އަޅުގަނޑުގެ ފިރިމީހާ ގޭގައި ހުންނަ ވަޤުތުތަކުގައި އަޅުގަނދަށް އެހީތެރިވެދެއެވެ. ބަދިގޭ މަސައްކަތްވެސް ކޮސްދެއެވެ. އެހެންވެ ޢާއިލާގެ ބައެއް މީހުން ފިރިމީހާއަށް މަލާމާތްވެސް ކުރެއެވެ.
އަޅުގަނޑުގެ ސުވާލަކީ ފިރިން ބަދިގޭ މަސައްކަތްކުރުމަކީ އަނބިދަށުވުންތޯއެވެ؟
ކިޔުންތެރިޔާގެ ސުވާލަށް ތިރީގައިވާ ލިޔުމުން ޖަވާބުލިބޭނެ ކަމަށް އުންމީދުކުރަމެވެ.
މިއަދުގެ ގިނަ އަދަދެއްގެ ޒުވާނުންގެ ކިބައިން ނުބައި އަމަލުތައް ފެންނަވާހަކަ ދައްކާ ފަދައިން ފެންނަ ރަނގަޅު ކަންކަމުގެ ވާހަކަތައްވެސް ދައްކަންޖެހޭނެއެވެ. މިގޮތުން ބަލާއިރު ދުވަހުން ދުވަހަށް ޒުވާނުންގެ ކިބައިން ރަނގަޅުވެ އިޞްލާހްވަމުން އަންނަ ކަމަށް ޤަބޫލުކުރަންޖެހޭ ކަންކަމުގެ ތެރއިންވެސް އެންމެ ބޮޑަށް ފާހަގަކުރެވޭ ކަމަކީ ދަރިން ބެލުމާއި ގޭތެރޭގެ މަސައްކަތެކެވެ.
މިއަދު ވަރަށް ގިނަ އަދަދެއްގެ ޒުވާނުން ގޭގައި ކައްކައެވެ. ގޭތެރެ ސާފުކުރެއެވެ. އެއްޗެތިވެސް ދޮވެއެވެ. އިސްތިރިވެސްކުރެއެވެ. ދަރިންވެސް ބަލައެވެ. މިފަދަ ކަންކަން ކުރުމުން އެއީ އަނބިދަށުވުން ކަމަށް ބައަކު ޤަބޫލުކުރިނަމަވެސް އެއީ އެއްވެސް ޙާލެއްގައި އަނބިދަށުވުމެއް ނޫނެވެ. އެފަދަ ޒުވާނުން ކުރިހޯދައި އެދަނީ ސުންނަތަށް ޢަމަލުކުރުމުގައެވެ. އަނބިންނަށް އެހީތެރިވެވަޑައިގެން ދެއްވެވުމާއި ގޭތެރޭގެ މަސައްކަތްކުރެއްވެވުމުގައި ރަސޫލް (ޞޢވ) އަކީ މުޅި ދުނިޔެއަށްވެސް ލާމަސީލު ނަމޫނާ ޝަޚްޞިއްޔަތެކެވެ.
ދިރިއުޅެމުންދާއިރު އެންމެ މުހިންމު ކަމަކީ ހަޔާތުގެ ބައިވެރިޔާ އެދޭކަންކަމުގެ ތެރެއިން ﷲ ތަޢާލާ ހުއްދަކުރެއްވެވި ހުރި ކަމެއްވެސް ކޮށްދިނުމެވެ. އެމީހެއްގެ ކިބައިގައި ޤާބިލުކަން ހުރި މިންވަރަކުންނެވެ. އެއްވެސް ހާލެއްގައި ތިމާގެ ބާރު ދައްކައި ތިމާއަށް ކުރެވޭ ކަންކަމަކީ އެންމެ ރަނގަޅު ކަންކަން ކަމުގައި ދައްކައި، ވަކާލާތު ކުރުމެއް ނެތެވެ.
މިހާރަކަށް އައިސް އަނބިމީހާ ހިތްހަމަ ޖައްސަން މިފަދަ ކަންކަން ކުރާ މީހުންނަށް މަލާމާތުގެ ބަސްތައް ވެސް އެބަ ބުނެއެވެ. އެއީ އެކަމުގެ މުހިންމުކަން ނުއެނގޭތީއެވެ. ޒުވާނުންނަށް ބުނާނީ އަނބިމީހާ ރުހޭނެ ވީހައި ގިނަ ކަންކަން ކުރާށެވެ! އެކަމުގައި އެހެން މީހުން ބުނާ ބަހަށް ނުވެސް ވިސްނާށެވެ! އަނބިމީހާގެ ރުހުން ލިބުމުން ކުރާނެ ފައިދާ މާ ބޮޑެވެ. އަދި ހަމަ އެފަދައިން ފިރިމީހާގެވެސް މެއެވެ.
ހެދުން އެޅުމުގައިވެސް މިކަމަށް ސަމާލުކަން ދޭންވާނެއެވެ. އިސްލާމް ދީނުގެ އިންތަކުގެ ތެރެއިން ބައިވެރިޔާ ރުހޭ ގޮތަށް ހެދުން ލުމަށް އިސްކަން ދޭންވާނެއެވެ. ބަލަންވީ އެހެން ބައަކު ރުހޭ ގޮތަކަށް ހެދުންލައިގެން އުޅުމަކަށް ނޫނެވެ.
ވަރަށް ބޮޑަށް އިހްމާލް ވެވޭ އެއްކަމެއް އެބައޮތެވެ! އެއީ ބައިވެރިޔާ ކުރާ ރަނގަޅުކަންކަމަށް ޝުކުރު އަދާކުރުމެވެ. ބައެއް މީހުންނަށް ހީވަނީ ބައިވެރިޔާ ކަމެއް ކޮށްދިނުމުން ޝުކުރު އަދާކުރަން ނުޖެހޭނެ ކަމަށެވެ. އެއީ އެހެން އޮތް ކަމެއް ނޫނެވެ! ގިނަގިނައިން ޝުކުރު އަދާކުރުމަކީ ދެމަފިރިންގެ މެދުގައި ލޯބި އިތުރުވާ ކަމެކެވެ.
- މުފްތީ މެންކުގެ ދަރުސަކުން
