އެއްވެސް މީހަކީ މައްސަލަތަކުން ސަލާމަތްވެވިގެން ހުރެވޭ މީހެއް ނޫނެވެ. މައްސަލަތައް އަބަދުވެސް ކުރިމަތިވާނެއެވެ. އެއީ ދުނިޔޭގެ ސުންނަތަކަށްވާތީއެވެ. އެކަން އެގޮތަށް ﷲ ތަޢާލާ މެދުވެރިކުރައްވަވާތީއެވެ.
ކަންކަން ކުރިމަތިވުމުން ގިނަ ބައަކަށް ވިސްނެނީ އެކަން ޙައްލުކުރެވޭނީ ތިމާއަށް ކަމަށެވެ. ބުނަން ހެއްޔެވެ؟ ކޮންމެ ކަމަކުން އަރައިގަތުމަށްވެސް މަސައްކަތްކުރަންވާނެއެވެ. ނަމަވެސް އަރައިގަނެވޭނީ ﷲ ތަޢާލާ އިރާދަކުރެއްވެވުމުންނެވެ. އެކަމުން އެނގެނީ އަހުރެމެންނަށް ކުރިމަތިވާ ކޮންމެ ޙާލަތަކާއި ގުޅިގެންވެސް ﷲ ތަޢާލާ އަހުރެމެންނާއިއެކު ވޮޑިގެންވާ ކަމެވެ. އެކަމެއް ޙައްލުކުރަން މަސައްކަތްކުރަމުން ﷲ ތަޢާލާގެ ޙަޟްރަތުން ވާގިއެދުމުން އެކަމެއް ﷲ ތަޢާލާ ޙައްލުކޮށްދެއްވަވާނެ ކަމެވެ.
ﷲ ތަޢާލާގެ ވަޙީބަސްފުޅުން އެނގެނީ އެމީހަކު ﷲ ތަޢާލާއާއިމެދު ވިސްނާ ގޮތަކަށް އެމީހަކާއިއެކު ﷲ ތަޢާލާ ވޮޑިގެންވާނެ ކަމެވެ. ވީމާ އަހުރެމެންނަށް ކުރަންޖެހޭ ފުރަތަމަ ކަމަކީ އެންމެ ފުރިހަމަ ގޮތުގައި ﷲ ތަޢާލާއަށް ކިޔަމަންތެރިވުމެވެ. ދެން ކުރަން އޮތް ކަމަކީ ﷲ ތަޢާލާގެ ޙަޟްރަތުން ވާގިއެދުމެވެ. އެއަށްފަހު ކުރަން އޮތްކަމަކީ ތިމައާއިއެކު ﷲ ތަޢާލާ ވޮޑިގެންވާކަން ޔަޤީންކުރުމެވެ.
ވަރަށް ޔަޤީންކަމާއިއެކު ބުނަމެވެ. މިމަގުން ވިސްނައި ޢަމަލުކުރާ މީހަކު ނިކަމެތި ނުކުރައްވަވާނެތެވެ. އެމީހަކަށް ބޭނުންޖެހިފައިވާ ކަންކަން ފުއްދަވައި ދެއްވަވާނެތެވެ.
ޔާ ﷲ! އަޅަމެންގެ ތެރެއިން ތަކްލީފްތައް އުފުލަންޖެހިފައިވާ އެންމެން އެކަންކަމުން މިންޖުކޮށްދެއްވަވާނދޭވެ! އަޅަމެންނަށް ރުހިވޮޑިގަންނަވާނދޭވެ! އަޅަމެން ނިކަމެތިވާން ދޫކޮށް ނުލައްވަވާނދޭވެ! އާމީން
- އިސްލާމީ ތިލަފަތުގެ ދަރުސަކުން
