ކީރިތި ޤްރުއާނުގައި ވަނީ ﷲ ތަޢާލާގެ ވަޙީ ނަމަވެސް
އެއީ ހަމަ އެކަނި ﷲ ތަޢާލާގެ ބަސްފުޅުތަކެއް ކަމަށް ވިސްނައި އެހިސާބުން ނިންމައިނުލާށެވެ! ކީރިތި ޤްރުއާނުގެ މަތިވެރިކަން އެއަށްވުރެ މާބޮޑެވެ. ކީރިތި ޤްރުއާނުގައި ވަނީ ﷲ ތަޢާލާގެ އެންގެވުންތަކެވެ. އަމުރުފުޅުތަކެވެ. އެކަންކަމަށް ނުވިސްނައި ވާހަކަފޮތެއް ކިޔައިލާ އުޞޫލުން ކީރިތި ޤްރުއާން ކިޔަވައިލުމަކުން އަދި ނުފުދޭނެއެވެ. މާނަ އެނގެން ޖެހޭނެއެވެ.
ކީރިތި ޤްރުއާން ބާވައިލެއްވެވީ ޢަރަބި ބަހުން ކަމަށްވުމުން މާނަ ނުއެނގޭ ކަމަށް ބުނެވޭނެ އެއްވެސް ހަމައެއް މިއަދަކު ނެތެވެ. ކީރިތި ޤްރުއާން ތަރުޖަމާ ކުރެވިފައިވާ ބަހެއް ނެތްކަމަށް ބުނެވޭހައި ގިނަ ބަސްތަކަށް މިހާރު ކީރިތި ޤްރުއާން ވަނީ ތަރުޖަމާ ކޮށްފައެވެ. ވީމާ މާނަ ނުއެނގޭ ކަމަށް ބުނެ ދެއްކޭނެ އެއްވެސް ޙުއްޖަތެއް މިހާރަކު ނެތެވެ.
ކީރިތި ޤްރުއާނުގައިވާ ﷲ ތައާލާގެ އަމުރުފުޅުތައް އެނގޭނަމަ ހިތަށް ބިރުވެރިކަން އިޙްޞާޞްކުރެވޭ މިންވަރު އެތައް ގުނައަކަށް އިތުރުވާނެއެވެ. އެހެން މީހަކު މާނަ ކިޔައި ދިނުމުން ހިތަށް ކުރާ އަސަރަށްވުރެ ތިމާ އަމިއްލައަށް އުނގެނުމުން ކުރާ އަސަރު އެތައް ގުނައެއް ބޮޑުވާނެއެވެ.
ކީރިތި ޤްރުއާން ކިޔެވުމުގެ އިތުރުން ކީރިތި ޤްރުއާން އުނގެނެން މަސައްކަތްކުރާށެވެ! ރަމަޟާންމަހަކީ ކީރިތި ޤްރްއާނުގެ މައްސަރެވެ! އެމަހުގައި ކުރާ މަސައްކަތުގެ ބަރަކާތްވެސް އެތައް ގުނައެއް އިތުރުވާނެއެވެ. މާނަ ދަސްކުރަން ވެސް ފަސޭހަވާނެއެވެ. އާޚިރަތް ދުވަހު ސަލާމަތްކަމެއް ލިބުން އޮތީ ކީރިތި ޤްރުއާން އުނގެނި ޢަމަލުކުރި މިންވަރަކުންނެވެ.
ތިބާ މަރުވީ އުމުރުން 60- 70 އަހަރުވީ ފަހުންނެވެ. އުމުރުގެ ހުރިހާ ދުވަސްވަރެއްގައިވެސް ތިބާ ޤްރުއާން ކިޔެވިއެވެ. ނަމަވެސް މާނައެއް ނުއެނގެއެވެ. ﷲ ތަޢަލާގެ އެންގެވުންތަކެއް ނުއެނގެއެވެ. މާދަމާ މަރުވެ ކައްވަޅަށް ތިރިކުރެވުމުން ކުރެވޭ ސުވާލުތަކަށް ދޭނީ ކޮން ޖަވާބެއް ހެއްޔެވެ؟ އާޚިރަތް ދުވަހު ﷲ ތަޢާލާގެ ކުރިފުޅުމަތީގައި ދަންނަވާނީ ކީކޭ ހެއްޔެވެ؟
--މުފްތީ މެންކުގެ ދަރުސަކުން
