މަޖީދީމަގު މައްޗަންގޮޅި ސަރަހައްދުގައި ޛިކްރާ މިސްކިތް ހުރިތަނުގައި އަޅާ މިސްކިތް އަޅަން ތަކެތި ޖަމާކުރަން ފަށައިފި އެވެ.
މިސްކިތް އަޅަން ބީލަމަށްލުމަށްފަހު އެކަން ބާޠިލުކޮށް މިސްކިތް އެޅުމުގެ ކަންކަން މިހާރު ކުރިއަށް ގެންދަނީ ސިފައންގެ ވެލްފެއާ ކުންފުންޏާއި އިސްލާމިކް މިނިސްޓްރީ ގުޅީގެންނެވެ.
ވަގުތީ މިސްކިތް އަޅައިދިނުން ފަދަ ކަންކަމުގައި ސިފައިން އަބަދުވެސް އަންނަނީ އެހީތެރިކަން ފޯރުކޮށްދެމުންނެވެ. އޯޑިއޯނު ހުރިތަނުގައި އެޅި ވަގުތީ މިސްކިތްވެސް އަޅާފައިވަނީ ސިފައިން 24 ގަޑިއިރުހެން ކުރި މަސައްކަތުންނެވެ.
މިސްކިތުގެ މަސައްކަތް ބީލަމަށްލުމުން މިއަދުނޫހުން ކަންބޮޑުވުން ފައުޅުކުރި އެއް ސަބަބަކީ ސިފައިންނަށް ނުހަނު ބޮޑު މަތިވެރި ޘަވާބުލިބެން އޮތް ކަމެއްގައި، އަދި ސިފައިން ނުހަނު ދީލަތިގޮތުގައި އެކަން އަބަދުވެސް ކޮށްދެމުން ދަނިކޮށް "ވިޔަފާރި" އަކަށްވެ ބޮޑެތި މާލީ މައްސަލަތައް ކުރިމަތިވެދާނެކަމަށްޓަކައެވެ.
