ދަރިން ދެއްވެވުން އެދި ދުޢާކުރާއިރު ބައެއް މީހުން ދުޢާކުރަނީ އަންހެން ދަރިއަކު ދެއްވެވުމަށެވެ. އަނެއްބައަކު ދުޢާކުރަނީ ފިރިހެން ދަރިއަކު ދެއްވެވުމަށެވެ. ނަމަވެސް މިއީ ދުޢާކުރަން ރަނގަޅު ގޮތެއް ނޫނެވެ.
ދުޢާކުރަންވާނީ އެދަރިއެއްގެ ސަބަބުން މިއަޅާއަށް އުފަލާ ހިތްހަމަޖެހުން ލިބޭނެ، ﷲ ތަޢާލާގެ މަގުގައި ޘާބިތުވެހުންނާނެ ދަރިއަކު ދެއްވެވުމަށެވެ. ދުޢާގައި ފިރިހެން ދަރިއަކު ނުވަތަ އަންހެން ދަރިއަކު ދެއްވެވުމަށް ލޯބިކުރާ ކަމަށް ދެންނެވުމަކީ މައްސަލައެއް ނޫނެވެ. އެއީ ނުދެންނެވި ނަމަވެސް ތިބާގެ ހިތް އެދޭގޮތް ﷲ ތަޢާލާ ދެނެވޮޑިގެންވެއެވެ.
އެއްވެސް ކަމަކަށް އެދި ﷲ ތަޢާލާއަށް ދުޢާކުރާއިރު ދުޢާގެ ދާއިރާ ހަނިނުކުރާށެވެ. އެކަން ﷲ ތަޢާލާއަށް ވަކީލްކުރައްވަވާށެވެ. ދެއްވަވާނީ އެންމެ ފައިދާކުރާނެ ދަރިފުޅުކަން ހިތުގައި ޔަޤީންކުރާށެވެ.
އެއްވެސް ދަރިއަކު ނުދެއްވަވާ ކިތައް މިލިއަން މީހުން ދުނިޔޭގައި އެބަތިބިހެއްޔެވެ؟ އެހެންވީމާ ދަރިއަކަށް ބޭނުންވެގެން ﷲ ތަޢާލާއަށް ދެންނެވުމުން ދަރިއަކު ދެއްވަވައިފިނަމަ އެކަމަށް ޝުކުރުވެރިވާންޖެހޭނެ މިންވަރު ހިތަށް ގެންނާށެވެ.
ތިމާއަށް ދެއްވަވާނީ ތިމާއަށް ލިބެން ﷲ ތަޢާލާ އެންމެ ރުހިވޮޑިގަންނަވާ ދަރިފުޅުކަން ޔަޤީންކުރުމުން ލިބުނު ދަރިފުޅުގެ ޖިންސާއިމެދު ކަންބޮޑުވާކަށް ނުޖެހޭނެއެވެ.
- މުފްތީ މެންކުގެ ދަރުސަކުން
