ކަންކަމުގައި އަވަސް އަރުވާލައި ކަމުގެ ހަޤީޤަތް ނުބަލައި އެހެން މީހުން ކުށްވެރިކުރަން މަސައްކަތްކުރާ މީހުންނަކީ އެމީހުންގެ ކުށް ނުވަތަ އިހްމާލް ބޮޑު މީހުންނެވެ. އެހެންވެ އެ މަސައްކަތްކުރަނީ އެކަމަކުން އަވަހަށް ތިމާ ސަލާމަތްވުމަށެވެ.
ކަމެއް ދިމާވުމުން ސަބަބު އޮޅުން ނުފިލުވައި ޝަކުވާކުރާ މީހުންނަކީ އެމީހުންނަށް ވިސްނުނީ އެންމެ ރަނގަޅަށް ކަމަށް ޤަބޫލުކުރާ މީހުންނެވެ. އެފަދަ މީހުން އެހެން މީހުން ދައްކާ ވާހަކަ އަޑުއަހަންވެސް ބޭނުމެއް ނުވާނެއެވެ. އަދި ކަމެއް ކުރިމަތިވުމުން ރުޅި އަންނަން އަވަސްވެގަންނަ މީހުންނަކީވެސް ތިމާގެ ކުށްތައް ފޮރުވަން މަސައްކަތްކުރާ މީހުންނެވެ. އެފަދަ މީހުން އެހެން މީހުން ދައްކާ ވާހަކަ އަޑުނާހަން މަސައްކަތްކުރާނެއެވެ.
ހަމަ އެއާއިއެކު ވާހަކަ ދެއްކުމުގައި މެދުމިން ގެންގުޅޭނަމަ އަދި ވާހަކަ ދެއްކުމުގައި އަދަބުވެރިވެ، ތިމާއަށް ކަމެއް ދިމާވިނަމަވެސް މަޑުމައިތިރިކަމާއިއެކު ވާހަކަދެއްކޭނީ އެމީހެއްގެ ކިބައިގައި ހަރުދަނާކަން ހުރެގެންނެވެ. އަދި އެކަން ކުރެވޭނީ ޢަޒުމް ވަރުގަދަ، ފިސާރި ސާބިތު މީހުންނަށެވެ.
ވީމާ މީހުންނާއި ކުރެވޭ މުޢާމަލާތުތަކުގައި ނުވަތަ ބައްދަލުވުމުން މިސިފަތައް ހުރިކަން ބަލާށެވެ. އެއިރުން އެމީހާގެ ޙަޤީޤީ ސިފަ ދެނެގަންނަން ފަސޭހަވެގެންދާނެއެވެ.
- އަލަފް / މިއަދުނޫސް
