ޤަވާޢިދުކޮށް ނަމާދުކުރުމަކީ ނުވަތަ ނަމާދު ޤާއިމުކުރުމަކީ ކުރަން އެންމެ ފައިދާހުރި ކަންތައް ކަމުގައި ވެގެންދާ ސަބަބުތައް ވަރަށް ގިނައެވެ. އެއިގެ ތެރޭގައި، ފާފަކުރަން ބިރުވެތިވެ ފާފަނުކުރަން މަސައްކަތްކުރެވުންވެސް ހިމެނެއެވެ. މިއީ ކޮންމެ މީހެއްގެ އާޚިރަތަށްވެސް އެންމެ ފައިދާކުރާނެ އެއްކަންތަކެވެ.
މީހާގެ ރޫޙަށް ބޭނުންވާ ކާނާލިބި ނަފްސަށް ހިތްހަމަޖެހުން ލިބުންވެސް ހިމެނެއެވެ. ރިވެތި އަޚްލާޤްގެމަތީގައި ދިރިއުޅެން މަގުފަހިވުންވެސް ހިމެނެއެވެ. އަދި ހާސްކަމާއި ކަންބޮޑުވުންތަކުން ސަލާމަތްވެވިގެން ހުރުންވެސް ހިމެނެއެވެ.
މި 3 ކަންތަކަކީވެސް މީހާއަށް އެންމެ ފައިދާކުރާނެ ކަންކަމެވެ. ބޭރުފުށުން ކިތަންމެ ބޮޑު މުއްސަނދިކަމެއްގައި ދިރިއުޅުނަސް ރީޙަށް ހިތްހަމަޖެހުން ނުލިބޭނަމަ އެމީޙަކަށް ހުރެވޭނީ އުފާވެރިކަމެއް ނެތިއެވެ. އެމީހެއްގެ ކިބައި ރިވެތި އަޚްލާޤީ ސިފަތައް ނެތްނަމަ މީސްތަކުންގެ ލޯތްބެއް ނުލިބޭނެއެވެ. އަމިއްލަ ޢާއިލާއިންވެސް ލޯތްބެއް ނުލިބޭނެއެވެ.
ހާސްކަމާއި ކަންބޮޑުވުންތަކުގައި އުޅެންޖެހޭ މީހަކަށް އެއްވެސް ކަމެއް ކުރަންވާ ގޮތަށް ރަނގަޅަށް ކުރަން ހުރަސްތަކެއް ހުންނާނެއެވެ. ތިމާއަށް އެންމެ ފައިދާހުރިގޮތާއިމެދު ވިސްނައި އެންމެ ފައިދާހުރި ގޮތަށް ކަންތައްތައް ކުރަންވެސް ހުރަސްތަކެއް ކުރިމަތިވާނެއެވެ.
ކިތަންމެ ބޮޑު ތަކްލީފެއް އުފުލަންޖެހިފައިވީނަމަވެސް، ކިތަންމެ ބޮޑު ހިތްދަތިކަމެއްގައި އުޅެންޖެހުނަސް ނަމާދު ނުއަޅައި ނަމާދު ޤާއިމުކުރާ މީހަކަށްވާން ބުންނަންޖެހެނީ މިފަދަ އެތައް ސަބަބުތަކެއް ހުރުމުންނެވެ. ދުނިޔަވީ ދިރިއުޅުމުގައި ފައިދާކުރާނެ ކަންތައްތަކެއް ހުރުމުންނެވެ. މިބުނެލި 4 ކަންތަކުންވެސް އެކަން އެނގިގެންދާނެއެވެ. އިން ޝާ ﷲ
- އިސްލާމީ ތިލަފަތުގެ ދަރުސަކުން
