އެއްވެސް މީހަކު ތިބާ އާއިމެދު ދެކޭ ގޮތަށް ކަންބޮޑުނުވާށެވެ. ފޭރާން ލައި ނުވާވެގެން ހުރިނަމަވެސް ފާޑުކިޔާ ބައަކު އުޅޭނެއެވެ. ﷲ ތަޢާލާއަށް އަޅުކަންކުރިނަމަވެސް ފާޑުކިޔާ ބައަކު އުޅޭނެއެވެ. އެއީ ހުއްޓުވޭނެ ކަންކަމެއް ނޫނެވެ.
އެންމެ 3 ކަމެއް ޔަޤީންކުރާށެވެ! ތިމާއަށް ޢަމަލު މިކުރެވެނީ ﷲ ތަޢާލާ އެންގެވިގޮތަށް ކަމެވެ. މަސައްކަތް މިކުރަނީ ﷲ ތަޢަލާގެ ރުހިވޮޑިގަތުން ހޯދަން ކަމެވެ. ބޭނުންވެގެން މިއުޅެނީ ﷲ ތަޢާލާގެ ރުހިވޮޑިގަތުން ލިބި ސުވަރުގެ ވަނުމަށް ކަމެވެ.
މި 3 ކަންތައް ޙާޞިލްކުރަން މަސައްކަތްކުރުމުގައި ފަސްއެނބުރި ނުބަލާށެވެ! މީހުން ކިޔާ އެއްޗަކަށް ނުވަތަ ބުނެފާނެ ބަހަކަށް ކަންބޮޑުނުވާށެވެ. ﷲ ތަޢާލާގެ ޙަޟްރަތުން މެނުވީ އެއްވެސް ކަމެއް ލިބުމެއް ނެތެވެ. އަދި އެއްވެސް ގެއްލުމެއް ލިބުމެއްވެސް ނެތެވެ.
ދަރަޖަ މަތިވެރިކުރައްވަވާނީވެސް، އުފާވެރިކަމާއި ހިތްހަމަޖެހުމާއި ތަނަވަސްކަން އަދި މިނޫން ނިޢުމަތެއްވެސް ލިބޭނީ ހަމަ ﷲ ތަޢާލާ ދެއްވެވުމުންނެވެ. އިންސާނުންނަށް ބޭނުންވާ އެއްވެސް ނިޢުމަތެއް ލިބުމަކަށް އެއްވެސް މީހެއްގެ ކިބައިން އެއްވެސް ކަމަކަށް ބޭނުމެއް ނުވާނެއެވެ. މީހަކު މެދުވެރިކުރައްވަވައިވެސް ކަންކަން ހިންމަވައިދެއްވަވާނީ ހަމަ ﷲ ތަޢާލާއެވެ.
ﷲ ތަޢާލާ އަންގަވާފައިވާ ގޮތަށް އުޅުމުން ސުވަރުގެ ވައްދަވާނީ ވެސް ﷲ ތަޢާލާއެވެ. ޤިޔާމަތް ދުވަހު އެއްވެސް މީހެއްގެ އެހީތެރިކަމަކަށް ބޭނުމެއް ނުވާނެއެވެ. އެއްވެސް މީހަކަށް ކޮށްދެވޭނެ އެއްވެސް ކަމެއް ނުވެސް އޮންނާނެއެވެ.
ﷲ ތަޢާލާއީ:
مَالِكِ يَوْمِ الدِّينِ
"ޤިޔާމަތް ދުވަހުގެ ވެރި ރަސްކަލާނގެއެވެ."
ވީމާ މީހުން ނުވަތަ މީހަކު ކިޔައިފާނެ އެއްޗަކަށް ކަންބޮޑުނުވާށެވެ! ކަންބޮޑުވާންވީ ހަމައެކަނި ﷲ ތަޢާލާ އަންގަވާފައިވާ ގޮތަށް ޢަމަލުނުކުރެވިދާނެކަމަށްޓަކައެވެ. އެނޫން އެއްވެސް ކަމަކަށް ކަންބޮޑުވުމެއް ނެތެވެ.
- މުފްތީ މެންކުގެ ދަރުސަކުން
