މިހާރަކަށް އައިސް އެންމެ ގިނައިން ކުރެވޭ އެއް ސުވާލަކީ ރަހްމާންވަންތަ ރަޙީމްވަންތަ ރަސްކަލާނގެ މީސްތަކުން ނަރަކައަށް ވައްދަވަނީ ކީއްވެގެން ހެއްޔެވެ؟
ސުވާލުގެ ޖަވާބަށް ދިއުމުގެ ކުރިން އަހުރެން ކަލޭމެން އެންމެންނާއި ބައެއް ސުވާލު ކުރާނަމެވެ. އެއްސުވާލަކީ އަހުރެމެންގެ ލޮލަށް ﷲ ތަޢާލާގެ ދީދާރުފުޅު ނުފެނުނު ކަމުގައިވީނަމަވެސް ﷲ ތަޢާލާ ވޮޑިގެންވާކަމާއި އެންމެހައި ބާރުތަކެއް ލިބިވޮޑިގެންވަނީ ﷲ ތަޢާލާއަށް ކަމުގެ ހެކިތައް ނުފެންނަނީހެއްޔެވެ؟
ދެވަނަ ސުވާލަކީ މަރުވާނެކަމާ ޙިސާބުބައްލަވާނެކަން ނުއެނގެނީހެއްޔެވެ؟
ތިންވަނަ ސުވާލަކީ އަހުރެމެންނަށް ހުރިހާ ނިޢުމަތްތަކެއް ދެއްވަވަނީ ﷲ ތަޢާލާކަން އެނގިތިބެމެ، ﷲ ތަޢާލާ ދެއްވަވާ ނިޢުމަތްތަކަށް ޝުކުރުވެރިވެވޭ ހެއްޔެވެ؟
ދެން މިދެނީ ތިއަކުރާ ސުވާލުގެ ޖަވާބެވެ. ނަރަކައަށް ވަންނަން ޖެހެނީ ﷲ ތަޢާލާ ވޮޑިގެންވާކަން އެނގޭއިރު، މަރުވާނެކަންވެސް އެނގޭއިރު، ޙިސާބު ބެއްލެވޭނެކަންވެސް އެނގޭއިރު ﷲ ތަޢާލާ ދެއްވެވި ނިޢުމަތްތަކަށް ޝުކުރުވެރިނުވެވޭތީއެވެ. ޝުކުރުވެރިވެވިއްޖެނަމަ ނަރަކައަށް ވަންނާކަށް ނުޖެހޭނެއެވެ. ޝުކުރުވެރިވާ އަޅުން ﷲ ތަޢާލާގެ އަމުރުފުޅުތަކަށް ކިޔަމަންތެރިވާނެއެވެ.
ދެން އޮތީ ﷲ ތަޢާލާ ވޮޑިގެންވާކަން ޤަބޫލުނުކުރާ މީހުންނަށް ދޭން އޮތް ޖަވާބެވެ! އެމީހުންނަށް ނަރަކައަށް ވަންނަން ޖެހެނީ ވިސްނައި ފިކުރުކުރަން އެމީހުންނަށް ﷲ ތަޢާލާ ދެއްވެވި ބުއްދީގެ ބޭނުން ނުކުރީތީއެވެ. ބުއްދީގެ ބޭނުންކުރާނަމަ ﷲ ތަޢާލާ ވޮޑިގެންވާކަން ވިސްނޭނެއެވެ.
ވީމާ ކޮންމެ މީހަކަށްވެސް ނަރަކައަށް ވަންނަން ޖެހެނީ އެމީހާގެ ކުށުންނެވެ. ﷲ ތަޢާލާ އެއްވެސް މީހަކު ނަރަކައަށް ވައްދަވަނީއެއް ނޫނެވެ. އެމީހަކު އަމިއްލައަށް ވަންނަނީއެވެ. އަދި އެހެންވެ ކޮންމެ މީހަކުވެސް ނަރަކައަށް ވަންނާނީ އެމިހާގެ ކުށަށް އަމިއްލައަށް އިޢްތިރާފްވެ ނަރަކައަށް ވަނުން ޙައްޤުވެއްޖެކަމަށް ޤަބޫލުކުރާ ޙާލުގައެވެ.
- އިސްލާމީ ތިލަފަތުގެ ދަރުސަކުން
