އޭނާއަކީ ބުދުހަދައި އެތަކެއްޗަސް އަޅުކަން ކުރި މީހެކެވެ. 70 އަހަރުވަންދެން އޭނާ ކޮންމެ ދުވަހަކު ''ޔާ ސަނަމް" ކިޔައި އުޅުނެވެ. ނަމަވެސް އެއް ދުވަހަކު އޭނާއަށް ދޫ އޮޅިގެން "ޔާ ޞަމަދު" އެވެ ކިޔުނެވެ. (ޞަމަދު އެއީ ﷲ ތަޢާލާގެ ނަންފުޅެކެވެ. މާނައަކީ ހުރިހާ ކަމަކުން ފުދިވޮޑިގެންވާ އިލާހްއެވެ.)
އޭނާއަށް އެފަދައިން ކިޔުމާއިއެކު "ތިމަން ﷲ ވޮޑިގެންވަމެވެ." ﷲ ތަޢަލާ ވަޙީ ކުރެއްވެވިއެވެ. އެހިނދު މަލާއިކަތުން ދެންނެވިއެވެ. "އޭނާއަށް ޖަވާބު ތިއަ ދެއްވެވީ ކީއްވެގެންތޯއެވެ؟ އޭނާއަށް އެހެން ކިޔުނީ ޤަޞްދްކުވެސް ނޫނެވެ. އެހިނދު ﷲ ތަޢާލާ ވަހީ ކުރެއްވެވިއެވެ. "އޭނާ ތިމަން ﷲގެ މަގަށް ރުޖޫޢަވުމަށް 70 އަހަރު އިންތިޒާރު ކުރައްވައިފީމެވެ."
މީސްތަކުންނޭވެ! ﷲ ތައާލާގެ ދީލަތިވަންތަކަމާއިމެދު ނިކަން ވިސްނައި ފިކުރުކޮށްބަލާށެވެ! އަހަރެމެން އެންމެ ފަހަރަކު ﷲ ތަޢާލާއަށް "ޔާ ﷲ" ދަންނަވައިފިނަމަ 70 ފަހަރު ﷲ ތަޢާލާ އަހަރެމެންނަށް "ޔާ ޢަބްދީ" އިޖާބަ ދެއްވަވައެވެ.
އަހަރެމެން ދެކެ އެންމެ ލޯބިވަނީ މައިން ކަމަށް އެބަ ބުނަމުއެވެ. ނަމަވެސް ދަރިއަކު 5 ފަހަރު މަންމައަށް ގޮވައިފިނަމަ އެވަގުތަކު ރުޅި އާދެވެއެވެ. ނަމަވެސް ﷲ ތަޢާލާ އަހަރެމެންނާއިމެދު ކަންތައްތައް އެކުރައްވަވަނީ އެހެންނަކުން ނޫނެވެ. އެންމެ ފަހަރަކަށް 70 ފަހަރު އިޖާބަ ދެއްވަވަނީއެވެ. އެހެންކަމާއިއެކުވެސް އަހަރެމެންނަށް މިއުޅެނީ އެކަން ޤަބޫލު ނުކުރެވިގެންނެވެ. އިރުއަރައި އޮއްސޭއިރު އެންމެ ފަހަރަކު ﷲ ތައާލާއަށް ދަންނަވައި ނުލެވިގެނެނެވެ. ހިތަށް އެއްޗެއް އަރައި އިޞްލާޙްވާކަށް އަދިވެސް ނުވޭ ހެއްޔެވެ؟
- ޝައިޚް ޠާރިޤް ޖަމީލްގެ ދަރުސަކުން
