަނީ ސައިންސްވެރިންގެ ރިޕޯޓްތަކަށް ބަލައިގެންނެވެ. އެފަދަ ރިޕޯޓްތައް ނެރެފައިވަނީ މުސްލިމް ސައިންސްވެރިންނެއްވެސް ނޫނެވެ.
ރޯދަ ހިފުމުން އިންސާނާގެ ޞިއްހަތަށް ލިބޭ ފައިދާތައް ޑޮކްޓަރުން މިހާރު ގެންދަނީ ބަޔާން ކުރަމުންނެވެ. ބައެއް ހޯދުންތަކުން އެނގިފައިވާ ގޮތުގައި ރޯދަ ހިފުމަކީ ކޮލޮސްޓްރޯލް ދަށްވެ ހިތުގެ ބަލިތަކުން ސަލާމަތްކޮށްދޭ ކަމެކެވެ. ފަލަވެ ބަނޑުލުމައި ނަފްސާނީ ބަލިތަކުންވެސްމެއެވެ.
ހަމަ އެއާއިއެކު ރޯދަ ހިފުމަކީ ހަޖަމްކުރުމުގެ ބާރު އިތުރުވެ ހަށިގަނޑުގައި ހުންނަ ވިހަތައް ބޭރުވެގެންދާ ކަމެކެވެ. ހަމަ އެއާއިއެކު ހަށިގަނޑުން ހަލާކުވެފައިވާ ސެލްތައް ބޭރުވެ އައު ސެލްތައް ލުމަށް ނަގުފަހިކޮށްދޭ ކަމެކެވެ.
މިވާހަކަތައް ޤަބޫލުކުރަންވީ އަހަރެން ބުނެގެނެއް ނޫނެވެ! "ޝައިޚް ގޫގްލްސް" ސަރޗްކޮށްލާށެވެ! ފެންނާނެއެވެ!
- އިސްލާމީ ތިލަފަތުގެ ދަރުސަކުން
