އަހުރެން އިންޑޮނޭސިއާއަށް ކުރި ދަތުރެއްގައި އެ ޤައުމުގައި މަސައްކަތްކުރާ ރަސިޔާގެ ސިޙުރުވެރިޔަކު ދެއްކި ވާހަކަ އަޑުއެހީމެވެ. އެއީ އަންހެނަކެވެ. އޭނާ އާއި ސުވާލުކުރެވުނެވެ. "ކަލޭ ތިއަކުރާ މަސައްކަތުގައި އަތުލައިގަންނަން ނުވަތަ އެބައެއްގެ މައްޗަށް ބާރު ހިންގަން އެންމެ ބޮޑަށް އުނދަގޫވާ ބައަކީ ކޮބައިހެއްޔެވެ؟ އެފަދަ ބައަކު ވޭހެއްޔެވެ؟"
ޖަވާބުގައި އޭނާ ބުންޏެވެ. "އެބައެއްގެ މައްޗަށް ބާރުހިންގަން އުނދަގޫވާ ބައަކު ވެއެވެ. އެއީ އިސްލާމް ދީނަށް ޢަމަލުކުރާ މުސްލިމުންނެވެ. އެމީހުން ރައްކައުތެރިކޮށް ޙިމާޔަތްކޮށްދޭނެ ޤުއްބެއް ފަދަ އެއްޗެއް އެމީހުންގެ ވަށައިގެންވެއެވެ."
ވިސްނާށެވެ! އެހެން އެބުނީ މުސްލިމެއްވެސް ނޫނެވެ. އެކަމަކުވެސް ތެދުބަހުން އޭނާއަށް އެބުނެވުނީ ކަންކަން ހިނގަމުން އަންނަ ގޮތެވެ. އެކަން ހިނގަމުންދާނެވެސް ގޮތްމެއެވެ.
އަހުރެމެންގެ އަތުގައި ޤުރްއާން އެބައޮތެވެ. އަހުރެމެންނަށް ކިޔެވޭ ހެއްޔެވެ؟ ޢަމަލުކުރެވޭ ހެއްޔެވެ؟ އިސްލާމް ދީނަށް އެބަ ޢަމަލުކުރެވޭ ހެއްޔެވެ؟
އިސްލާމް ދީނަށް ޢަމަލުކުރާ މީހާ ފަތިސްނަމާދުކުރާނެއެވެ. އެއިރުން އެމީހަކަށް ﷲ ތަޢާލާ ރައްކައުތެރިކަން ދެއްވަވާނެތެވެ. އަދި ދެއިރު ކިޔަންހުރި ޛިކުރުތައްވެސް ކިޔާނެތެވެ. އެއީވެސް އެމީހަކަށް ﷲ ތަޢާލާ ރައްކައުތެރިކަން ދެއްވަވާނެ ކަމެކެވެ. މީގެ އިތުރުން ފުރިހަމަ ގޮތުގައި އިސްލާމް ދީނަށް ޢަމަލުކުރާ މީހުންގެ ރައްކައުތެރިކަމުގައި މަލާއިކަތުން ތިއްބަވާނެތެވެ. އެފަދަ މީހަކަށް ގެއްލުންދީ ގޯނާކުރެވޭނީ ކާކަށް ހެއްޔެވެ؟
- މުފްތީ މެންކުގެ ދަރުސަކުން
