ބޮޑެތި ފާފަތަކުގެ ތެރެއިން ގިނަ ފާފަތަކަކަށް އަރައިގަނެވުން މިހާރު މިވަނީ ވަރަށް ބޮޑަށް ޢާންމުކަމަކަށްވެފައެވެ. ބައެއް މީހުންނަށް އެއީ ބޮޑެތި ފާފަތައް ކަމުގައި ޤަބޫލުވެސް ނުކުރެވެއެވެ.
އެގޮތުން ބަލާއިރު، ފާހިޝް ޢަމަލުތައް ކުރުމާއި ވައްކަންކުރުމާއި، މަކަރާއި ޙީލަތްހެދުމާއި ބަނގުރާބުއިމާއި މަސްތުވާތަކެތި ބޭނުންކުރުމާއި އަނިޔާވެރިވުމާއި ސިހުރުހެދުމާއި ރިބާކެއުމާއި މީހުން ދިރިތިއްބައި އެމީހުންގެ މުޅަމަސް ކެއުން ފަދަ އެތައް ބޮޑެތި ފާފަތަކެއް ކުރުން މުޖުތަމައުގައި ވަނީ އިންތިހާއަށް އަށަގެންފައެވެ.
މިފަދަ ކަންކަން ކުރުމަކީ ބޮޑު ފާފަތަކަށް އަރައިގަތުންކަމާއި މިފަދަ އެންމެހައި ފާފަތައް ކުރުން ހުއްޓާލަން ޖެހޭކަން އެންމެންނަށްވެސް އެނގެއެވެ. ހިތާމައަކީ ހަމަ ބިރުވެތިނުވެވޭކަމެވެ. އަންނަނިވި އާޔަތް ކިޔައި ހޭލުންތެރިވާށެވެ! ނަރަކައަށް ނުވަދެ ސުވަރުގެ ލިބުންވަނީ އެއިރުންނެވެ.
"ތިއަބައިމީހުންނަށް އެކަންކަން ނަހީކުރައްވާފައިވާ ބޮޑެތި ފާފަތަކުން ތިއަބައިމީހުން ދުރުހެލިވެ ތިބޭނަމަ، ތިއަބައިމީހުންގެ ކުދިކުދި ފާފަތައް ތިއަބައިމީހުންގެ ކިބައިން، ތިމަންރަސްކަލާނގެ ފުއްސަވާ ހުށީމެވެ. އަދި، މާތްވެގެންވާ ތަނަކަށް، (އެބަހީ: ސުވަރުގެޔަށް) ތިމަންރަސްކަލާނގެ، ތިއަބައިމީހުން ވައްދަވާހުށީމެވެ." (އައް ނިސާ: 31)
- އިސްލާމީ ތިލަފަތުގެ ދަރުސަކުން
